Isayas 13 - Hanunuu

Ti Pagsabihun tungkul sa Babilunya

¹ Inda ti pagsabihun tungkul sa Babilunya, ti ipinaburayhaw Panginuun sa kan Isayas kay anak ni Amus:

² Pagtur-ug kamu usa ka bandira ati sa katayungtungan bantud balaw may puun kayu. Bag-u pagringgit kamu mabisug sa manga sundalu ag paamani niyu sida hampay girahun ag suldun ti manga banwa manga kilala ag makamaskihan pag tawu.

³ Sinugu yi niku kang manga itinigana pag manga sundalu imaw ti pumarusa sa pagkagalitan niku pag manga tawu. Inda pag manga sundalu magbaya ag magsarig buwatun niku inda pag parusa.

⁴ Patingihi niyu ti iringayan mayamu tawu sa bantud. Patingihi niyu ti iringayan manga kaharian hanggan nasyun magtiripun. Pagtipunun Panginuun Makamaskihan kay manga sundalu para sa girahan.

⁵ Ginan sida sa ararayu pag rugar. Gubaun Panginuun hanggan niya manga sundalu ti buu daga dahil sa kay pangagalit.

⁶ Paglumi kamu, Babilunya, dahil arani yi ti sirang Panginuun, ti sirang pagguba Makamaskihan pag Diyus sa kanyu.

⁷ Sa ati pag sirang, manlumuy ti tanan tawu. Ti kada usa maduraan kabisugan,

⁸ ag mangirkirug sa kadalaan. Maungdan nida ti subra pag kakurian parihu sa kakurian babayi magpanganak. Mamarantayan sida sa usa kag sa usa ag manragang kanda manga uyahun sa kay-a.

⁹ Pagpatingi kamu! Rumas-ug yi ti sirang Panginuun, ti sirang kahigpitan ag masyadu pag pangagalit. Gubaun ti daga tugka sa udyi maulianan, ag ti manga mag-uli ati pag manga makasalanan rurisun.

¹⁰ Udyi rumayaw ti manga pamgasan. Suminggit ti init dapat madlum diman, hanggan ti bulan unman diman mamakaun rayaw.

¹¹ Magkun ti Panginuun, “Parusahan niku ti kalibutan dahil sa kay kadautan. Parusahan niku ti manga makasalanan dahil sa kanda kasalanan. Tapusun niku ti kayabangan manga marayabang. Paapasun niku ti pagpalabaw-labaw manga mag-unuunu.

¹² Pira wadi ti masawad pag manga tawu, nakan makuri sida hanapun kaysa linunsay pag gintu ginan sa Upir.

¹³ Tandugun niku ti langit hanggan ti kalibutan. Aku, ti Panginuun Makamaskihan, buwatun niku inda sa sirang ipakakit niku kang masyadu pag pangagalit.”

¹⁴ Ti manga day-uhan sa Babilunya malagiw ag bumalik tag sa kanda sadili banwa ga manga karasyaw pagbukadun. Muli sida ga manga karanidu unman may mag-alaga.

¹⁵ Ti kada madakup pag bun-un tugka sa mamatay.

¹⁶ Kanda manga lapsag gutay-gutayun sa kanda atubangan. Pamul-un kanda manga kasiyunan sa kanda manga balay ag lugusun kanda manga asawa.

¹⁷ Pagpatingi kamu! Ipagira niku ti Babilunya sa manga taga Midya balaw magpahalaga sa pilak hanggan sa gintu.

¹⁸ Matyun manga taga Midya sa ugyung ti manga kalay-awan lalaki. Hanggan ti manga anak balaw nida kaawaan.

¹⁹ Ti Babilunya pag kaharian imaw ti pinakamarinu sa tanan pag kaharian. Pag-ipadayaw tunda niya manga nasakupan. Dapat gubaun niku tunda parihu sa Suduma ag Gumura.

²⁰ Balaw yi tunda maulian hanggan aban. Udyi may Arabu mamatindug ati kay turda. Unman diman may manga pastur mangalaga ati kay karanidu.

²¹ Bumaliw ulian wadi inda manga talun hayup. Ulian manga bukaw ag iba waya manga maraisug pag hayup kanda manga balay, ag mangutbaw-utbaw ati ti manga kambing maila.

²² Umuwang ati sa manga bantayaw nida ag manga balay hari ti manga simarun idu. Arani yi ti katapusan Babilunya; balaw yi dumugay.