Isayas 12 - Hanunuu

Kanta sa Pagpasalamat

¹ Sa ati pag sirang, manganta kamu: “Panginuun, pagdayawun niku kawu. Nagalit kawu sa kangku, dapat unman yi taynguna, ag kainda pagpasulungun yi nimu aku.

² Kawu pag Diyus kang Manugribri. Manarig aku sa kanmu ag balaw yi madala. Kawu, Panginuun, ti magpakaun kabisugan sa kangku, kawu kang karantahun. Kawu ngani ti nagribri sa kangku.”

³ Nu kabitay ti maramig pag danum makapakaun kabayaan sa magkauwaw, kamu makabaya waydi nu irinibri yi kamu Panginuun.

⁴ Pagras-ug ati pag sirang, manganta kamu: “Dayawa niyu ti Panginuun! Sambaha niyu siya! Tultulan niyu sa manga nasyun kay manga binuwat. Tultulan niyu siya ti kailangan dapat dayawun.

⁵ Pagkanta kamu sa Panginuun dahil makadululaw kay manga binuwat. Itultul niyu inda sa buu kalibutan.

⁶ Panringgit kamu ag pagkanta sa kabayaan, kamu pag manga taga Siun. Dahil makamaskihan ti Banal pag Diyus Israil sa kanyu arani.”