Isayas 11 - Hanunuu

Ti may Kahusayan pag Kaharian

¹ Ti makahari pag linahi ni Dabid ga puun pinlud. Dapat nu kabitay ti tuud magsalingsing, rumas-ug diman ti usa ka bag-u pag hari ginan sa linahi ni Dabid.

² Pumirmaminti sa kanya ti Ispiritu Panginuun ag makapakaun inda sa kanya kadunungan, pan-intindi, kakayahan sa paggayak, may kapangyarihan, kaalaman, ag may paggalang sa Panginuun.

³ Bumaliw kabayaan niya ti pagsunud sa Panginuun. Balaw siya sumintinsiya angay lang sa kay nakitan aw ngatay nadnugan sa iba.

⁴ Pakan-an niya katadlungan ti manga pugri ag apinan niya kanda karampatan. Sa hampak niya arup, parusahan niya ti manga tawu sa kalibutan ag magkaramatay ti manga daut pag tawu.

⁵ Ipalantap niya ti katadlungan hanggan ti katutuuhanan, inda ti pinagka huragkus niya.

⁶ Bumaliw lubus ti kahusayan sa kay maghari. Ti simarun idu mangulian kaibahan karanidu. Pahuway magkaraibahan ti kambing ag liyupardu. Mirinsanan ti manga tinday baka sa manga anak liyun, ag manga anak dariit ti mangalaga sa kanda.

⁷ Mirinsan maglingaun ti baka ag ti usu, kanda manga anak taraidan manlukub. Ti liyun manharab dayami ga baka.

⁸ Una magbuybuya ti manga anak dariit sa saruy ukang ulay madalit, una waya ikuut nida kanda kamang siyun pag ukang, dayu sida maunu.

⁹ Udyi may mandaut ngatay man-guba sa Siun, ti banal niku pag bantud. Dahil bumaliw lantap sa buu kalibutan ti pagkilala sa Panginuun parihu sa kalalawdan dagat punu danum.

¹⁰ Rumas-ug ti sirang, ianak ti bag-u pag hari ginan sa linahi ni Dabid imaw ti bumaliw pasandam sa manga nasyun hampay tumipun sida. Tumiripun sida sa kanya, bumaliw may kadayawan ti pag-ulian niya pag rugar.

¹¹ Sa ati pag sirang utru gamitun Panginuun kay kamaskihan hampay pauliun ti manga nasawad pag nasakupan niya dinara-bihag sa Asirya, sa Ihiptu, sa Patrus, sa Itiyupya, sa Ilam, sa Babilunya, sa Hamat ag sa iba waya rugar arayu.

¹² Ipaabwat Panginuun ti usa ka bandira hampay ipakakit sa manga nasyun pagtipunun yi niya ti nasakupan Israil hanggan Huda ginan sa tuhay-tuhay pag rugar sa buu kalibutan.

¹³ Madura yi ti inggit Israil sa Huda ag ti galit Huda sa Israil.

¹⁴ Mirinsan sida gumira sa manga Pilistiyu sa isalpan. Girahun diman nida ti manga nasyun sa butlakan ag agawun nida kay manga kasiyunan. Sakupun nida ti Idum ag Muab hanggan ti manga Amuriyu pumasakup diman sa kanda.

¹⁵ Pamarahun Panginuun ti Dagat Ihiptu, ag pauypun niya ti mainit pag durus sa Sapa Iyupratis hampay bumaliw wadi pitu ka dariit pag bululusan danum mahimu madipay tawu.

¹⁶ Nu kabitay ti maluang pag dalan paglakawan nasakupan Israil katpung nighit sida ginan sa Ihiptu, may imaw diman maluang pag dalan para sa manga nasawad niya pag manga nasakupan sa Asirya.