Isayas 10 - Hanunuu

^1-2 Kaawaawa kamu manga manugbuwat balaw matadlung pag kasuguan, mag-api sa manga pugri niku pag nasakupan ag mag-irang katadlungan sa kanda. Sa panab-anan tunda pag kasuguan, pagbul-un niyu ti kasiyunan manga buranday hanggan manga ilu.

³ Hintay ti buwatun niyu sa sirang pagsintinsiya sa kanyu? Hintay ti buwatun niyu nu rumas-ug ti kadamhakan ginan sa arayu? Sa kantapu kamu pag manhagad awat? Ag naan niyu pag-itagu kanyu kayamanan?

⁴ Unman may masawad sa kanyu. Bihagun ngatay matyun kamu, dapat ti pangagalit Panginuun dayu madura. Alistu di gid siya pumarusa sa kanyu.

Ti Parusa Panginuun sa manga Taga Asirya

⁵ Magkun ti Panginuun, “Kaawaawa ti manga taga Asirya. Sida kang gamitun pamakul hampay parusahan kang manga pagkadat-an.

⁶ Suguun niku sida giraha ti nasyun balaw maka-diyus hanggan ti kang pagkagalitan, hampay wayakun ag tatatataan ga lutuk sa baklayan, ag bul-un ti tanan nida kasiyunan.”

⁷ Dapat balaw maalaman hari Asirya kuntay paggamitun lang maaw siya Panginuun. Kay isip basta yi lang manwayak mayamu pag nasyun.

⁸ Pag-ipadayaw niya magkun, “Ti kumandir niku manga sundalu parihu sa manga hari.

⁹ Hintay ti pagkatuhay Karkimis ag Kalnu, hanggan Arpad ag Hamat, bag-u Damasku ag Samarya? Sida tanan pararihu niku winayak.

¹⁰ Pinarusahan niku ti manga nasyun magsamba sa manga diyus-diyusan mas mayamu waya sa manga diyus-diyusan sa Hirusalim ag Samarya.

¹¹ Winayak yi niku ti Samarya hanggan kay manga diyus-diyusan. Katida diman kang buwatun sa Hirusalim hanggan sa kay manga diyus-diyusan.”

¹² Dapat inda ti sinabi Panginuun mangyari nu tapus yi niya buwatun ti laban sa Bantud Siun ag sa Hirusalim: “Parusahan niku ti hari Asirya dahil sa kay magpadayaw ag magpayabang.

¹³ Dahil magkun siya, ‘Nabwat niku inda sa panab-anan niku sadili kabisugan ag kadunungan. Tinalu niku ti mayamu pag manga nasyun ag bin-ul kanda manga kayamanan. Parihu aku sa tudu baka; dinaug niku kanda manga hari.

¹⁴ Bin-ul niku ti kayamanan manga nasyun, ga magpunpun lang aku itlug sa pugadan tinayakan niya ina. Unman may pakpak magkabkabaw ngatay uni nadnugan.’ ”

¹⁵ Mahimu aw magpayabang ti wasay ngatay ti ragari sa maggamit sa kanya? Makabyaw aw pamakul ti may hiyaput sa kanya?

¹⁶ Nakan mamadara sakit ti Makamaskihan Panginuun, imaw ti pumalumuy sa makurasug pag sundalu Asirya. Irubun Panginuun ti manga kayamanan niya sa maglabdaban pag apuy.

¹⁷ Ti Panginuun ti pinagkasulu ag banal pag Diyus Israil bumaliw ga maglabdaban apuy umirub sa manga dugihan niya pag halamanan sa sulud lang usa ka sirang.

¹⁸ Nu kabitay ti sakit magdaut sa bilug tawu, dautun diman Panginuun ti marinu ag mayad pag kapuruan hanggan ti manga tanman hari Asirya.

¹⁹ Pira wadi ti masawad pag puun sa kay kapuruan. Mabilang inda una lang manga anak dariit.

^20-21 Rumas-ug ti sirang ti manga nasawad Israilita linahi ni Hakub unman yi mansarig sa Asirya, imaw ti nagpakuri sa kanda. Sumarig yi sida sa Panginuun, ti Banal pag Diyus Israil. Bumalik nalub-anan sida sa Makamaskihan pag Diyus.

^22-23 Una waya ga baras sa baybay dagat kay kayamu ti manga Israilita, pira lang ti makabalik. Nakatagka yi ti parusa para sa buu Israil. Pihu tupadun inda Panginuun Diyus Makamaskihan.

²⁴ Nakan magkun ti Panginuun Diyus Makamaskihan, “Kamu kang manga nasakupan magpangulian sa Siun, danga kamu magkadala sa manga taga Asirya una pagpakurian nida kamu parihu sa binwat sa kanyu manga taga Ihiptu.

²⁵ Dahil balaw yi dumugay madura yi kang pangagalit sa kanyu ag sa kanda maan niku inda pag ibuhus tugka sa magkaramatay sida.

²⁶ Parusahan niku sida parihu sa binwat niku sa manga taga Midyan sa Batu Urib ag sa manga Ihipsiyu pagka ilinimus niku sida sa dagat.

²⁷ Sa ati katpung pag sirang, palpasan niku kamu ginan sa kapangyarihan Asirya. Ga bin-ul kanyu pas-an mabuyat ginan sa kanyu labay hanggan ti singkaw magpabuyat sa kanyu liug. Makalpas kamu ginan sa kanda kapangyarihan dahil bumaliw matabul kamu.”

Ginmira ti Asirya

²⁸ Ginira Asirya ti Ayat. Ati sida pag linmakaw sa Migrun ag tinayakan nida sa Mikmas kanda manga dara.

²⁹ Linmakaw sida sa diripayan, bag-u ati pag naturug sa Giba. Nadala ti manga taga Rama, ag nalagiw ti manga nasakupan Gibiya imaw ti banwa ni Hari Saul.

³⁰ Pagringgit kamu ti manga taga Galim! Pagpatingi kamu manga taga Lais hanggan kamu pag kaawaawa taga Anatut.

³¹ Nalagiw yi ti nasakupan manga taga Madmina hanggan Gibim.

³² Kainda pag sirang, rumas-ug ti manga taga Asirya sa Nub. Bag-u manpaaman sida girahun ti bantud Hirusalim, ti Bantud Siun.

³³ Pagpatingi kamu! Ti Panginuun Makamaskihan ti manwayak sa manga taga Asirya sa panab-anan niya makadululaw pag kamaskihan, ga magpungpung lang manga sanga kayu. Ipakababa niya ti manga marapadayaw parihu sa magpukan arabwat pag puun kayu.

³⁴ Ipakababa niya sida parihu sa magpukan kayu sa kapuruan sa panab-anan wasay. Sida parihu sa manga puun kayu sa Libanun pagpuun Makamaskihan pag Diyus.