Isayas 1 - Hanunuu

¹ Inda pag ribru tungkul sa ipinaburayhaw Diyus sa kan Isayas kay anak ni Amus. Tungkul inda sa Huda ag sa Hirusalim katpung naghari sa Huda sida ni Usyas, ni Hutam, ni Akas ag ni Isikyas.

Ti Makasalanan pag Nasyun

² Patingihi niyu langit ag daga, dahil magkun ti Panginuun, “Inalagaan niku ag pinadaka ti manga Israilita kang manga anak, dapat naglaban sida sa kangku.

³ Ti manga baka magkilala sa kanda manug-alaga, hanggan ti manga asnu alam nu naan pag paraharaban sida pag ipaharab nida manug-alaga, dapat ti manga nasakupan niku Israilita unman magkilala sa kangku.”

⁴ Sida nasyun makasalanan, manga tawu punu kadautan, linahi manga manugbuwat daut ag magpandaut. Dinayu nida ag pinuyaan ti Panginuun, ti Banal pag Diyus Israil, ag pinatlikudan nida siya.

⁵ Manga taga Israil, hayga parargu kanyu maglaban? Magkaibug aw waya lugud kamu parusahan? Ga tawu kamu lunsay biyag kay ulu ag punu kakurian kay tagipusuun.

⁶ Ginan sa ulu tugka sa raprapa, pasay yi biyag, lahub ag magkarabaga. Unman may mag-ugas, ngatay magtampul, ngatay magbulung.

⁷ Udyi makinabangan kanyu nasyun; kanyu manga banwa nagkarairub yi. Habang mabantayan kamu, pagbul-un manga taga iba daga ti burak niyu manga tanum sa kanyu tanman. Dinaut nida kanyu daga tugka sa udyi kamu may makinabangan.

⁸ Unman may nasawad nu ud ti Hirusalim. Ga parasirngan inda sa ubasan ngatay payag sa karaw-an tanuman kunduy, ag parihu sa banwa pinalibutan kalaban.

⁹ Nu ti Panginuun Makamaskihan balaw lang nagsawad una di pira sa kanta, parihu yi kita sa Suduma ag Gumura.

¹⁰ Kamu pag manga takinan hanggan manga nasakupan Hirusalim parihu sa manga taga Suduma ag Gumura, patingihi niyu ti bagaw ag kasuguan Panginuun nita Diyus.

¹¹ Magkun siya, “Ud may kabuluhan sa kangku ti mayamu niyu handug. Sawa yi aku sa kanyu manga handug pagsunugun — manga karanidu hanggan taba manga hayup kanyu pinatabul. Balaw aku magbaya sa dugu manga tudu baka, manga karanidu, hanggan manga kambing.

¹² Si unu ti nagsugu sa kanyu kuntay daran-a inda tanan nu magsamba kamu sa kangku? Si unu ti nagsugu sa kanyu pagtata sa kang Balay?

¹³ Apasi yi niyu ti pagdara manga handug unman may pulus. Pagkadat-an niku ti hungaw niyu manga kamangyan. Udyi niku maagwanta kanyu magtiripun nu Pista Lapus Lati hanggan nu Sirang Pamahari, dahil una magtiripun kamu, magbuwat kamu kadautan.

¹⁴ Pagkadat-an niku kanyu manga Pista Lapus Lati ag iba waya niyu manga pista. Subra yi! Udyi niku inda maagwanta!

¹⁵ “Nu mandarangin kamu balaw niku kamu pansinun. Una paulit-ulit waya kamu mandarangin balaw niku kamu patingihan dahil mayamu kanyu minatay pag tawu.

¹⁶ Lumpiyuha niyu kanyu sadili. Apasi yi niyu kanyu magbuwat kadautan sa kang atubangan.

¹⁷ Pagpaanad kamu sa magbuwat mayad ag ilantag ti katadlungan. Sungyawa niyu ti manga mag-api ag apinan niyu ti karampatan manga ulila hanggan manga buranday.”

¹⁸ Magkun waya ti Panginuun, “Abala kamu paghampangan nita inda. Una waya kabitay kay kauring kanyu manga kasalanan, lumpiyuhun di niku tunda hampay malumpiyu kamu.

¹⁹ Nu sumunud lang kamu sa kangku, makakaun kamu pinakamarinu pag patubas daga.

²⁰ Dapat nu parargu kamu maglaban, pihu gid magkaramatay kamu sa gira.” Matupad gid inda dahil Panginuun ti may sabi.

Ti Makasalanan pag Banwa

²¹ Bantayi niyu ti banwa Hirusalim. Matinupadun inda kaybi, dapat taynguna ga babayi baraydan. Kaybi manga tawu matadlung ti mag-uli sitay, dapat taynguna manga manugmatay-tawu.

²² Hirusalim, kaybi mahalaga kawu parihu sa pilak, dapat taynguna udyi kawu may pulus. Kaybi parihu kawu sa marinu pag intus, dapat taynguna ga intus yi may lakay danum.

²³ Kanmu manga takinan manga supakil ag kaibahan manga mananakaw. Gustu nida pirmi may upa, ag magpanhagad pamakaun. Balaw nida pag-apinan ti karampatan manga ulila ag balaw diman nida pagpatingihan ti manga buranday magdangup.

²⁴ Nakan magkun ti Panginuun, ti Makamaskihan pag Diyus Israil, “Gumaan kang tagipusuun nu maparusahan yi niku kamu pag manga taga Hirusalim kang manga kalaban.

²⁵ Parusahan niku kamu hampay bumag-u, parihu sa pilak pagtunawun sa apuy.

²⁶ Utru maan pakan-an niku kamu manga takinan hanggan manga manugpaanyu ga kaybi. Kanyu banwa ingarnan ‘Banwa manga Matadlung ag Matinupadun pag manga Tawu.’ ”

²⁷ Sa panab-anan matadlung pag pagsintinsiya Diyus, iribri niya ti Hirusalim hanggan kay mag-ampu pag manga nasakupan.

²⁸ Dapat rurisun niya ti manga supakil hanggan ti makasalanan, ag midamhak ti magpatlikud sa Panginuun.

²⁹ Mangay-a kamu manga taga Hirusalim dahil sa kanyu magsamba sa manga puun kayu insina hanggan sa manga banal pag halamanan.

³⁰ Miparihu kamu sa magkalayung pag puun kayu insina, ag sa usa ka halamanan balaw magkabunyagan.

³¹ Ti manga may kapangyarihan sa kanyu bumaliw parihu sa layung kayu madali pag maktan, ag ti daut nida buwat bumaliw ga sikrab apuy umirub sa kanda. Unman may makapsa sa tunda pag apuy.