Ipisu 6 - Hanunuu

Manga Paanyu sa manga Gurangun hanggan sa manga Anak

¹ Kamu pag manga anak, pagsunud sa kanyu manga gurang. Katida ti dapat niyu buwatun nu kamu magsarig sa kan Kiristu.

^2-3 Kay sabi sa Banal Kasuratan magkun, “Galanga nimu kanmu ama hanggan kanmu ina hampay kawu umalwan kanmu kahamtangan ag lumawig kanmu buhi sa kanmu ulian pag daga.” Inda ti un-an pag sugu may tapil taratu.

⁴ Kamu pag manga gurangun, danga pakahigpiti kanyu anak barang magkagalit sa kanyu. Bagkus ngap ginan waya sa diit paanadun niyu sida sa ugali angay sa bagaw Panginuun.

Paanyu sa manga Panawuhun hanggan sa manga Amu

⁵ Kamu pag manga panawuhun, pagsunud kamu sa kanyu manga amu sitay sa babaw daga, pag may dala hanggan galang sa kanyu magtupad sa kanda bilang ga si Kiristu diman kanyu pagsirbihan.

⁶ Una mag-akitan manga tawu, una unman mag-akitan, pagkatunda diman kanyu buwatun, balaw sa ikabaya tawu, nu unman dahil kamu manga panawuhun ni Kiristu buluntadan kamu pagtupad sa kagustuhan Diyus.

⁷ Pagsirbi kamu pagmaariwaya kanyu naisipan pagga sa Panginuun diman kanyu pagsirbi ag balaw lang sa tawu.

⁸ Dahil naalaman yi niyu gantihan di Panginuun ti kada magbuwat mayad una panawuhun una bukun panawuhun.

⁹ Kamu pag manga amu, pagpasunaid kamu sa kanyu manga panawuhun, danga waydi niyu pagpakapadalaa, dahil alam di niyu parihu lang waydi kamu panawuhun usa lang ka Panginuun sa langit, ud may pag-apihun sa kanyu tanan.

Ti Ipinakaun Panginuun pag Panangga

¹⁰ Inda wadi kang bilin sa kanyu, pagpakarig-un kamu dahil sa kanyu pakiusa sa Panginuun ag dahil sa awat niya daka pag kamaskihan.

¹¹ Isulung niyu ti panangga kay ipinakaun Diyus sa kanyu, hampay may panlaban kamu sa kay manga paraan diyablu.

¹² Dahil kanta kalaban balaw manga tawu, nu unman ti kagadhan manga labang sa panungaan langit daga, manga pinunu, manga may kapangyarihan hanggan manga manugpamahala sa kadudulman magsaklaw sa inda pag kalibutan.

¹³ Nakan ngani isulung niyu ti panangga ginan sa Diyus. Nu katunda makatiis kamu sa kanyu maglaban nu rumas-ug ti daut pag udas. Bag-u nu matapus tunda kanyu naglaban, marig-un diman kamu sa kanyu pagsarig sa Panginuun.

¹⁴ Nakan ngani pagpirmi alistu kamu. Ihawud niyu ti katutuuhanan. Ti katadlungan kanyu panangga isulung yi sa kanyu dubdub.

¹⁵ Pagmay ga lapak yi kanyu raprapa kanyu maghanda manudlu sa Mayad pag Barita tungkul sa kahusayan Diyus.

¹⁶ Danga malimtan niyu kanyu pagsarig sa kan Kiristu, imaw kanyu panangga hanggan panmatay sa tanan maglabdab pag ugyung ni Satanas.

¹⁷ Ikalu niyu ti karibrihan. Pagsa kanyu kamang ti baladaw pakaun Ispiritu, kay ibug sabihun tunda kay ngani Bagaw Diyus.

¹⁸ Tanan-tanan inda buwata niyu pag may darangin paghagad awat sa Panginuun. Pagdarangin kamu sa kada udas angay sa kay udyuk Ispiritu Banal. Nakan ngani pagpirmi gid kamu alistu, dag-apas kamu sa darangin sa tanan manga nasakup sa Diyus.

¹⁹ Daranginan diman niyu aku hampay pakan-an kang-ud gid pag baragawun, agud ilubus kang katutuman sa kang magpanudlu sa madalum pag katutuuhanan tungkul sa Mayad pag Barita.

²⁰ Sinugu aku Diyus hampay manudlu sa inda pag Mayad pag Barita una aku sa pirisuhan taynguna. Nakan ngani daranginan yi gid niyu aku hampay ilubus niku kang katutuman sa kang magpanudlu unman may subra unman diman may kurang.

Manga Pangatapusan pag Bilin

²¹ Ti pagmayadun nita pag patar-ari ag ti matinupadun sa kay buruwatun Panginuun, si Tikiku ngani imaw ti bumarita sa kanyu tanan bagay tungkul sa kang kahamtangan hanggan kang manga buwat.

²² Nakan pagsuguun niku siya asan tag sa kanyu hampay maalaman niyu kanmi kahamtangan ag hampay bumisug kanyu tagipusuun.

²³ Magdarangin aku hampay ti Diyus Ama ag ti Panginuun Hisu-Kiristu pumakaun sa tanan manga patar-ari kay kahusayan hanggan kay pagmahal may tapil pagsarig.

²⁴ Sa tanan tawu nu kanda pagmahal sa Panginuun Hisu-Kiristu balaw magkauman-uman, pagsa kanda yi ngap kay papalad Diyus.