Ipisu 5 - Hanunuu

Pag-ugali Parihu sa manga Tawu Narayawan

¹ Kamu kabay kay manga anak Diyus pagmahalun niya. Huwada niyu siya.

² Pag-ugali kamu lubus may pagmahal parihu sa kan Kiristu. Dahil sa kay pagmahal sa kanta, ipinakaun niya kay buhi, minatay siya ga usa ka mabanglu pag handug pagbayaun Diyus.

³ Kamu manga nasakup sa Diyus, nakan ngani danga yi magbuwat una magsampit man sa harampangan una kabitay pag kalasi magpanguragin, kayagtingan una manga mahalay pag hilig.

⁴ Danga yi pagpakan-i rugar una hintay pag mahalay, una manga harampangan ud may kabuluhan, una ti harakutan ud may pulus. Bagkus ngap pagpasalamat gid kamu sa Diyus.

⁵ Alam diman niyu unman may kaparti sa kaharian Diyus ag ni Kiristu ti tawu nu magpanguragin, nu maraw-ay, nu maraibgun sa kasiyunan, dahil ti maraibgun sa kasiyunan parihu sa magsamba sa diyus-diyusan.

⁶ Danga kamu padara-dara una sa kantapu sa kanda baragawun mahakut sa tunda pag manga buwat. Dahil sa katida pag buwat magkagalit ti Diyus sa manga tawu supakil.

⁷ Nakan ngani danga kamu magpasalbug sa manga katunda pag kalasi tawu.

⁸ Kaybi kamu sakup sa kadudulman, dapat taynguna kamu sakup yi sa marayaw dahil sa kanyu pakiusa sa Panginuun. Nakan ngani pag-ugali kamu parihu sa manga tawu sakup yi sa marayaw.

⁹ Dahil ti ugali sa marayaw kay burak lunsay mayad, matadlung hanggan tutuu.

¹⁰ Pag-adali niyu nu hintay ti pagbayaun Panginuun.

¹¹ Danga kamu magpasalbug sa manga tawu magbuwat sa balaw ikamayad, sa manga ugali sakup sa kadudulman. Bagkus ngap ipaburayhaw niyu ti daut nida manga buwat.

¹² Dahil makakaray-a sabihun ti manga pagbuwatun nida sa lihim.

¹³ Nu marayawan ti tanan buwat, makitan ti daut, ti mayad.

¹⁴ Dahil karayawan yi ngani tigpakilala sa tanan. Nakan ngani pagsabihun magkun, “Pag-imata yi kawu ginan sa katurugan, pagkabuhi yi kawu ginan sa kamatayan, rayawan yi kawu ni Kiristu.”

¹⁵ Nakan ngani pagmadahan yi gid kamu sa kanyu mag-ugali. Pag-ugali kamu parihu sa manga matinudukun, danga parihu sa manga unman may namuangan.

¹⁶ Daut yi ngani nakan ti ugali taga kalibutan kainda. Nakan danga pagpalawyan niyu nu may rugar waya makabuwat mayad.

¹⁷ Pagmabut-anin kamu. Intindiha niyu nu hintay ti kagustuhan Panginuun.

¹⁸ Danga kamu maglangu dahil makarangga tunda sa mayad pag ugali. Bagkus alwasiha niyu sa masuldan kamu Ispiritu Banal.

¹⁹ Pagmirinsanan kamu pagkarantahan Bagaw Diyus, manga magdayaw sa Diyus hanggan manga kanta angay sa kay udyuk Ispiritu. Pagkanta kamu ginan sa kanyu buu tagipusuun, pagdayaw kamu sa Panginuun.

²⁰ Pirmi kamu pagpasalamat sa Diyus Ama tungkul sa tanan bagay sa kay ngaran nita Panginuun Hisu-Kiristu.

Manga Paanyu sa may Asawa

²¹ Pagparasakupan kamu sa usa kag sa usa, tanda sa kanyu paggalang sa kan Kiristu.

²² Kamu pag manga babayi, pagpasakup kamu sa kanyu sadili asawa, parihu diman sa kanyu magpasakup sa Panginuun.

²³ Dahil lalaki tigdara ulu sa kay asawa babayi, parihu ga kan Kiristu tigdara ulu sa iglisya imaw kay bilug. Siya diman waydi ti manugribri iglisya.

²⁴ Nu kabitay ti iglisya magpasakup sa kan Kiristu, katunda diman waydi ti manga babayi kailangan pasakup sa kanda sadili asawa sa tanan bagay.

²⁵ Kamu pag manga lalaki, mahalun niyu kanyu sadili asawa babayi parihu diman sa kay pagmahal ni Kiristu sa iglisya. Ipinakaun kabay niya kay buhi, namatay siya para sa iglisya,

²⁶ hampay kay lumpiyuhun sa danum ag sa Bagaw bag-u ipasakup niya sa Diyus.

²⁷ Kay binuwat niya tunda hampay ipaatubang niya sa kay atubangan ti iglisya masnag, unman may huput kadautan, unman may yukut, lubus nasakup sa Diyus, lubus yi lang marinu.

²⁸ Kailangan mahalun manga lalaki kanda sadili asawa parihu sa kanda sadili bilug. Nu ti lalaki magmahal sa kay asawa, magmahal siya sa kay sadili bilug.

²⁹ Unman may tawu magkadaut sa kay sadili bilug, lalu ngap pagpakan-an ag pag-alagaan niya, parihu diman sa binwat ni Kiristu sa iglisya.

³⁰ Dahil kita kay manga gamit niya bilug.

³¹ May pagsabihun sa Banal Kasuratan magkun, “Nakan ngani tayakan lalaki kay ama hanggan kay ina, magkausa sida mag-asawa bag-u sida magkabuu usa yi ka nayi.”

³² Inda ti usa ka pinakamahalaga ag madalum pag katutuuhanan. Kang isip inda tungkul sa kan Kiristu ag tungkul sa iglisya.

³³ Dapat inda may ibug sabihun diman tabug sa kanyu sa kada usa. Ti kada lalaki kailangan mahalun niya kay sadili asawa, pagga kanya diman sadili. Ti kada babayi kailangan paggalang sa kay sadili asawa lalaki.