Ipisu 4 - Hanunuu

May Pakiusa sa Ispiritu

¹ Nakan aku, ti usa ka napirisu dahil sa kang magsirbi sa Panginuun, magsabi sa kanyu, pag-ugali kamu angay sa mayad pag ugali manga pinili Diyus.

² Kamu pagmapinakumbabaun, pagmabuut ag pagmainagwantahun. Angay sa pagmahal, pagparasunaidan kamu sa kada usa.

³ Pinausa yi kamu Ispiritu Banal, pagmasigasid kamu hampay unman madura kanyu pagpakiusa, lubus yi kamu pagkabuu sa kahusayan.

⁴ Kita ti manga magsarig usa lang ka bilug, usa lang ka Ispiritu ti nangulian sa kanta. Usa lang kanta pagsarigan pagka kita kay tinawag.

⁵ May usa lang ka Panginuun, usa lang ka sarig, usa lang ka tulbaw.

⁶ Usa lang ka Diyus imaw yi ti Ama nita tanan. Siya yi gid ti hari sa tanan, siya ti magtandug ag mag-ulian sa kanta.

⁷ Ti kada usa sa kanta may kanya-kanya pakaun ni Kiristu kanta kahuray angay sa kay nalub-anan.

⁸ Kainda ti pagsabihun sa Banal Kasuratan magkun, “Pagka siya inmatag sa langit, nanaban siya sa mayamu pag nabihag, bag-u may ipinakaun siya sa manga tawu.”

⁹ Hintay kay ibug sabihun, kay nag-atag sa langit? Kay ibug sabihun sinmitay dapu siya sa babaw daga.

¹⁰ Ti sinmitay sa babaw daga imaw diman ti inmatag sa kaabwat-abwatan, sa tungud langit, agud siya tig-ukub sa tanan-tanan.

¹¹ Siya diman ti may ipinakaun sa manga tawu. Kay iba pinakan-an niya katungkulan sa pagka-apustul, ti manga iba sa pagkapurupita, ti iba sa magtudlu Mayad pag Barita, ti iba pinakan-an niya katungkulan hampay mag-alaga sa iglisya, ti iba hampay manugtudlu.

¹² Sida tanan may katungkulan hampay paanadun nida sa buruwatun ti tanan manga nasakup sa Diyus, sa ikarig-un iglisya ni Kiristu.

¹³ Nu katunda kita tanan magkarausa aban sa kanta pagsarig hanggan sa kanta pagkilala sa Anak Diyus. Bag-u udyi may ikasabi sa kanta, parihu sa kan Kiristu, unman yi may kakurangan una di.

¹⁴ Bukun yi kita parihu ga manga anak di waya daradarahan sa una hintay ti pag-itudlu. Balaw kita parihu sa manga sarakyan sa dagat paglangkiangun humbak, pag-ipadpad durus. Udyi kita madaya manga tawu kay ibug daran-un kita tag sa kadautan.

¹⁵ Bagkus ngap pumirmaminti kita sa katutuuhanan may tapil di pagmahal hampay bumaliw parihu kita sa kanta pakiusa sa kan Kiristu. Siya ti kanta ulu.

¹⁶ Sa panab-anan niya magkaminsan ti bilug may manga gamit sinugdung-sugdung manga kaluas-luasan. Si Kiristu tigpakaun kabisugan sa kada gamit hampay makatupad sa kay katungkulan bag-u ti buu bilug dumaka ag bumisug sa pagmahal.

Ti Bag-u pag Buhi sa kan Kiristu

¹⁷ Inda kang pagsabihun kang gid pag-ipalugus sa kanyu sa ngaran Panginuun magkun, danga yi kamu mag-ugali parihu sa manga tawu unman magsarig sa kan Kiristu, ud may pulus kanda pag-isipun.

¹⁸ Unman sida madunung mag-intindi dahil sa kanda ga ud may namuangan ag maganit waya kanda ulu. Nakan ud sida may kaparti sa buhi kay pag-ipakaun Diyus.

¹⁹ Nalagum sida sa kahalayan, udyi may kauyaan una wadi sa hintay, udyi sida may pagbuwatun mayad, nu unman pasay yi lang kahalayan.

²⁰ Balaw katunda kanyu nataw-an sa kan Kiristu.

²¹ Pinatingihan kabay niyu kay pag-iadal niya ag tinudluan yi kamu katutuuhanan tungkul sa kan Hisus.

²² Tayaki yi niyu kanyu daan pag ugali. Bul-a yi niyu kanyu daan pagkatawu mag-idamhak dahil sa daut pag kagustuhan naisipan.

²³ Pagbag-uha yi kanyu nalub-anan hanggan kanyu naisipan.

²⁴ Kailangan gamitun niyu kanyu bag-u pagkatawu ti linalang ga kay histuda Diyus, bag-u mag-akitan sa kanyu ti tutuu gid pag katadlungan sa kanyu lubus magpasakup sa Diyus.

²⁵ Nakan ngani ti kada usa sa kanyu pag-ampu sa kapudilan, parihu sa pagsabihun sa Banal Kasuratan magkun, “Ti kada usa kailangan pagbagaw katutuuhanan sa kay patar-ari.” Dahil kita tanan minsan kay manga gamit bilug ni Kiristu.

²⁶ Nu abi kamu magkagalit, danga subra hampay kamu balaw magkasala. Danga niyu pagpabay-ani danga pagpaaputan malambung kanyu galit.

²⁷ Ag danga pagpakan-i niyu rugar ti diyablu.

²⁸ Ti mananakaw danga yi magpakatakaw. Bagkus ngap pagpakasipag yi siya sa tarabahu, gamitun kay kamang sa una hintay pag buruwatun mayad hampay may miawat siya sa manga tawu may pangailangan.

²⁹ Danga kamu magbagaw daut, pag-isipa pirmi kanyu baragawun tunda ikamayad, insaktu sa kay udas, hampay makinabangan manga nakadnug.

³⁰ Danga pagpakan-i niyu karukuan ti Ispiritu Banal Diyus dahil siya yi ngani ti pinagkapirma Diyus sa kanyu, ti puruyba hampay kamu kay pagkilalan-un aban nu rumas-ug ti taning kaudasan nu kita kay yi iribri.

³¹ Bul-a yi niyu ti magkutub daut, ti pusuk yi pag isug hanggan ti galit. Danga kamu magpamarahak, una magpuya, danga yi may hamnu galit.

³² Bagkus ngap pagpakabuut kamu, pagmatugway kamu, pagparatawadan sa kada usa parihu sa kay nagpatawad Diyus sa kanyu dahil sa kan Kiristu.