Ipisu 3 - Hanunuu

Kay Pagsirbi ni Pablu sa manga Balaw Hudiyu

¹ Nakan magdarangin ngani aku sa kanyu, aku si Pablu ti napirisu dahil sa kan Kiristu Hisus tungkul sa kanyu sa manga balaw Hudiyu.

² Siguru naalaman yi niyu kuntay dahil sa mayad pag nalub-anan Diyus ipiniyar niya sa kangku inda pag katungkulan para sa kanyu pag kaayadan.

³ Ipinakilala Diyus sa kangku ti madalum pag katutuuhanan udwaya daan ipinaburayhaw ga kang yi isinurat sa kabag-u.

⁴ Sa kanyu magbasa inda maalaman niyu nu kabitay kang mag-intindi sa madalum pag katutuuhanan ni Kiristu.

⁵ Inda pag madalum pag katutuuhanan unman ipinaburayhaw sa manga tawu ati katpung kaybi pag udas. Dapat kainda kay ipinakilala yi Ispiritu Banal sa kay manga sakup niya, sa kay manga apustul, hanggan purupita.

⁶ Ag inda yi ngani ti madalum pag katutuuhanan magkun, nu sumarig sida sa Mayad pag Barita, ti manga balaw Hudiyu parihu diman waydi sa manga Hudiyu may kabahagi diman waydi sa manga papalad ginan sa Diyus. Ag sida hanggan manga gamit diman bilug ni Kiristu ag may kabahagi sa kay taratu Diyus kay tinupad sa kan Kiristu Hisus.

⁷ Sa kay mayad pag nabubut-un Diyus may binwat siya makamaskihan buwat sa kangku ag kay binwat aku manugtudlu Mayad pag Barita.

⁸ Sa tanan manga nasakup sa Diyus aku ti unman may kabuluhan. Dapat una katida nagustuhan diman niya ipakaun sa kangku inda pag buruwatun, hampay itudlu niku sa manga balaw Hudiyu ti Mayad pag Barita tungkul sa abunda ag dayi maaput naisipan pag papalad ginan sa kan Kiristu.

⁹ Pinili niya aku hampay iadal niku sa tanan tawu nu kabitay pag matupad ti paggayakun Diyus unman daan ipinaburayhaw niya. Inda kaybi di waya ginan unman gid ipinaalam Diyus, imaw ti naglalang tanan bagay.

¹⁰ Taynguna bay sa panab-anan iglisya gustu Diyus pagmipakilala sa manga pinunu ati sa langit ag sa manga may kapangyarihan ti unman may katabuhan pag kadunungan Diyus.

¹¹ Kaybi waya ginan daan di kay ginayak Diyus pag turunu kay ipinatupad kainda sa kanta Panginuun Kiristu Hisus.

¹² Dahil sa kanta pakiusa hanggan pagsarig sa kanya, marig-un kanta tagipusuun hampay unman may ampara sa kanta makapakarani sa Diyus.

¹³ Nakan ngani kang pagsabihun sa kanyu, danga malubay kanyu naisipan dahil sa kakurian kang pag-agwantahun tungkul sa kanyu. Inda nakan sa ikadayaw ngap niyu.

Kay Pagmahal ni Kiristu

¹⁴ Nakan ngani aku magluhud magdarangin sa atubangan Ama.

¹⁵ Siya ti Ama tanan sa langit hanggan sa babaw daga.

¹⁶ Maghagad aku sa Diyus angay sa kay kayamanan hanggan kamaskihan hampay parig-unun ag pabisugun Ispiritu kanyu tagipusuun,

¹⁷ hampay mangulian si Kiristu sa kanyu tagipusuun dahil sa kanyu magsarig sa kanya. Pag-idarangin diman niku kamu hampay manggamut ag rumig-un sa pagmahal,

¹⁸ hampay lubus makaya niyu masalman parihu sa tanan manga nasakup sa Diyus, nu kabitay kay kadaka ti pagmahal ni Kiristu, nu kabitay kay kaluang, kay kaaba, kay abwat hanggan kay kaabasad.

¹⁹ Magdarangin aku hampay masalman niyu ti pagmahal niya madi balaw maaput tawu naisipan, agud nu kabitay ti Diyus katida diman kamu.

²⁰ Ti Diyus gid ti makabuwat subra man sa tanan nita mahagad ag maisip, dahil kay kamaskihan tig hari sa kanta.

²¹ Sa Diyus ti kadayawan sa iglisya dahil sa kanta pakiusa sa kan Kiristu Hisus, sa kada sinulput tawu hanggan waya aban unman may katapusan. Amin.