Ipisu 2 - Hanunuu

Ginan sa Kamatayan Tabug sa Buhi

¹ Kamu pag manga patar-ari balaw Hudiyu, kaybi kamu manga tigbak dahil sa kanyu maglaban sa Diyus ag dahil sa kanyu kasalanan.

² Ati katpung nagsunud kamu sa daut pag palakaw kalibutan inda, napasirung kamu sa hari kadautan, sa kan Satanas, imaw tig hari sa manga tawu maglabag sa Diyus.

³ Kaybi kami pag manga Hudiyu minsan diman waydi sa manga maglaban sa Diyus, nag-ugali kami angay sa kagustuhan sadili pagkatawu, sinunud nimi ti daut pagkawilyan nimi bilug hanggan naisipan. Nakan angay sa kahamtangan nimi pagkatawu minsan kami sa tanan manga tawu pagkagalitan Diyus.

⁴ Dapat ay abunda gid kay awa Diyus ag daka gid kay pagmahal sa kanta.

⁵ Una kaybi kita manga tigbak dahil sa kanta paglaban sa Diyus, dapat binuhi niya kita kaibahan ni Kiristu. Naribri kamu dahil lang sa kay mayad nabubut-un Diyus.

⁶ Dahil sa kanta pakiusa sa kan Kiristu Hisus binuhi uman kita Diyus kaibahan ni Kiristu, pinatukaw kita kaibahan niya sa langit.

⁷ Binwat niya inda hampay sa pararas-ugun pag kaudasan maipakakit niya kay dayu makarkula pag abunda niya mayad nabubut-un sa kanta, sa manga niusa sa kan Kiristu Hisus.

⁸ Dahil lang sa mayad nabubut-un Diyus naribri kamu pagka kamu nagsarig sa kan Kiristu. Inda pag karibrihan kay ipinakaun Diyus sa kanyu, balaw kanyu sadili buwat.

⁹ Bukun dahil sa kanyu sadili manga buwat, nakan balaw waydi may ipadayaw-dayaw una si unu.

¹⁰ Kita hinuman Diyus niusa sa kan Kiristu Hisus hampay itigana nita kanta buhi bilug sa buruwatun mayad, imaw kay ihinanda Diyus kaybi waya ginan hampay kanta ugaliun.

Pinausa sa kan Kiristu

¹¹ Isipun niyu kanyu daan pag kahamtangan. Kamu inanak manga balaw Hudiyu. Pagkumnun kamu manga Hudiyu kuntay balaw tinuri. Inda pag manga Hudiyu pagkumnun manga tinuri angay lang sa kanda binwat sa kanda bilug.

¹² Pagdumdumun di niyu sa kaybi pag kausadan ati katpung mablagan kamu sa kan Kiristu, balaw minsan sa nasyun Israil, balaw sakup sa taratu una sa manga itinaratu Diyus. Kaybi magkabuhi kamu sa kalibutan unman may pagsarigan ag unman may Diyus.

¹³ Madi kamu kaybi arayu sa Diyus, dapat taynguna ipinakarani yi kamu sa panab-anan dugu ni Kiristu dahil sa kanyu magpakiusa sa kan Kiristu Hisus.

¹⁴ Pinausa niya kita sa usa kag sa usa. Kami manga Hudiyu ag kamu manga balaw Hudiyu pinausa niya kita. Pagka ipinakaun niya kay sadili bilug sa kamatayan, dinura niya ti kalagalitan ga alad batu nagbulag sa kanta sa usa kag sa usa.

¹⁵ Ti dinaut niya pag alad batu imaw ti Kasuguan, kaibahan ti manga sugu hanggan manga surundanun. Binwat niya inda hampay pag-usahun ti manga Hudiyu ag balaw Hudiyu, hampay magkarasundu yi ti duwa.

¹⁶ Sa panab-anan niya kamatayan sa kurus nab-ul niya ti kalagalitan manga Hudiyu ag manga balaw Hudiyu. Parihu kita ipinabalik niya sa Diyus, bag-u binuu niya kita usa yi lang ka bilug.

¹⁷ Nagsitay si Kiristu, itinudlu niya sa tanan tawu ti Mayad pag Barita tungkul sa kahusayan, sa kanyu manga balaw Hudiyu, ti arayu sa Diyus, hanggan sa manga Hudiyu, ti arani sa kanya.

¹⁸ Dahil sa kan Kiristu ti manga Hudiyu ag ti manga balaw Hudiyu parihu kita makapakarani sa Ama, dahil sa kanta pakiusa sa usa ka Ispiritu.

¹⁹ Nakan ngani, kamu pag manga balaw Hudiyu, balaw yi kamu day-uhan ngatay taga iba rugar, nu unman kasimanwa ngap manga pinili Diyus ag minsan sa kay magtal-anakan.

²⁰ Kita tanan, Hudiyu man ngatay balaw Hudiyu, kanta pinagkabungsudan ti manga apustul ag ti manga purupita. Dapat ti pinakamahalaga pag kalap si Kiristu Hisus.

²¹ Sa panab-anan niya nagkaraminsan ti kada kalap balay kay pagbuwatun ni Kiristu, hanggan sa udwaya mamhan ti balay kay itinigana hampay banal pag ulian Panginuun.

²² Dahil sa kanyu magpakiusa sa kanya, kamu hanggan ga manga kalap yi diman waydi sa panab-anan Ispiritu Banal hampay ulian Diyus.