Ipisu 1 - Hanunuu

¹ Inda ti may surat si Pablu, kay apustul ni Kiristu Hisus angay sa kagustuhan Diyus, tabug sa manga banal sa Ipisu, sa manga matinupadun sa kanda pakiusa sa kan Kiristu Hisus.

² Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu.

Manga Papalad Ispiritu

³ Pagpasalamat kita sa Diyus Ama nita Panginuun Hisu-Kiristu. Ipinakaun niya sa kanta ti tanan ipinapalad Ispiritu Banal sa langit dahil sa kanta magpakiusa sa kan Kiristu.

⁴ Udwaya nalalang ti kalibutan, daan kita pinili pinausa Diyus sa kan Kiristu hampay kita manga sakup yi Diyus ag udyi may ikasaway sa kay magbantay niya. Dahil sa kay pagmahal Diyus,

⁵ kita kay ihinanda daan hampay kay yi manga anak sa panab-anan ni Hisu-Kiristu. Imaw kay turunu kagustuhan Diyus.

⁶ Dayawun nita siya dahil sa makadululaw pag kaayadan kay ipinapalad niya sa kanta sa panab-anan niya pagmahalun pag Anak.

⁷ Irinibri kita ni Kiristu sa panab-anan niya dugu, ag pinatawad yi kanta manga kasalanan. Ungud gid makadululaw kay mayad pag nabubut-un Diyus,

⁸ lubus kay ipinakilala niya sa kanta. Pinakan-an niya kita kadunungan hanggan intindi,

⁹ hampay lubus maintindihan nita kay udwaya pinaburayhaw pag gayak niya.

¹⁰ Inda ngani pag ginayak Diyus pihu tupadun niya sa panab-anan ni Kiristu, nu rumas-ug ti taning pag kaudasan. Inda ngani kay gayak, usahun niya aban sa kan Kiristu ti tanan linalang sa langit una sa babaw daga.

¹¹ Dahil sa kan Kiristu, kami ti pinili Diyus ag ibinukud hampay kanya. Diyus ti nagbuwat tanan bagay angay sa kay turunu niya kagustuhan. Kainda kay turunu niya gayak,

¹² hampay kami pag manga Hudiyu ti un-an man sa kanyu nagsarig sa kan Kiristu sa lalu ikadayaw sa kanya.

¹³ Dahil sa kan Kiristu, kamu pag manga balaw Hudiyu nagpatingi sa tutuu pag barita Diyus, sa Mayad pag Barita imaw tigpakaun karibrihan. Dahil diman sa kan Kiristu kamu nagsarig sa Diyus. Nakan ngani ipinakaun Diyus sa kanyu ti Ispiritu Banal imaw kay itinaratu Diyus, bilang puruyba kuntay kamu pinili Diyus hampay kay yi manga sakup.

¹⁴ Ti Ispiritu ti ipinakaun sa kanta imaw kay puruyba tupadun Diyus kay manga taratu sa kanta, sa manga pinili niya, hampay dayu umalinlangan kita hanggan sa udwaya kita lubus miribri Diyus. Dayawun nita kay kadayawan!

Kay Darangin ni Pablu

¹⁵ Nakan ngani pagka nabaritaan niku kanyu pagsarig sa Panginuun Hisus hanggan kanyu pagmahal sa tanan manga nasakup sa Diyus,

¹⁶ balaw may apas kang pasalamat sa Diyus tungkul sa kanyu. Ag balaw magkalimtan niku kamu sa kang manga darangin.

¹⁷ Kang paghagadun sa Diyus nita Panginuun Hisu-Kiristu, sa makamaskihan pag Ama, hampay ipakaun niya sa kanyu ti Ispiritu Banal, imaw ti tumudlu sa kanyu ag pumakakit tungkul sa Diyus hampay makilala niyu siya.

¹⁸ Kang pag-idarangin kamu hampay marayawan kanyu naisipan hampay maalaman niyu kanta pag-asahan dahil sa kay pagbutung niya sa kanta. Kay ihinanda niya ti daka gid pag kaayadan sa tanan manga binanal,

¹⁹ hanggan kay unman may katapusan ag makamaskihan buwat niya sa kanta sa manga nagsarig sa kanya. Imaw diman pag kamaskihan

²⁰ ti nagbuhi uman sa kan Kiristu ginan sa kamatayan ag ti nagpakaun karampatan sa kanya hampay tumukaw baliwa sa sikun Diyus minsan sa kay maghari.

²¹ Nakan ngani ti tanan manga naminunu, manga may kangaranan, manga kamaskihan hanggan manga magpamahala, una sa babaw daga una sa langit, sa sirung di kamaskihan ni Kiristu. Subra kay ngaran ni Kiristu balaw lang ga iba ngaran, balaw lang sa taynguna hanggan sa paratabgan.

²² Ipinasirung Diyus sa kamaskihan ni Kiristu ti tanan manga bagay. Siya ti binwat pinagkaulu iglisya.

²³ Ti iglisya imaw ti pinagkabilug ni Kiristu. Siti pag ipinauli kay kalubusan ni Kiristu hampay aban udyi may masawad lunsay sakup yi sa kay kalubusan ni Kiristu.