Ipinakakit 9 - Hanunuu

¹ Pagka inyup ikalima pag anghil kay budyung, nakitan niku ti usa ka pamgasan nalagpak sa daga. Ipinakaun sa kanya ti susi pamukas sa kaabasad-basadan.

² Binukasan pamgasan ti kaabasad-basadan bag-u linmuwang ti anus nangagiw parihu ga sa tumpuk daka kay nanganus, nakan nagdulum ti init hanggan ti panungaan langit daga.

³ Naglinuwang ginan sa maanus ti manga apan nanlingatag sa daga. Pinakan-an sida kamaskihan parihu sa alutatip sitay sa babaw daga.

⁴ Ibinilin sa kanda danga pagdauta ti manga ilamnun, ti manga puun kayu una ti manga tanum. Tunda lang pag manga tawu ti unman may tanda Diyus sa kay bangas ti kanda pakurian.

⁵ Balaw pinayagan ti manga apan kuntay matya tunda pag manga tawu nu unman pakurian lang nida sa sulud lima ka bulan. Bilang ga kagat alutatip kay kasakit kay mag-asaydan manga tawu.

⁶ Sa sulud tunda pag lima ka bulan magpatigagad yi ti manga tawu sa kamatayan, dapat unman diman sida magkamatay. Gustu gid mana sida mamatay, dapat arayu waya ngap sida sa kamatayan.

⁷ Ti manga apan kay histuda parihu sa manga kabayu alistu pan-gira. Sida ga pinasangbawan gintu, parihu ga tawu kanda uyahun.

⁸ Ga buhuk babayi kanda bungut, parihu ga liyun kanda ngipun.

⁹ May takip kanda dubdub bilang yi baul pag panangga. Kay hagabur nida manga pakpak ga kabayu ga manga kalisa magkararadkadan mag-apura tag sa girahan.

¹⁰ Kanda ikug may kagat ga alutatip. Sa ikug nida ti kamaskihan panakit sa manga tawu sa sulud lima ka bulan.

¹¹ Ti anghil tigbantay sa kaabadbasadan imaw kanda hari. Sa bagaw Hibriyu kay ngaran Abadun, nu sa bagaw Giriyigu kay ngaran Apulyun, kay kahulugan pag ngaran manugdaut.

¹² Nakalawuy yi ti usa ka kahigpitan, duwa waya ti patabgan.

¹³ Pagka inyup ikan-um pag anghil kay budyung, nadnugan niku may magbagaw ginan sa manga suuk gintu pag harandugan sa atubangan Diyus.

¹⁴ Magkun siya sa ikan-um pag anghil may budyung, “Palpasi yi nimu ti upat ka anghil magapusan sa pangpang daka pag sapa Iyupratis.”

¹⁵ Pinalpasan yi ngani ti upat ka anghil agud matyun ti ikatlu pag bahagi manga tawu. Daan yi itinigana tunda pag upat ka anghil para ati katpung pag kaudasan aban una kay sirang, una kay bulan, una kay timpu.

¹⁶ May nagtultul sa kangku nu kabitay kay kayamu ti kagadhan masakyan sa manga kabayu, duwa ka gatus ka milyun.

¹⁷ Ipinakakit sa kangku nakan kang nakitan ti manga kabayu hanggan kay manga sakay may manga panangga marara ga apuy, malatuy ga sapiru, ag madilaw ga asupri. Ti ulu manga kabayu ga manga liyun. Ginan sa kay basad sulang pag linmuwang ti apuy, ti anus hanggan asupri.

¹⁸ Tunda pag tulu ka kakurian ti mumatay sa ikatlu pag bahagi manga tawu. Ti apuy ngani hanggan anus hanggan asupri magluwang ginan sa kanda basad sulang.

¹⁹ Ti kamaskihan manga kabayu ginan sa kay sulang hanggan sa kay ikug. Dahil kanda manga ikug parihu ga ulay may ulu imaw kanda paggamitun panakit.

²⁰ Ti nasawad pag manga tawu, tunda manga unman namatay sa siyun pag manga kahigpitan unman nida ainampu kanda kasalanan. Unman kanda tinayakan, unman waydi inapasan nida kanda pagsamba sa manga labang hanggan sa manga diyus-diyusan, sa binwat lang nida manga kamang, manga tawu-tawu gintu, pilak, galang, batu hanggan kayu, unman waydi makahiling, unman makadungug, unman diman makalakaw.

²¹ Unman ainampu nida kanda binwat kasalanan sa kanda manga maglibun, sa kanda magdaya, sa kanda magpanguragin hanggan sa kanda magtakaw.