Ipinakakit 8 - Hanunuu

Binukasan ti Ikapitu pag Kula

¹ Pagka binukasan Anak Karanidu ti ikapitu pag kula, lubus yi nap-ut ti tanan ingay sa langit manga tunga sa udas kay kadugay.

² Bag-u nakitan niku may pitu ka anghil matindugan sa atubangan Diyus, pinakan-an sida budyung ayaw-ayaw.

³ Usa waya ka anghil ti nagluwang may dara gintu pag sukadan kamangyan. Nagtuhung siya sa arani gintu pag harandugan turuuban kamangyan. Pinakan-an siya mayamu pag kamangyan hampay tuubun sa gintu pag turuuban sa atubangan tukawan hari, dungan ti darangin manga tawu napasakup sa Diyus.

⁴ Bag-u ginan sa kamang anghil nagtalimbuuk sa atubangan Diyus ti anus kamangyan dungan sa darangin manga tawu napasakup sa Diyus.

⁵ Bag-u nagbuul ti anghil manga baga ginan sa turuuban, isinukad niya sa sukadan kamangyan bag-u kay ayinmut tag sa babaw daga. Bigla naglinti nanlilitikan, inmingay, kinmilat bag-u linminug.

Ti manga Budyung

⁶ Nag-alistu ti pitu ka anghil hampay uypun kanda manga budyung.

⁷ Pagka inyup usa ka anghil kay budyung, nag-uran yilu hanggan apuy may lakut dugu. Nairub kay ikatlu pag bahagi daga, tapil ti ikatlu pag bahagi manga puun kayu hanggan ti tanan ilamnun malangba nairub.

⁸ Pagka inyup ikadwa pag anghil kay budyung nidugsak sa dagat ti ga bantud laun malabdaban. Nagbaliw yi dugu kay ikatlu pag bahagi dagat.

⁹ Tigbak yi ti ikatlu pag bahagi manga linalang sa dagat, nadaut waydi ti ikatlu pag bahagi manga sakayan sa dagat.

¹⁰ Pagka inyup ikatlu pag anghil kay budyung, nalagpak ginan sa langit ti daka pag pamgasan, maglabdab parihu sa sulu, nalagpak sa ikatlu pag bahagi manga sapa hanggan bulbugan.

¹¹ Inda pag pamgasan kay ngaran Kapaitan. Nagpait yi ti ikatlu pag bahagi danum. Mayamu pag tawu ti namatay pagka nakainum siti pag danum.

¹² Pagka inyup ikap-at pag anghil kay budyung, nadaut ti ikatlu pag bahagi init, bulan hanggan manga pamgasan, nakan ti ikatlu pag bahagi nida karayawan madlum yi. Nakan nagdulum yi ngani ti ikatlu pag bahagi sirang, unman waydi may rinmayaw sa ikatlu pag bahagi yabi.

¹³ Bag-u nakitan niku ti usa ka agila maglayang sa tungud. Nadnugan niku siya nagbagaw daka magkun, “Masyadu yi lang madala ti malakawan tanan tawu magkabuhi sa babaw daga sa tunug manga budyung nu uypun tulu waya ka anghil.”