Ipinakakit 7 - Hanunuu

Pagtandaan Anghil ti manga Linahi Israil

¹ Tunda ginan may nakitan maan aku upat ka anghil. Sida upat nagtimbangan sa bilug kalibutan. Inampara nida ti upat ka puun durus hampay unman dapu humuyup sa daga, sa dagat una hanggan sa naan pag puun kayu.

² Bag-u nakitan niku ti usa waya ka anghil nag-atag tungud baliwa sa butlakan init, may bitbit siya pananda ginan sa Diyus buhi. Nagbagaw siya daka sa upat ka anghil sa pinakan-an Diyus kamaskihan mandaut sa daga hanggan sa dagat magkun,

³ “Danga niyu dapu pagdauta ti daga hanggan dagat una ti manga puun kayu hanggan sa udwaya matandaan ti manga panawuhun nita Diyus sa kanda bangas.”

⁴ May nagtultul sa kangku nu kabitay kay kayamu ti manga tarandaan. Usa ka gatus may upatpulu may upat ka libu tawu ginan sa tanan linahi Israil ti tarandaan.

⁵ Sa kada linahi Israil sampulu may duwa ka libu ti tarandaan, sa lahi ni Huda, sa lahi ni Rubin, sa lahi ni Gad,

⁶ sa lahi ni Asir, sa lahi ni Niptali, sa lahi ni Manasis,

⁷ sa lahi ni Simyun, sa lahi ni Libi, sa lahi ni Isakar,

⁸ sa lahi ni Sabulun, sa lahi ni Husi hanggan sa lahi ni Binhamin.

Ti Kayamu-yamuan Kagadhan Tawu

⁹ Bag-u nakitan maan niku ti kayamu-yamuan kagadhan tawu dayi matabu mabilang una waya sitapu pag tawu. Sida ginan sa kada nasyun, sa kada linahi, sa kada histuda tawu, sa tanan kalasi pamagaw. Matindugan sida sa atubangan tukawan hari hanggan Anak Karanidu. Nakarutay sida manga malagti may bitbit sida panwasawas.

¹⁰ Durunganan sida nagbagaw daka magkun, “Ti gimpuunan karibrihan ginan sa kanta Diyus sa nakatukaw sa tukawan hari hanggan ginan sa Anak Karanidu.”

¹¹ Nagtinindug ti tanan manga anghil manga nakatindug sa kay sangput tukawan hari, manga gurangun hanggan upat ka linalang may buhi. Napadapa sida sa atubangan Hari, nagsamba sida sa Diyus.

¹² Magkun sida, “Amin, sa kanta Diyus ti kapurihan, ti kadayawan, ti kadunungan, ti pasalamat, ti paggalang, ti kamaskihan, ti kabisugan hanggan waya aban. Amin.”

¹³ Pinaingana aku usa ka gurangun ati sa arani tukawan hari magkun, “Si unu tunda pag manga tawu ti may rutay malagti, naan ginan nguna sida?”

¹⁴ Kang sagut magkun, “Tau duy, kawu ngap ti katanda.” Sinabi niya sa kangku magkun, “Sida ti nakalapus sa mahigpit pag unu-unu, linumpiyu nida kanda rutay linagti sa dugu Anak Karanidu.

¹⁵ Nakan ngani sida sa atubangan tukawan Diyus ag magsirbi sa kanya sirang yabi sa kay balay. Ti nakatukaw sa tukawan hari tig-ukub sa kanda hampay udyi may mangyari sa kanda.

¹⁶ Balaw yi sida lun-usun, unman yi uwawun. Balaw yi sida mainitan, balaw yi sida ga magkapalian init.

¹⁷ Dahil ti Anak Karanidu sa karaw-an tukawan hari tig-alaga sa kanda. Sida ibahan niya sa manga bulbugan gimpuunan buhi. Payidan Diyus kanda luwa sa kanda manga mata.”