Ipinakakit 5 - Hanunuu

Ginamit Anak Karanidu ti Kasuratan Malulunan

¹ Bag-u may nakitan aku sa sikun pag kamang Hari sa kay tukawan ti usa ka kasuratan malulunan may surat sa sulud hanggan sa luwas, siniradu pitu ka kula.

² Nakitan niku ti usa ka mamaski pag anghil nagpahayag daraka pag bagaw magkun, “Hintay ti may karampatan magbuul kay kula bag-u magbukas kasuratan?”

³ Una hintay pag tawu sa langit una sa babaw daga una sa sirung daga unman may makabukas kasuratan, unman waydi may makaduaw kay sulud.

⁴ Aku naglumi gid masyadu, dahil unman may nakitan tawu may karampatan magbukas kasuratan ag magduaw kay sulud.

⁵ Bag-u nagsabi ti usa sa manga gurangun sa kangku magkun, “Danga duy maglumi. Ti Liyun sa lahi ni Huda, ti mamaski pag linahi ni Dabid imaw ti nanalu nakan siya ti makabukas kasuratan ag makabuul kay pitu ka kula.”

⁶ Bag-u may nakitan aku usa ka Anak Karanidu sa karaw-an tukawan hari, sa kay sangput ti upat ka linalang may buhi hanggan ti manga gurangun. Ti Anak Karanidu ga anyu minatay. May pitu ka sungay siya may pitu waydi ka mata, imaw ti pitu ka Ispiritu Diyus kay sinugu tag sa bilug kalibutan.

⁷ Nagpakarani ti Anak Karanidu bag-u kay ginamit ti kasuratan malulunan ginan sa sikun pag kamang Hari sa kay tukawan.

⁸ Pagka kay bin-ul, napadapa sa atubangan Anak Karanidu ti upat ka linalang may buhi hanggan ti duwapulu may upat ka gurangun. Ayaw-ayaw sida may bitbit alpa ag may pinggan gintu malukung punu kamangyan, imaw ti manga darangin manga tawu napasakup sa Diyus.

⁹ Nagkanta sida inda pag bag-u kanta magkun, “Kawu ti may karampatan magbuul sa kasuratan malulunan ag magbukas kay manga kula, dahil kawu ti minatay ag dahil sa kanmu dugu may linukat kawu manga tawu ginan sa kada linahi, pamagaw, banwa ag nasyun hampay sida manga sakup yi Diyus.

¹⁰ Binwat nimu sida usa ka linahi hari, ag manga manughandug magsirbi sa balay nita Diyus. Sida humari sa babaw daga.”

¹¹ Nagbantay maan aku bag-u nadnugan niku ti bagaw linibu-libu kagadhan anghil matindugan sa sangput tukawan hari hanggan upat ka linalang may buhi hanggan manga gurangun.

¹² Magkarantahan ti manga anghil magkun, “Ti Anak Karanidu ti minatay, nakan siya ti may karampatan makatanggap kamaskihan, kayamanan, kadunungan hanggan kabisugan, paggalang, kadayawan hanggan kapurihan.”

¹³ Nadnugan niku magkarantahan ti tanan manga linalang una sa langit una sa babaw daga una sa sirung daga hanggan sa dagat, tanan-tanan manga linalang sa bilug kalibutan magkun. “Sa hari nakatukaw sa kay tukawan hanggan sa Anak Karanidu, sa kanda yi ti kapurihan, ti paggalang, ti kadayawan hanggan kamaskihan hanggan waya aban.”

¹⁴ Ti upat ka linalang may buhi nagbagaw magkun, “Amin.” Napadapa ti manga gurangun nagsamba.