Ipinakakit 4 - Hanunuu

Pagsambahun ti Diyus sa Langit

¹ Bag-u tuhay maan kay ipinakakit Diyus sa kangku. Nakitan niku sa langit ti usa ka sabian mabukasan. Nadnugan maan niku ti matnug pag bagaw ga budyung kay kadaka kay tunug magkun, “Pag-atay tag kawu sa tungud hampay kang ipakakit sa kanmu ti manga bagay mangyari aban.”

² Kadaka sinuldan aku Ispiritu Banal bag-u nakitan niku sa langit ti usa ka tukawan hari ag nakitan diman niku may matukawan siyun.

³ Kay uyahun masilaw ga mahalaga pag batu, ga haspi ag kurnalina. Sa kay sangput tukawan hari may usa ka balangaw malatuy ga batu ismiralda.

⁴ Sa kay sangput diman tukawan hari pag nakitan niku ti duwapulu may upat ka tukawan takinan. May duwapulu may upat ka takinan ti matukawan siyun. May manga sulung sida malagti pag rutay ag pinasangbawan gintu pag manga sangbaw.

⁵ Ginan sa tukawan hari magluwang ti manga kilat, ti manga linti hanggan magkurarug. Sa atubangan tukawan hari may pitu ka sulu magduag. Inda imaw ti pitu ka Ispiritu Diyus.

⁶ Siyun diman sa atubangan tukawan hari may ga dagat, kay histuda ga bubug pag salamin kay pagkasnag. Sa atubangan tukawan hari hanggan sa kay sangput may upat ka linalang may buhi, pudu mata sa kay sarangwan hanggan sa kay dayu.

⁷ Parihu ga liyun kay histuda ti usa, bag-u kay ikadwa ga baka, bag-u kay ikatlu ga tawu kay uyahun, bag-u kay ikap-at maglayang parihu sa agila.

⁸ Tigtigun-um ka pakpak ti upat ka linalang may buhi, lipus mata sa kanda buu bilug. Unman may apas sida magkanta sirang yabi magkun, “Banal, banal, banal ti Panginuun Diyus Makamaskihan sa tanan. Ti Diyus kaybi ginan hanggan taynguna hanggan waya aban.”

⁹ Katunda ngani ti upat ka linalang may buhi kanda magdayaw, maggalang hanggan magpasalamat sa hari magtukaw sa tukawan, imaw ti may buhi unman may katapusan.

¹⁰ Sa kanda katpung magdayaw ti duwapulu may upat ka takinan napadapa sa atubangan tukawan hari, kanda pagsambahun ti matukawan siyun, ti may buhi unman may katapusan. Pag-ibugtang nida sa atubangan tukawan hari kanda manga sangbaw magkun,

¹¹ “Panginuun, kawu kanmi Diyus, kawu ti dapat makatanggap kadayawan, paggalang hanggan kamaskihan. Dahil kawu ti naglalang sa tanan manga bagay, ag angay diman sa kanmu kagustuhan linalang nimu sida.”