Ipinakakit 3 - Hanunuu

Surat tabug sa Iglisya sa Banwa Sardis

¹ “Isurat nimu inda para sa anghil magbantay sa iglisya sa banwa Sardis: “Inda ti magsabi imaw yi ngani ti may pitu ka Ispiritu Diyus hanggan pitu ka pamgasan: Alam diman waydi niku kanmu pagbuwatun. Nu sa magbantay manga tawu kawu buhi dapat nu sa ungud kawu ga tigbak yi.

² Pag-imata yi kawu, kabisug maan kanmu manga buwat mayad nasawad waya sa kanmu hampay balaw dumayun mamatay. Nakitan niku udwaya kang-ud ti manga nabuwat nimu sa atubangan niku Diyus.

³ Pag-isip-isipa gid nimu nu kabitay nimu natanggap ti kanmu nadnugan pag manga tudlu. Tupada nimu tida. Ampui yi patlikudi yi kanmu buwat kadautan. Nu unman kawu mimata, asan tag aku parihu ga mananakaw. Unman nimu alam ti udas niku pagras-ug sa kanmu.

⁴ Dapat una katida, may imaw waya pira ka tawu asan sa Sardis manga maaman, malumpiyu di kanda rutay, nakan sida aban pirmi kaibahan niku may sulung rutay malagti, dahil sida ti may karampatan.

⁵ Ti manalu pag tawu imaw ti makasulung rutay malagti. Dayu bul-un niku kay ngaran ginan sa ribru kabuhian. Magkakilala niku siya sa atubangan niku Ama hanggan sa atubangan niya manga anghil.

⁶ “Ti may tuli kailangan pagpatingi sa pagsabihun Ispiritu sa manga iglisya.

Surat tabug sa Iglisya sa Banwa Piladilpiya

⁷ “Isurat nimu inda para sa anghil magbantay sa iglisya sa banwa Piladilpiya: “Inda ti magsabi imaw yi ngani ti banal ag masarigan, ti may bitbit susi ni Hari Dabid. Nu siya ti nagbukas unman may makasiradu. Unman waydi may makabukas nu siya ti nagsiradu:

⁸ Alam niku kanmu manga buwat. Binukasan niku ti usa ka sabian sa kanmu katpungan. Unman may makasiradu tunda pag sabian. Alam niku diit diit lang kanmu kaya dapat sinunud nimu kang itinudlu ag unman nimu ipinaulam kanmu pagsarig sa kangku.

⁹ Malu, ti manga sakup ni Satanas manga magpabalhinguun kuntay sida Hudiyu dapat bukun waydi Hudiyu, manga pudilun lang. Paludhun niku sida sa kanmu atubangan, bag-u maalaman nida kawu kang gid pagmahalun.

¹⁰ Ingatan diman niku kawu nu rumas-ug yi ti udas pagsubuk sa tanan manga tawu sa bilug kalibutan, dahil nag-agwanta kawu sa kanmu pagtupad sa kang bilin.

¹¹ Rumas-ug yi aku madali, ingatan nimu ti kaayadan kanmu tinanggap hampay unman may umagaw sa kanmu pirimyu pag sangbaw.

¹² Ti manalu pag tawu buwatun niku ga usa ka tulduk sa balay niku Diyus, dayi ayitun siya ati ginan hanggan waya aban. Iguhit niku sa kanya ti ngaran niku Diyus hanggan ti ngaran banwa niku Diyus, imaw ti bag-u Hirusalim ti dumugsun ginan sa langit, ginan sa kang Diyus. Iguhit diman niku sa kanya kang bag-u pag ngaran.

¹³ “Ti may tuli kailangan pagpatingi sa pagsabihun Ispiritu sa manga iglisya.

Surat tabug sa Iglisya sa Banwa Laudisiya

¹⁴ “Isurat nimu inda para sa anghil magbantay sa iglisya sa banwa Laudisiya: “Inda ti magsabi imaw yi ngani ti pag-ingarnan si Amin, imaw ti tutuu masarigan pag manugpadakit. Siya ti gimpuunan tanan linalang Diyus:

¹⁵ Alam niku kanmu manga pagbuwatun. Alam niku unman kawu maramig, unman diman mainit. Mahal mana nu kawu maramig una mainit.

¹⁶ Dapat kawu maalinabnab, kang yi isuka kawu, dahil unman kawu mainit, unman diman waydi kawu maramig.

¹⁷ Pagsabihun nimu kuntay kawu mayaman, unman may kurang, may kang-ud kawu sa tanan bagay. Dapat unman nimu alam anung anung kaawaawa kawu masyadu, kapugrihan yi, ga lilus yi ag buta waya kawu.

¹⁸ Nakan ngani kang pagsabihun sa kanmu, pagbili kawu sa kangku lunsay yi pag gintu hampay kawu ungud gid yumaman. Pagbili diman waydi kawu malagti pag rutay hampay kawu may isulung, udyi kawu mangay-a sa kanmu pagkalilus. Pagbili waydi pamulung sa mata hampay kawu kumakit maan.

¹⁹ Ti kada tawu kang pagmahalun kang waydi pagtadlungun hanggan pagpariganan. Nakan ngani pagmasipag kawu, ampui yi patlikudi yi kanmu kasalanan.

²⁰ Pagbantay kawu, matindugan aku sa dayu sabian, magtaragham. Nu may makadnug sa kang bagaw bag-u nu bukasan niya ti talakup sabian, aku sumaka. Bag-u sumaru aku sa kanya ag sumaru waydi siya sa kangku.

²¹ Ti manalu pag tawu imaw ti makatukaw sa kang arani minsan sa kang karampatan maghari parihu diman waydi sa kangku. Dahil aku nanalu nakan matukawan aku kainda sa arani niku Ama minsan sa kay karampatan maghari.

²² “Ti may tuli kailangan pagpatingi sa pagsabihun Ispiritu sa manga iglisya.”