Ipinakakit 22 - Hanunuu

¹ Ipinakakit diman anghil sa kangku ti usa ka sapa kay danum makapakaun tutuu pag buhi sa tawu. Tunda pag sapa kay danum malindag parihu sa bubug. Kay bulbugan ginan sa tukawan Diyus hanggan Anak Karanidu. Bag-u magbulus sa karaw-an karsada banwa.

² Baliw-baliw dipay sapa may puun kayu, kay burak makapakaun tutuu pag buhi sa tawu. Bulan-bulan magburak. Kay manga labung magpaayad sa sakit manga nasyun tawu.

³ Naparaw yi ati una hintay pag isinaad Diyus. Siyun gid sa banwa kay tukawan Diyus hanggan Anak Karanidu. Magsirbi sa kanya kay manga suruguun.

⁴ Makitan nida kay uyahun ag misurat kay ngaran sa kanda manga bangas.

⁵ Ati udyi may yabi, udyi may kailangan sida sulu una rayaw init, dahil ti Panginuun Diyus tigrayaw sa kanda ati. Humari sida unman may katapusan.

Rumas-ug si Hisus

⁶ Bag-u sinabi anghil sa kangku magkun, “Masarigan ag tutuu inda pag manga bagaw. Ti Panginuun Diyus, ti nag-udyuk sa naisipan manga purupita, imaw diman ti nagsugu sa kay anghil hampay ipakakit sa kay manga suruguun ti manga udyi dugay mangyari yi aban.”

⁷ Magkun si Hisus, “Pagpatingi kamu, rumas-ug yi aku udyi dugay. Papaladan Diyus ti tawu magtupad sa manga ipinurupita nisurat sa inda pag ribru.”

⁸ Aku si Huwan imaw ti nakadnug ag nakakit sa tanan-tanan inda. Pagka nadnugan ag nakitan niku tunda tanan-tanan, napadapa aku sa atubangan anghil hampay sambahun niku siya dahil siya ti nagpakakit sa kangku tunda.

⁹ Dapat sinabi niya sa kangku magkun, “Danga duy, aku hanggan suruguun parihu sa kanmu, parihu sa kanmu manga patar-ari manga nagpurupita, parihu diman sa tanan manga magpaniwala sa manga bagaw nisurat sa inda pag ribru. Sambahun nimu ti Diyus.”

¹⁰ Sinabi waya niya sa kangku, “Danga nimu pagsiraduha ti manga ipinurupita nisurat sa inda pag ribru, dahil arani yi ti taning pag kaudasan.

¹¹ Ti daut pag tawu pagpadayun yi lang sa kay kadautan, ti mayagting pag tawu pagpadayun yi lang sa kay kayagtingan. Dapat ti mayad pag tawu pagparargu sa kay kaayadan, katunda diman ti tawu napasakup sa Diyus, pagparargu sa kay pagpasakup.”

¹² Sinabi ni Hisus magkun, “Pagpatingi kamu, magkaras-ug yi aku, may dara kang manga pirimyu kang ipakaun sa kada tawu angay sa kay binwat.

¹³ Aku ti Alpa ag ti Umiga, aku ti sa kabag-u, aku diman ti sa katapusan. Aku ti umpisa, aku diman ti masawad.”

¹⁴ Papaladan Diyus ti maglumpiyu kanda manga rutay, pakan-an sida karampatan hampay makakaun burak kayu makapakaun tutuu pag buhi ag hampay makasulud sa banwa lakaw sa kay manga puwirtahan.

¹⁵ Dapat matayak sa luwas banwa ti manga daut pag tawu, ti manga magsarig sa kapangyarihan ni Satanas, ti manga magpanguragin, ti manga maglibun tawu, ti manga magsamba sa diyus-diyusan, ti tanan magbaya sa maradaya hanggan ti manga magdaya.

¹⁶ “Aku si Hisus ti nagsugu sa kang anghil hampay ipakilala inda pag manga bagay sa kanyu sa ikarig-un manga iglisya. Aku ginan sa linahi ni Dabid, aku ti masnag pag kuramnag.”

¹⁷ Pagsabihun Ispiritu hanggan aguman babayi magkun, “Pagsitay yi gid duy kawu.” Ti tanan nakadnug inda pagsabi waydi, “Pagsitay yi gid kawu.” Una si unu ti magkauwaw pagpakarani, pagbuul danum makapakaun tutuu pag buhi. Pakan-an diman siya unman may bayad.

Katapusan yi Ribru

¹⁸ Aku si Huwan ti magbilin mahigpit una sa kantapu pag tawu makadnug sa ipinurupita nisurat sitay pag ribru. Nu may tawu magdagdag sa bagaw nisurat sitay pag ribru, una may parusa dugangan waya Diyus manga kahigpitan nisurat sitay.

¹⁹ Nu may tawu magbawas sa manga bagaw ipinurupita nisurat sitay pag ribru, bul-an diman siya Diyus karampatan sa manga nisurat sitay pag ribru. Dayu siya makakaun burak kayu kabuhian, dayu waydi siya makasulud sa Banal pag Banwa.

²⁰ Magsabi ti nagpaburayhaw sa tanan inda magkun, “Pihu gid ngani rumas-ug yi aku udyi dugay.” Amin, Panginuun Hisus, pagsitay yi duy kawu.

²¹ Ti tanan tawu napasakup sa Diyus kang pag-idarangin hampay papaladan sida Panginuun Hisus.