Ipinakakit 21 - Hanunuu

May Bag-u pag Langit hanggan may Bag-u pag Daga

¹ Bag-u nakitan niku may bag-u pag langit hanggan may bag-u pag daga. Naparaw yi ti daan pag langit hanggan daan pag daga, naparaw yi waydi hanggan ti dagat.

² Nakitan niku ti Banal pag Banwa, imaw ti bag-u pag Hirusalim, magpakababa ginan sa langit, ginan sa Diyus, parihu ga babayi kalasalun, lubus alistu magsulang sa kay arasawan-un pag lalaki.

³ Nadnugan niku may nagbagaw daka ginan sa tukawan hari magkun, “Taynguna kay ulian Diyus sa karaw-an yi manga tawu. Mangulian siya kaibahan yi nida ag sida kay yi nasyun. Ti Diyus sa kanda yi karaw-an ag siya kanda yi Diyus.

⁴ Payidun niya ti manga luwa tanan tawu, udyi may kamatayan, una kakurian, udyi may maglumi, udyi waydi may sakit. Dahil naparaw yi ti daan pag manga kabagayan.”

⁵ Bag-u nagbagaw ti matukawan sa tukawan hari magkun, “Taynguna buwatun niku ti bag-u pag manga bagay.” Kay sinabi waya niya sa kangku magkun, “Isurat nimu pagkumun, masarigan ag tutuu inda pag manga bagaw.”

⁶ Sinabi waya waydi niya sa kangku magkun, “Kang-ud tinupad yi. Aku ti Alpa ag ti Umiga, aku ti umpisa aku diman ti masawad. Una si unu ti magkauwaw pakan-an niku karampatan hampay makainum danum unman may bayad ginan sa bulbugan gimpuunan buhi.

⁷ Inda ti matanggap tawu nu manalu. Aku yi ti Diyus niya, siya kang yi waydi gid anak.

⁸ Dapat makuri masyadu ti malakawan manga madalain, manga unman nagsarig sa Diyus, manga magkadara sa daut pag kahalayan, manga maglibun sa kay kaparihu tawu, manga uragin, manga magsarig sa kapangyarihan ni Satanas, manga magsamba sa diyus-diyusan hanggan tanan pag manga pudilun. Iyamut sida sa malabdaban danaw apuy asupri, tida imaw ti ikadwa pag kamatayan.”

Ti Bag-u pag Hirusalim

⁹ Nagpakarani sa kangku ti usa ka anghil kabilang sa pitu ka anghil may bitbit pinggan malukung ayaw-ayaw, kada pinggan punu pangatapusan pag kahigpitan. Bag-u nagbagaw sa kangku tunda pag anghil magkun, “Abala duy kawu, ipakakit niku sa kanmu ti aguman babayi, imaw ti arasawan-un Anak Karanidu.”

¹⁰ Nasakup aku Ispiritu Banal bag-u dinara aku anghil tag sa pinakaabwat ag daka pag bantud. Ipinakakit niya sa kangku ti Banal pag Banwa Hirusalim magpakababa ginan sa langit, ginan sa Diyus.

¹¹ Sa kanya yi ti kadayawan Diyus. Masilaw ti banwa parihu ga manga mahalaga pag batu haspi, masnag ga bubug.

¹² Sinangput alad batu ti banwa madamul ag abwat, may sampulu may duwa ka puwirtahan. Ti kada usa ka puwirtahan may bantay di anghil. May surat ti manga puwirtahan manga ngaran sampulu may duwa ka linahi ni Israil.

¹³ Tig-tigutlu kay puwirtahan, tulu sa butlakan baliwa, tulu sa kanaway baliwa, tulu sa salatan baliwa, tulu waydi sa isalpan baliwa.

¹⁴ Ti alad batu sa sangput banwa may sampulu may duwa ka patakinan pag batu. May surat ti kada usa ka patakinan pag batu, tigus-a ka ngaran sampulu may duwa ka apustul Anak Karanidu.

¹⁵ Ti anghil ti nagbagaw sa kangku may bitbit gintu pag panukat hampay sukatun ti banwa, ti manga puwirtahan hanggan kay alad batu.

¹⁶ Nikana ti banwa kudradu, nu kabitay kay kaaba imaw diman waydi kay kaluw-ang banwa. Sinukat anghil ti banwa, duwapulu may upat ka libu ka kilumitru kay kaaba katunda diman kay kaluw-ang ag kay abwat.

¹⁷ Sinukat diman niya ti alad batu. 144 ka luk-an siku kay abwat inda, angay sa bitbit anghil pag panukat ga tawu diman gamit pag panukat.

¹⁸ Haspi pag batu ti binwat alad. Ti buu banwa lunsay yi gintu, masnag parihu sa bubug.

¹⁹ Pinaulian tanan kalasi mahalaga pag manga batu ti manga patakinan alad batu. Haspi kay usa, sapiru kay ikadwa, kalsidunya kay ikatlu, ismiralda kay ikap-at,

²⁰ unisi kay ikalima, kurnalina kay ikan-um, kirisulitu kay ikapitu, birilu kay ikawalu, tupas kay ikasiyam, kirisuprasu kay ikasampulu, hasintu kay ikasampulu may usa ag amatista kay ikasampulu may duwa.

²¹ Batu sa manlut ti binwat kay sampulu may duwa ka puwirtahan. Tigus-a ka batu sa manlut kang-ud sa kada puwirtahan. Ti karsada sa sulud banwa lunsay yi gintu, masnag parihu sa bubug.

²² Unman may nakitan aku Balay Diyus sa banwa. Dahil ti Panginuun Diyus makamaskihan sa tanan hanggan ti Anak Karanidu imaw ti pinakasimbahan ati.

²³ Udyi may kailangan init una bulan hampay rayawan ti banwa dahil ti kadayawan Diyus tigparayaw ati, ti Anak Karanidu ti sulu.

²⁴ Ginan sa rayaw banwa pag marayawan ti tanan nasyun tawu. Ati diman tag pag daran-un manga hari sa babaw daga kanda kayamanan.

²⁵ Udyi gid may saradu ti manga puwirtahan banwa dahil unman yi may yabi.

²⁶ Daran-un tag sa banwa ti kayamanan hanggan paggalang manga nasyun.

²⁷ Dapat unman may makasulud ati una hintay pag manga bagay mayagting sa kay magbantay Diyus, una hintay tigbuwat kahalayan, una ti manga magpudil unman gid sumulud. Tunda lang pag manga tawu ti makasulud ati ti nakasurat kanda manga ngaran sa ribru kabuhian. Anak Karanidu kay apu tunda pag ribru.