Ipinakakit 20 - Hanunuu

Ti Usa ka Libu ka Timpu

¹ Bag-u nakitan niku ti usa ka anghil magpakababa ginan sa langit, may bitbit laun pag tarikada hanggan susi paniradu sa kaabasad-basadan.

² Dinuksulan niya ti daragun, imaw ti gurangun pag ulay, siya diman hanggan ti pagkumnun diyablu, kay usa ka ngaran si Satanas. Ginapus siya anghil sa sulud usa ka libu ka timpu.

³ Ayinmut siya tag sa kaabasad-basadan bag-u tinalakpan ag sinusihan anghil hampay udyi siya makaluwang ag udyi makadaya sa manga nasyun tawu hanggan sa udwaya matapus ti usa ka libu ka timpu. Nu makalawuy ti usa ka libu ka timpu, palpasan maan siya ngalay-ngalay lang.

⁴ Nakakit aku may manga tukawan hari. Ti manga nakatukaw ati pinakan-an karampatan hampay pumihu sa daut sa mayad. Nakitan diman niku ti karadwa manga tawu pinugutan ulu dahil sa kanda magsarig sa kan Hisus hanggan sa kanda magpadakit Bagaw Diyus. Unman nagsamba sida sa hayup malangas una sa kay tawu-tawu. Unman sida nagtanggap manga marka hayup malangas sa kanda bangas una sa kanda kamang. Binuhi sida hampay maghari kaibahan ni Kiristu sa sulud usa ka libu ka timpu.

⁵ Inda ti un-an pagkabuhi uman ginan sa kamatayan. Pagka nakalawuy ti usa ka libu ka timpu binuhi diman uman ti manga iba pag manga namatay.

⁶ Masulung ag lubus sakup sa Diyus ti nidungan sa un-an pagkabuhi uman ginan sa kamatayan. Udyi may laban sa kanda ti ikadwa pag kamatayan. Sida aban ti manga manughandug yi sa atubangan Diyus hanggan sa atubangan ni Kiristu, humari sida kaibahan niya sa sulud usa ka libu ka timpu.

Talu yi si Satanas

⁷ Nu makalawuy ti usa ka libu ka timpu, palpasan maan si Satanas ginan sa kay pirisuhan.

⁸ Lumuwang siya hampay dayaun niya ti manga nasyun tawu sa bilug kalibutan, ti manga taga Gug hanggan taga Magug. Tipunun sida ni Satanas hampay maglaban sa gira. Parihu kay kagadhan ga taypuk baras sa baybay dagat kay kayamu.

⁹ Nangalat sida sa bilug kalibutan bag-u pinalibutan nida ti kampu manga tawu napasakup sa Diyus hanggan ti pagmahalun niya pag banwa. Dapat linmuwang ginan sa langit ti apuy bag-u naayum yi sida.

¹⁰ Bag-u ti diyablu ti nagdaya sa kanda iyinmut tag sa malabdaban danaw apuy asupri. Ati diman pag iyinmut ti hayup malangas hanggan ti pudilun pag purupita. Mirinsan sida pakurian sirang yabi hanggan waya aban unman may katapusan.

Ti Pangatapusan pag Parusa

¹¹ Bag-u nakitan niku ti laun pag malagti pag tukawan hari hanggan ti matukawan siti. Naparaw sa kay atubangan ti daga hanggan langit, udyi maan nakitan uman.

¹² Nakitan niku matindugan sa atubangan tukawan hari ti manga namatay, manga may kangaranan ag manga unman. Bag-u binuklad ti manga ribru. Binuklad ti usa waya ka ribru, imaw ti ribru kabuhian. Pinila ti manga matadlung ginan sa manga balaw matadlung angay sa kanda manga binwat parihu sa isinurat sa manga ribru.

¹³ Idinagsa dagat ti manga namatay siyun. Ipinalwang kamatayan hanggan ulian manga karadwa ti manga tawu namatay ag iinintirga siyun. Pinila ti manga matadlung ginan sa manga balaw matadlung angay sa kanda manga binwat.

¹⁴ Bag-u ayinmut tag sa danaw apuy ti kamatayan hanggan ti ulian manga karadwa. Tunda pag danaw apuy imaw ti ikadwa pag kamatayan.

¹⁵ Ayinmut waydi sa danaw apuy una si unu ti unman nisurat kay ngaran sa ribru kabuhian.