Ipinakakit 2 - Hanunuu

Surat tabug sa Iglisya sa Banwa Ipisu

¹ “Isurat nimu inda para sa anghil magbantay sa iglisya sa banwa Ipisu: “Inda ti magsabi imaw yi ngani ti may bitbit pitu ka pamgasan sa kay sikun pag kamang, tiglakaw sa karaw-an pitu ka sulu gintu:

² Alam niku kanmu manga binwat kuntay balaw paghabulun nimu kanmu budlay bagkus ngap pag-agwantahun lang nimu. Alam diman niku pagsukuan nimu ti manga magbuwat daut. Sinuyasid diman nimu ti manga magpabalhinguun kuntay sida manga apustul bag-u nakitan nimu sida manga pudilun maaw.

³ Alam diman waydi niku mabinatahun kawu, nag-agwanta sa mayamu kakurian dahil sa kanmu magpasakup sa kangku ag balaw nanlubay kanmu pagsarig.

⁴ Dapat aku may pagsabihun inda laban sa kanmu: nanramig yi duy kawu sa kangku. Kanmu pagmahal udyi ga sa kabag-u.

⁵ Pag-isipa duy nu kabitay kay abwat kanmu kinalagpakan. Ampui yi nimu ti manga buwat nimu daut, baliki maan nimu kanmu mayad pag manga buwat kaybi. Nu unman kanmu tayakan kanmu buwat daut, asan tag aku, bul-un niku kanmu sulu ginan sa kay palaulian.

⁶ Dapat inda kang pag-ikabaya sa kanmu, pagkagalitan nimu ti ugali manga Nikulaita, imaw diman waydi kang pagkagalitan.

⁷ “Ti may tuli kailangan pagpatingi sa pagsabihun Ispiritu sa manga iglisya. Ti manalu pag tawu imaw ti pakan-an niku karampatan makakaun sa burak kayu kabuhian sa halamanan Diyus.”

Surat tabug sa Iglisya sa Banwa Ismirna

⁸ “Isurat nimu inda para sa anghil magbantay sa iglisya sa banwa Ismirna: “Inda ti magsabi imaw ti kabag-u, imaw ti katapusan, imaw ti namatay, imaw maan ti nabuhi uman:

⁹ Alam niku ti manga subuk kanmu nalakawan. Alam niku kawu pugri, dapat nu sa ungud mayaman ngap kawu. Alam diman niku kawu pagpuyaan manga tawu magpabalhinguun kuntay sida manga Hudiyu dapat nu sa ungud sida manga sakup ngap ni Satanas.

¹⁰ Danga duy kadalaan nimu ti manga kakurian kanmu patabgan udyi dugay aban. Malu, ipapirisu diyablu ti iba sa kanyu hampay kamu kay subukan. May tiisun gid kamu sa sulud sampulu ka sirang. Pagpakarig-un duy kawu hanggan tugka sa kamatayan bag-u pakan-an niku kawu buhi imaw yi kang pirimyu sa kanmu nanalu.

¹¹ “Ti may tuli kailangan pagpatingi sa pagsabihun Ispiritu sa manga iglisya. Ti manalu pag tawu dayu malakawan niya ti ikadwa pag kamatayan.”

Surat tabug sa Iglisya sa Banwa Pirgamu

¹² “Isurat nimu inda para sa anghil magbantay sa iglisya sa banwa Pirgamu: “Inda ti magsabi imaw yi ngani ti may bitbit matarum pag baladaw duwa kay urup:

¹³ Alam niku siyun pag mag-uli kawu sa ulian ni Satanas sa kay kaharian. Dapat marig-un di kanmu pagsarig sa kang ngaran. Balaw ipinaulam nimu kanmu pagsarig sa kangku madi minatay nida kang matinupadun pag suruguun si Antipas sa banwa nimu, sa ulian diman waydi ni Satanas.

¹⁴ Dapat aku may pagsabihun inda laban sa kanmu: Ti iba sa kanmu magsunud sa tudlu ni Balaam. Si Balaam kabay ti nagtudlu kaybi sa kan Balak hampay patalangun niya ti manga Israilita tag sa kasalanan. Nakan nagkaun ngani sida manga ihinandug sa manga diyus-diyusan ag nagpanguragin sida.

¹⁵ Ti manga iba asan magsunud sa tudlu manga Nikulaita.

¹⁶ Nakan ngani ampui nimu kanmu manga kasalanan. Nu unman iampu nimu kanmu manga kasalanan asan tag yi aku sa kanmu balaw yi dugay bag-u lipulun niku tunda pag manga tawu, tigbasun niku baladaw magluwang ginan sa kang bibig.

¹⁷ “Ti may tuli kailangan pagpatingi sa pagsabihun Ispiritu sa manga iglisya. Ti manalu pag tawu pakan-an niku hinamnu pag karan-unun ginan sa langit. Pakan-an diman niku siya batu malagti imaw ti sinuratan bag-u niya pag ngaran. Unman may nakaalam tunda pag ngaran nu ud tunda lang waydi ti pinakan-an.”

Surat tabug sa Iglisya sa Banwa Tiyatira

¹⁸ “Isurat nimu inda para sa anghil magbantay sa iglisya sa banwa Tiyatira: “Inda ti magsabi imaw yi ngani ti Anak Diyus, imaw ti may mata magduag ga labdab apuy ag kay manga lulud marakintab ga nanisnisan pag galang:

¹⁹ Alam niku duy kanmu pagbuwatun, kanmu pagmahal, kanmu pagsarig, kanmu pagsirbi hanggan pagtiis. Alam niku kanmu buwat mayad taynguna balaw lang ga kaybi.

²⁰ Dapat aku may pagsabihun inda laban sa kanmu: kanmu lang pinabay-anan si Hisibil, tunda ngani pag babayi tigpabalhinguun kuntay siya purupita Diyus dapat maaw unman. Magpatalang ngap siya sa kang manga panawuhun, siya ti suluhan sa panguragin, siya diman waydi ti magtaban hampay mangaun sa ihinandug sa manga diyus-diyusan.

²¹ Pinakan-an niku siya rugar hampay iampu niya kay manga kasalanan, dapat unman may gustu siya magbag-u kay ugali sa magpanguragin.

²² Malu, bantayi nimu aban mabuntalidan siya sa kay igyaan dara hanggan kay manga kaibahan sa panguragin. Makalakaw sida aban sa mahigpit pag kakurian, nu unman iampu nida kanda maghuwad sa kan Hisibil buwat kadautan.

²³ Matyun aban niku hanggan kay manga anak agud maalaman tanan manga iglisya aku lang ti makasuyasid sa tawu isip ag tagipusuun. Ti kada usa sa kanyu pakan-an niku angay sa kanyu manga binwat.

²⁴ “Dapat may pagsabihun waya aku sa kanyu sa manga iba taga Tiyatira, sa manga unman nagsunud sa kay daut pag tudlu ni Hisibil ag unman nagdunung sa kanda pagkumnun manga madalum pag tudlu ni Satanas. Balaw yi pakan-an niku kamu ga manga mabuyat pag paras-anun.

²⁵ Dapat ti kanyu yi tinanggap ginan sa kangku, danga yi paglimti hanggan sa udwaya rumas-ug aku.

^26-28 Nu manalu ti tawu ag tumupad sa kagustuhan niku hanggan tugka sa katapusan, imaw yi ti pakan-an niku karampatan parihu diman waydi sa kang tinanggap ginan sa kang Ama hampay magpamahala sa manga nasyun. Pakan-an siya aban karampatan magpamahala may bitbit pamakul baul. Runutun niya ti manga nasyun parihu sa anglit marunut. Ipakaun diman niku sa kanya ti kuramnag.

²⁹ “Ti may tuli kailangan pagpatingi sa pagsabihun Ispiritu sa manga iglisya.”