Ipinakakit 18 - Hanunuu

Nawasak yi ti Banwa Babilunya

¹ Bag-u nakitan niku may magpakababa ginan sa langit usa ka anghil may daka pag kamaskihan hanggan karampatan. Narayawan ti bilug kalibutan dahil sa kay kadayawan.

² Nangungud siya namagaw daka magkun, “Nawasak yi siya, nawasak yi ti bantug pag banwa Babilunya. Taynguna ulian yi manga labang tunda pag daga, tunda yi ti paratag-an manga labang. Asan diman ti purugadan manga manuk mayagting ag manga pag-ampuan tawu.

³ Dahil ga pinalangu banwa Babilunya ti tanan manga nasyun tawu sa kay pinagkaalak, sa kay magpanguragin. Nanguragin sa kanya ti manga hari sa babaw daga, ti manga magnigusyu nagyaman dahil sa kay ugali magpanguragin.”

⁴ Nadnugan waya maan niku ti usa ka magbagaw ginan sa langit magkun, “Kamu pag nasyun niku, pagpakarayu kamu sa kanya, danga kamu magpausa sa kasalanan niya, agud kamu balaw madamay sa malakawan niya pag kahigpitan.

⁵ Dahil kay manga kasalanan sunggu yi sa langit, dayi malimtan Diyus kay kadautan.

⁶ Buwatun niyu sa kanya ga kay diman binwat sa kanyu. Pagbalus kamu sa kanya malamang man sa kay binwat sa kanyu. Pun-a niyu irinmun kay ungut subra waya kay pait sa kay inalistu irinmun niya sa kanyu.

⁷ Nu kabitay siya magpadayaw-dayaw sa kay kayamanan ag magpalabaw-labaw, katunda diman ipakaun niyu sa kanya ti mahigpit pag kakurian hanggan karukuan bilang patimbang. Dahil pirmi pagpakaisip-isipun niya magkun, ‘Rayna yi gid aku tutuu, balaw aku buranday, udyi aku may malakawan karukuan hanggan waya aban.’

⁸ Nakan durunganan rumas-ug sa kanya sa sulud usa ka sirang ti manga kahigpitan, may kamatayan, may kapung-awan ag may kalun-usan. Tutdan siya, dahil ti nagsintinsiya sa kanya imaw ti makamaskihan Panginuun Diyus.”

⁹ Mamurahaw aban sa lumi ti manga hari sa babaw daga, ti manga kaibahan niya sa paurag-urag ag sa kahalay-halayan. Bantayan nida ti banwa magkairub daka kay anus.

¹⁰ Manindugan sida ginan sa arayu magkadala madamay sa kay nalakawan pag kaparusahan. Sumabi sida magkun, “Anung anung duy ti bantug pag banwa. Sa sulud lang usa ka udas natupad yi ti kaparusahan sa makapangyarihan pag banwa Babilunya.”

¹¹ Ti manga magnigusyu sa babaw daga lumumi ag manrukuan tungkul sa banwa Babilunya dahil balaw yi may mamili kanda paninda.

¹² Udyi may mamili kanda gintu, manga pilak, manga mahalaga batu, manga batu sa manlut, manga tuhay-tuhay kalasi rutay, manga linu, manga rutay ga dukut dungun ubi, may marara, tanan kalasi kayu mabanglu, manga garamitun bukun yi panhilingun binwat mahalaga pag kayu, manga galang, manga baul, manga malagti pag batu.

¹³ May paninda diman sida manga kaningay hanggan kamangyan, may mira, may kamangyan, may intus, manga langis, may arina hanggan tirigu, may baka, manga karanidu, manga kabayu, manga kalisa, hanggan may paninda diman sida manga panawuhun, manga buhi tawu.

¹⁴ Sumabi sa kanya ti manga manugnigusyu magkun, “Nadura yi ti tanan manga mayad pag bagay kanmu paghinam-un. Udyi nimu makitan ti tanan nimu kasiyunan hanggan kanmu karinuan nadura yi sa kanmu.”

¹⁵ Dayi pumakarani ti manga magnigusyu udyi yumaman sa ati pag banwa dahil magkadala sida barang maiminsan sa kay kakurian. Lumumi sida manrukuan.

¹⁶ Sabihun nida magkun, “Anung anung duy ti bantug pag banwa. Daan diman nabistihan niya manga linu, manga rutay ga dukut dungun ubi hanggan marara. Pinabistihan siya duru pag gintu, manga mahalaga pag batu, may manga batu sa manlut.

¹⁷ Sa sulud lang usa ka udas kadaka nawasak tunda pag kayamanan tanan-tanan.” Namantay ti manga tawu taga sakayan, manga pangulu sakayan, manga manugsakay, manga manug-alaga layag, hanggan tanan manga mandadagat nakatindug sida sa arayu.

¹⁸ Linumian nida ti banwa magkairub basta mag-anus waya ati. Magkun sida, “Unman may kaparihu sa kay kabantugan siti pag banwa.”

¹⁹ Dinapgan nida kanda ulu sa pangaawa malumian diman sida magkun, “Anung anung duy ti bantug pag banwa. Sa siti pag banwa pag nagyaman ti tanan manga tawu may sarakyan sa dagat magnigusyu. Dapat sa sulud lang usa ka udas nawasak di ti banwa.”

²⁰ “Kawu duy pag langit pagbaya sa nangyari sa banwa Babilunya. Pagbaya kamu pag manga pinili Diyus, manga apustul hanggan manga purupita. Nasintinsiyahan yi Diyus ti banwa Babilunya sa kaparusahan dahil sa binwat niya sa kanyu.”

²¹ Bag-u ti usa ka makamaskihan pag anghil nagpunpun batu ga usa ka galingan batu kay kalaun bag-u kay ayinmut tag sa dagat. Magkun ti anghil, “Katunda diman aban pag idugsak ti bantug pag banwa Babilunya udyi makitan uman.

²² Babilunya, udyi may masaydan sa kanmu ti manga maggitara, ti manga magpalawta, una magbudyung. Udyi makitan aban ti manga manugpanday. Udyi mag-adnugan aban ti magtunug galingan.

²³ Bumaliw madlum ati, dahil udyi may sulu una di usa. Udyi madnugan aban ti manga aguman babayi, ti manga aguman lalaki, magharampangan masulung. Dahil masyadu nagyaman kanmu manga manugnigusyu sa bilug kalibutan. Dinaya nimu ti tanan nasyun sa daut pag kadunungan nimu.

²⁴ Siyun diman waydi pag banwa pag minatay ti manga purupita, ti manga pinili Diyus hanggan ti tanan minatay sa kalibutan.”