Ipinakakit 17 - Hanunuu

Ti Bantug pag Babayi Uragin

¹ Bag-u sa pitu ka anghil may dara pinggan malukung, ti usa nagpakarani sa kangku kay sinabi magkun, “Abala duy, ipakakit niku sa kanmu nu kabitay sintinsiyahan sa parusa ti bantug pag babayi uragin imaw yi ti pagkumnun banwa Babilunya nakasakup sa mayamu pag sapa.

² Sa tunda pag babayi pag nagpauragin ti manga hari sa babaw daga, ga nalangu ti tanan tawu sa bilug kalibutan sa kay pinagkaalak niya, sa magpanguragin.”

³ Nasakup aku Ispiritu bag-u itinibu aku usa ka anghil tag sa pangawakawaan. Nakitan niku ati ti usa ka babayi masakyan sa marara pag hayup malangas. Ti hayup malangas may pitu ka ulu, kay sungay sampulu. Sa tanan bilug niya nakasurat ti manga ngaran lapastangan laban sa Diyus.

⁴ Kay rutay babayi may marara may ga dukut dungun ubi. Tuhay-tuhay kay bisti may gintu, may masinay pag manga batu, may batu sa manlut. May bitbit siya usa ka pinggan malukung gintu punu yi manga kayagtingan hanggan kadautan niya panguragin.

⁵ Nisurat sa kay bangas ti usa ka ngaran tagu kay kahulugan magkun, “Ti bantug pag banwa Babilunya, ti ina manga magpanguragin hanggan tanan kahalayan sa babaw daga.”

⁶ Nakitan niku ti babayi ga nalangu sa dugu manga tawu napasakup sa Diyus ag sa dugu manga minatay dahil sa kanda pagsarig sa kan Hisus. Pagka nakitan niku siya, naglingut aku masyadu.

⁷ Pinmaingana ti anghil sa kangku magkun, “Hayga duy kawu magkadulaw? Itultul niku sa kanmu nu hintay kay kahulugan tunda pag babayi, hanggan tunda pag hayup malangas kay sarakyan may pitu ka ulu, kay sungay sampulu.

⁸ Ti kanmu nakitan pag hayup malangas buhi nu kaybi, kainda bay udyi dapat lumuwang maan uman ginan sa kaabasad-basadan bag-u midamhak di gid maan siya aban. Ti manga tawu magkabuhi sa babaw daga ag kanda ngaran unman nakalista sa ribru kabuhian ginan waya sa gimpuunan kalibutan, tunda pag manga tawu lumingut nu makitan nida ti hayup malangas. Dahil kaybi buhi, siyun ginan udyi siya, dapat aban lumuwang maan.

⁹ “Dayu maintindihan tawu inda nu unman siya mapininsarun. Ti pitu ka ulu kay ibug sabihun pitu ka tagudtud pagtukawan babayi, ipinahalimbawa diman sa pitu ka hari.

¹⁰ Kay lima nadura yi, kay usa hari waya siya, kay ikapitu udwaya rinmas-ug. Nu rumas-ug siya balaw siya dumugay.

¹¹ Ti hayup malangas buhi kaybi, dapat taynguna udyi, imaw yi ti ikawalu pag hari aban, madi minsan diman siya sa pitu. Kadamhakan kay patabgan niya aban.

¹² “Ti sampulu ka sungay kanmu nakitan kay kahulugan sampulu waydi ka hari udwaya nakahari dapat humari sida aban sa sulud usa ka udas kanda karampatan minsan sa hayup malangas.

¹³ Usa lang kanda turunu ti sampulu ka hari ag ipasakup nida sa hayup malangas kanda kamaskihan hanggan karampatan.

¹⁴ Girahun nida ti Anak Karanidu dapat matalu diman sida dahil ti Anak Karanidu Panginuun manga panginuun, siya diman ti Hari manga hari. May kahuray aban sa kay panalu ti manga tinawag, ti manga pinili ag ti manga matinupadun pag manga magsunud sa kanya.”

¹⁵ Sinabi diman anghil sa kangku magkun, “Ti manga danum kanmu nakitan tinukawan babayi uragin, imaw yi ngani ti manga nasyun manga kayamuan tawu, manga tuhay-tuhay kanda pamagaw.

¹⁶ Ti sampulu ka sungay kanmu nakitan hanggan ti hayup malangas magalit aban sa bantug pag babayi uragin. Agawun nida ti tanan kasiyunan niya bag-u lukasun nida kay rutay. Kan-un nida kay nayi bag-u sunugun nida siya sa apuy.

¹⁷ Pinaisip Diyus ti manga hari hampay buwatun nida ti angay sa kay ginayak ag hampay magkausa sida magpasakup sa hayup malangas kanda kamaskihan ag kanda karampatan hanggan sa ud matupad ti manga binagaw Diyus.

¹⁸ “Ti babayi kanmu nakitan imaw ti bantug pag banwa may kapangyarihan sa manga hari sa babaw daga.”