Ipinakakit 16 - Hanunuu

Pag-ibuhus ti Pangagalit Diyus

¹ Nadnugan niku ti daka pag bagaw ginan sa sulud Balay Diyus magsugu sa pitu ka anghil magkun, “Pag-ati yi kamu, buhusan niyu sa daga ti pangagalit Diyus ginan sa basad pitu ka pinggan malukung.”

² Inmati yi ngani ti un-an pag anghil, ibinuhus yi niya tag sa daga kay sukad ginan sa kay pinggan malukung. Imaw yi ngani ti nakabiyag madala ag masakit sa manga tawu sa may marka hayup malangas ag sa manga magsamba sa kay tawu-tawu.

³ Ibinuhus maan ikadwa pag anghil kay sukad ginan sa kay pinggan malukung tag sa dagat. Bag-u ti danum nagbaliw yi ga bilang dugu usa ka bangkay. Nagkaramatay yi ti tanan iyay sa dagat.

⁴ Ibinuhus yi maan ikatlu pag anghil kay sukad ginan sa kay pinggan malukung tag sa manga sapa hanggan sa manga bulbugan. Bag-u nagbaliw diman dugu ti danum sa manga sapa hanggan sa manga bulbugan.

⁵ Nadnugan niku ti sinabi anghil manug-alaga manga danum magkun, “Kawu ti Banal, kawu ti may buhi taynguna hanggan kaybi ginan. Matadlung kawu sa binwat nimu sintinsiya.

⁶ Pinalanas nida ti dugu manga tawu napasakup sa kanmu hanggan ti dugu manga purupita. Taynguna pinakan-an nimu sida dugu kanda yi irinmun. Tida ti angay yi gid ngani sa kanda binwat kasalanan.”

⁷ Nadnugan niku may nagbagaw ginan sa surunugan manga pag-isagda sa Panginuun magkun, “Panginuun Diyus, kawu ti makamaskihan sa tanan, tutuu matadlung ngani ag kang-ud kanmu pag sintinsiya.”

⁸ Ibinuhus maan ikap-at pag anghil kay sukad ginan sa kay pinggan malukung atag sa init. Bag-u pinakan-an kamaskihan ti init hampay sunugun masyadu pag init ti manga tawu.

⁹ Napalian ngani sida masyadu pag init, dapat sinaadan waya nida kay ngaran Diyus madi siya ngap ti may kamaskihan magpadara katunda pag manga kahigpitan. Unman nag-ampu sida sa kanda manga kasalanan ag unman diman waydi nagdayaw sida sa Diyus.

¹⁰ Ibinuhus maan ikalima pag anghil kay sukad ginan sa kay pinggan malukung tag sa tukawan hayup malangas. Nagdulum yi kay kaharian, nanakmulan ti manga tawu kanda bibig sa sakit.

¹¹ Dapat ay sinaadan di ngap nida ti Diyus sa langit dahil sa nalakawan nida kakurian may tapil waya manga biyag. Unman gid sida nag-ampu nagtayak sa kanda buwat kadautan.

¹² Ibinuhus maan ikan-um pag anghil kay sukad ginan sa kay pinggan malukung tag sa laun pag sapa Iyupratis. Nak-at kay danum bag-u alistu yi ti dalan para lakawan manga hari ginan sa butlakan init.

¹³ Bag-u nakitan niku may tulu ka bilug labang ga histuda pikaw nagluwang ti usa ginan sa sulang daragun, ti usa ginan sa sulang hayup malangas, ti usa ginan sa sulang pudilun purupita.

¹⁴ Tunda pag manga labang magbuwat manga makadululaw. Pagpalibutan nida ti tanan manga hari sa bilug kalibutan hampay kanda tipunun tabug sa gira ati katpung aban nu kaudasan yi Diyus makamaskihan sa tanan. Tunda katpung aban pag kaudasan daka gid kay kabantugan.

¹⁵ “Pagpatingi kamu, rumas-ug aku parihu sa mananakaw. Papaladan Diyus ti tawu nu maimatahan diman ag nu unman linukasan niya kay rutay hampay unman lumakaw siya malukasan ag dayu mangay-a siya sa kayamuan tawu.”

¹⁶ Tinipun ngani manga labang ti manga hari ati sa usa ka rugar nu sa bagaw Hibriyu kay ngaran Armagidun.

¹⁷ Bag-u ibinuhus maan ikapitu pag anghil kay sukad ginan sa kay pinggan malukung tag sa panungaan langit daga. May nagbagaw daka ginan sa tukawan hari ati sa Balay Diyus magkun, “Tinupad yi.”

¹⁸ Bag-u kinmilat, may manga ugung, linminti, naglinug masyadu. Inda ti pinakamabisug pag linug ginan sa kabag-u waya pag manga linahi tawu. Masyadu gid ungud mabisug.

¹⁹ Natlu ti daka pag banwa. Natumpag yi ti manga banwa tanan nasyun. Udyi nakaribri sa sintinsiya Diyus ti bantug pag banwa Babilunya, pinainman intus, kay kahulugan kay mahigpit ngani pag galit Diyus.

²⁰ Naparaw ti tanan manga puru sa dagat, napatag ti tanan manga bantud.

²¹ Ilinagpak ginan sa langit ti yilu ga manga batu kay kabuyat limampulu ka kilu ti kada usa. Nadugsakan ti manga tawu yilu daraka, nakan naglapastangan sida laban sa Diyus. Masyadu gid madala inda pag kahigpitan.