Ipinakakit 15 - Hanunuu

Pitu ka Anghil may Dara Pangatapusan pag Kahigpitan

¹ Nakitan niku ti usa waya ka makadululaw ag makamaskihan pag tanda sa langit. May pitu ka anghil pasay may dara kahigpitan. Tunda yi ti pangatapusan pag kahigpitan dahil siti aban pag matabu kay pangagalit Diyus.

² May nakitan aku ga dagat kay histuda ga bubug pag salamin kay pagkasnag. Nakitan diman niku ti manga tawu nanalu sa hayup malangas hanggan sa kay tawu-tawu hanggan sa rumiru niya ngaran. Ati sida pag matindugan sa arani dagat ga bubug pag salamin kay pagkasnag. May bitbit sida alpa kay ipinakaun Diyus sa kanda.

³ Bag-u kinanta nida ti kanta ni Muysis kay suruguun Diyus hanggan ti kanta Anak Karanidu magkun, “Kawu ti Panginuun Diyus ti makamaskihan sa tanan. Makapangyarihan ag makadululaw kanmu manga buwat. Kawu ti Hari manga nasyun tawu. Matadlung ag tutuu ti turunu nimu manga buwat.

⁴ Si unu nguna, Panginuun, ti unman magkadala sa kanmu? Si unu nguna ti dayu manultul sa kanmu kamaskihan? Kawu lang ti banal. Tanan pag manga nasyun pumakarani, sumamba sa kanmu. Dahil nakitan tanan tawu matadlung kanmu manga buwat.”

⁵ Bag-u nakitan niku mabukasan yi ti Balay Diyus sa langit, ti Turda Tiripnan nu naan pag maulian ti Kasuguan.

⁶ Pagkatapus, napalwas ginan sa Balay Diyus ti pitu ka anghil pasay may dara kahigpitan. Nakasulung sida rutay malagti unman may uring ag may huragkus gintu kanda manga dubdub.

⁷ Ti usa sa upat ka linalang may buhi may ipinakaun sa kanda pitu, ayaw-ayaw usa ka pinggan malukung pasay gintu. Tunda pag manga pinggan malukung kay sukad punu pangagalit Diyus imaw ti may buhi hanggan waya aban.

⁸ Ti Balay Diyus punu yi anus dahil sa kay kadayawan hanggan kamaskihan Diyus. Unman may makasulud sa Balay Diyus hanggan sa ud makalawuy ti pitu ka kahigpitan ti dinara pitu ka anghil.