Ipinakakit 14 - Hanunuu

Magkanta ti manga Linukat ginan sa Babaw Daga

¹ Bag-u nakitan niku ati ti Anak Karanidu nakatindug sa bantud Siun. Kaibahan niya ti usa ka gatus may upatpulu may upat ka libu ka tawu. Nakasurat sa kanda manga bangas ti ngaran Anak Karanidu hanggan ti ngaran niya Ama.

² Nadnugan niku may mag-ingay ginan sa langit kay tunug ga danum magpaywas sa puru, ga magranranug linti. Ti kang nadnugan ga magtimpara manga manuggitara.

³ Magkanta sida usa ka bag-u pag kanta sa atubangan tukawan hari hanggan upat ka linalang may buhi hanggan sa atubangan duwapulu may upat ka gurangun. Unman may makatau sa tunda pag kanta nu ud tunda lang pag usa ka gatus may upatpulu may upat ka libu ka tawu manga linukat ginan sa babaw daga.

⁴ Inda ti manga lalaki unman niamut sa manga babayi, unman sida nag-asawa. Magkuyug sida sa Anak Karanidu una naan tag siya. Linukat sida ginan sa tanan linahi tawu bilang ga un-an pakaun sa Diyus ag sa Anak Karanidu.

⁵ Unman sida nagpudil kaybi ginan una di, unman may ikasabi tungkul sa kanda.

Ti Tulu ka Anghil

⁶ Nakitan maan niku ti usa ka anghil maglayang sa tungud may dara siya unman may katapusan pag Mayad pag Barita hampay ipadakit niya sa manga tawu mag-uli sa babaw daga, sa kada nasyun, sa kada linahi, sa kada pamagaw hanggan sa kada kalasi tawu.

⁷ Nagbagaw ti anghil daka magkun, “Pagkadala kamu sa Diyus, dayawun niyu kay kamaskihan. Dahil rinmas-ug yi kay kaudasan hampay pilahun niya ti manga matadlung sa manga unman matadlung. Sambahun niyu ti Diyus ti naglalang langit, daga ag dagat hanggan bulbugan danum.”

⁸ Nagdasun sa kanya ti ikadwa pag anghil magkun, “Nawasak yi, nawasak yi ti makapangyarihan pag banwa Babilunya. Pinakan-an niya maisug pag intus ti tanan nasyun tawu, pinilit pinalangu niya sida sa panguragin niya.”

⁹ Nagdasun sa duwa ka anghil ti ikatlu maan nagbagaw daka magkun, “Una sitapu ti magsamba sa hayup malangas ag sa kay tawu-tawu una magtanggap marka sa kay kamang una bangas,

¹⁰ uminum siya intus lunsay galit Diyus, ayinungyung atag sa ungut sa kay pangaisug. Pakurian sida sa apuy ag asupri sa atubangan manga anghil Diyus hanggan sa atubangan Anak Karanidu.

¹¹ Ti apuy magpakuri sa kanda, magtalimbuuk ti anus hanggan waya aban. Sirang yabi unman may pahari sa kakurian ti manga nagsamba sa hayup malangas ag sa kay tawu-tawu ag una hintay ti nagtanggap sa kay marka.”

¹² Nakan ngani kailangan pagpakarig-un ti manga napasakup sa Diyus, ti manga magsunud ngani sa kay sugu Diyus ag unman mag-urung sa kanda pagsarig sa kan Hisus.

¹³ Nadnugan niku may magbagaw ginan sa langit magkun, “Isurat nimu inda pagkumun, taynguna ginan pinapaladan Diyus ti manga namatay sa kanda pagsirbi sa Panginuun.” Magkun ti Ispiritu, “Tutuu ngani, pumahari sida aban sa kanda budlay. Dahil dumasun sa kanda uryan kanda manga binwat.”

Udas Tig-arani sa Babaw Daga

¹⁴ Bag-u nagbantay aku, may nakitan aku usa ka malagti pag rurum, may matukawan sa rurum ga anyu tawu, sa kay ulu may gintu pag sangbaw imaw ti ipinirimyu sa kanya ag may bitbit siya matarum pag karit.

¹⁵ Bag-u may linmuwang usa waya ka anghil ginan sa Balay Diyus. Nagbagaw siya daka tabug sa matukawan sa rurum magkun, “Bulwata yi duy kanmu karit, paggarab yi kawu dahil udas yi tig-arani. Lutu yi nakan ti aranyun sa babaw daga.”

¹⁶ Ginamit matukawan sa rurum kay karit bag-u natabu niya nagarab ti aranyun sa babaw daga.

¹⁷ Bag-u may usa waya gid ka anghil linmuwang ginan sa Balay Diyus sa langit, may bitbit diman waydi matarum pag karit.

¹⁸ May usa waya gid maan ka anghil nagluwang ginan sa surunugan manga pag-isagda sa Panginuun. Siya ti manug-alaga sa apuy. Nagbagaw sida daka sa anghil sa may bitbit karit matarum magkun, “Ta gamita yi kanmu karit, rapasa yi nimu ti manga ubas sa tanan manga ubasan sa babaw daga, lutu yi nakan.”

¹⁹ Nakan ginamit yi ngani anghil kay karit, rinapas yi ngani niya ti manga burak ubas bag-u kay ipinauli tabug sa pirigsan ubas, imaw yi ngani ti mahigpit pag galit Diyus.

²⁰ Bag-u tinatatataan ti manga ubas ati sa luwas banwa. Ginan sa pirigsan ubas nagbaha ti dugu, tulu ka gatus may duwapulu ka kilumitru kay nagbulusan dugu, tupung sa dayu kabayu kay kaabasad.