Ipinakakit 13 - Hanunuu

Ti Duwa ka Hayup Malangas

¹ Bag-u nakitan niku ti usa ka hayup malangas magpatakas ginan sa dagat, sampulu kay sungay ag pitu kay ulu. Kada usa ka sungay may sangbaw hari, kada ulu may nakasurat ngaran manga lapastangan sa Diyus.

² Ti hayup malangas parihu ga liyupardu pag hayup kay histuda, may manga lulud parihu ga lulud usu pag hayup. May bibig bilang ga bibig liyun. Ipinakaun daragun sa hayup malangas kay sadili pag kapangyarihan, kay pagkahari hanggan kay daka gid pag karampatan.

³ Ti usa ka ulu hayup malangas bilang ga nabiyagan, kang-ud gid ikamatay pag biyag, dapat nag-ayad di maan. Naglingut ti tanan tawu sa babaw daga sa nangyari sa hayup malangas, nakan sida nagpaniwala sa kanya.

⁴ Ti tanan tawu nagsamba sa daragun, dahil ipinakaun niya kay karampatan sa hayup malangas. Sinambahan nida hanggan ti hayup malangas, dinayaw nida magkun, “Hintay ti makatulad sa hayup malangas, si unu ti makalaban sa kanya?”

⁵ Pinahintulutan ti hayup malangas hampay magbagaw masyadu pag lapastangan laban sa Diyus ag pinakan-an siya karampatan hampay makabuwat kay buruwatun sa sulud upatpulu may duwa ka bulan.

⁶ Bag-u nagbagaw ngani siya manga lapastangan laban sa Diyus, laban sa ngaran Diyus, laban sa kay ulian Diyus hanggan laban sa tanan mag-uli sa langit.

⁷ Pinahintulutan diman siya hampay girahun taluhun ti manga napasakup sa Diyus. Pinakan-an siya karampatan mamahala sa kada linahi, sa kada kalasi tawu, sa kada pamagaw, sa kada nasyun tawu.

⁸ Sumamba sa kanya ti tanan tawu magkabuhi sa babaw daga, purya lang ti manga tawu kay ngaran nisurat yi sa ribru kabuhian ginan waya sa pagkalalang kalibutan. Tunda pag ribru kay apu ti Anak Karanidu imaw ti minatay.

⁹ Nu may tuli kamu kailangan kamu pagpatingi.

¹⁰ Una hintay pag tawu ti pagturuminuhun hampay mabihag, pihu gid siya mabihag aban. Una hintay ti pagturuminuhun hampay mamatay sa baladaw, pihu gid siya matyun baladaw aban. Nakan ngani kailangan ti manga napasakup sa Diyus pagpakarig-un kay pagsarig.

¹¹ Bag-u nakitan niku ti usa waya ka hayup malangas nagluwang ginan sa basad daga. Duwa kay sungay parihu sa sungay anak karanidu. Dapat kay bagaw parihu sa bagaw daragun.

¹² Nagsirbi siya sa usa ka hayup malangas ati diman waydi ginan pag ginamit niya ti tanan niya karampatan. Ti tanan tawu sa babaw daga pinilit niya hampay magsamba sida sa usa ka hayup malangas imaw ti may biyag kang-ud ikamatay dapat naayad di maan.

¹³ Makadululaw pag manga tanda ti binwat ikadwa pag hayup malangas. Ipinaluwang niya ti apuy ginan sa langit tabug sa daga sa magbantay manga tawu.

¹⁴ Dinaya niya ti tanan tawu sa babaw daga dahil sa manga tanda ipinabuwat sa kanya sa atubangan usa ka hayup malangas. Nagarya niya ti manga tawu hampay bumwat tawu-tawu ga hayup malangas, imaw ti nabiyagan baladaw dapat nag-ayad di maan.

¹⁵ Pinahintulutan ti ikadwa pag hayup malangas hampay pakanan niya arup ti tawu-tawu ga hayup malangas, nakan ngani magbagaw ti tawu-tawu. Pinakan-an kapangyarihan ti ikadwa pag hayup malangas hampay kay ipamatay ti tanan tawu dayu magsamba sa kay tawu-tawu ga hayup malangas.

¹⁶ Sa pilitan pinanmarkahan hayup malangas ti tanan tawu sa sikun nida kamang aw ngatay sa kanda bangas, una may kangaranan pag manga tawu, una unman may kangaranan, una manga mayaman, una manga pugri, una manga panawuhun, una manga balaw panawuhun, tanan-tanan sida ipinamarka.

¹⁷ Unman mahimu magbili una magpabili nu unman tunda lang ti may marka ngaran hayup malangas aw ngatay rumiru niya ngaran.

¹⁸ Kailangan kamu pagmapininsarun sa inda pag bagay. Una sitapu ti madunung, makaintindi siya kay ibug sabihun rumiru, kay kahulugan ngani ngaran hayup malangas. Dahil inda pag rumiru kay kahulugan ngaran usa ka lalaki. Inda ngani ti rumiru, unum ka gatus unumpulu may unum.