Ipinakakit 12 - Hanunuu

Ti Babayi ag ti Daragun

¹ Bag-u may nakitan maan aku usa ka makadululaw pag tanda sa langit, ti usa ka babayi kay pinagkalambung init, matindugan sa bulan. Sampulu may duwa ka pamgasan ti pinagkasangbaw sa kay ulu.

² Arani yi siya manganak nakan nag-aris siya daka sa masyadu niya magpanamdam.

³ Bag-u may usa waya gid maan ka tanda mag-akitan sa langit, may marara pag daragun daka masyadu. Tunda pag daragun may pitu ka ulu bag-u may sampulu waya ka sungay. Kay pitu ka ulu pasay may sangbaw hari.

⁴ Linaptik ikug daragun ti ikatlu pag bahagi manga pamgasan sa langit bag-u kay ayinmut tag sa daga. Bag-u tinmuhung ti daragun sa atubangan babayi arani yi manganak hampay kay alakhakun ti lapsag nu milusad.

⁵ Ti babayi nanlapsag yi lalaki dapat ay may inmagaw sa lapsag bag-u dinara atag sa Diyus, sa tukawan hari. Tunda pag lapsag ti pinili hampay mahigpit nu humari aban sa tanan nasyun.

⁶ Dapat ti babayi linmayas atag sa pangawakawaan sa usa ka rugar inalistu Diyus para sa kanya hampay maalagaan siya ati sa sulud usa ka libu may duwa ka gatus may unumpulu ka sirang.

⁷ Bag-u may gira sa langit. Ti pangulu anghil si Mikail, hanggan manga anghil naglaban sa daragun. Ti daragun hanggan kay manga kakampi pag manga anghil naglaban gid sa gira.

⁸ Dapat natalu ti daragun bag-u tinulak yi sida ginan sa kanda ulian sa langit.

⁹ Ti laun pag daragun imaw yi ti pagkumnun gurangun pag ulay, kay ngaran diyablu, imaw ti pagkumnun si Satanas, imaw tigdaya sa bilug kalibutan. Ayinmut siya atag sa daga hanggan kay manga kakampi pag manga anghil ayinmut waydi.

¹⁰ Bag-u nadnugan niku may magbagaw daka sa langit magkun, “Taynguna niburayhaw yi kay pagribri nita Diyus sa manga tawu, hanggan kay kapangyarihan hanggan kay maghari. Niburayhaw yi waydi ti karampatan niya Pinili Manugribri pag Hari. Dahil iyinmut yi ginan sa langit ti manugsumbung, imaw tigpakasumbung sirang yabi sa kanta manga patar-ari sa atubangan nita Diyus.

¹¹ Kanta manga patar-ari nanalu laban sa diyablu, dahil sa dugu Anak Karanidu, dahil diman sa kanda magpadakit sa Bagaw Diyus. Balaw sida naghinayang sa kanda buhi una hanggan waya tugka sa kamatayan.

¹² Nakan kawu duy pag langit pagbaya, hanggan ti tanan mag-uli asan sa langit pagbaya. Dapat ay kamu pag daga hanggan dagat, mahigpit pag kakurian kanyu malakawan. Dahil masyadu pag galit ti idugsak diyablu sa kanyu. Alam yi niya diit wadi pag udas ti kay magkasawad.”

¹³ Pagka nakitan daragun siya ayinmut sa daga, inusig niya ti babayi ti nanganak usa ka lalaki.

¹⁴ Dapat ti babayi pinakan-an manga pakpak agila daka hampay makalayang siya tabug sa pangawakawaan. Ati siya pag alagaan sa sulud tulu ka timpu may tunga arayu ginan sa ulay.

¹⁵ Nakan nagbuga ti ulay danum nagbaliw sapa hampay mianud ti babayi.

¹⁶ Dapat ti daga nangawat sa babayi, nanggil-ang ti daga bag-u natuyung ti danum kay abinuga daragun nakan naribri di ti babayi.

¹⁷ Mahigpit yi kay galit daragun sa babayi nakan pinamharingan niya kay nasawad linahi babayi hampay girahun. Imaw yi pag manga tawu ti magsunud sa kay sugu Diyus, manga balaw magbul-iw sa katutuuhanan ipinakilala ni Hisus.

¹⁸ Bag-u ti daragun nagtindug sa baybay dagat.