Ipinakakit 11 - Hanunuu

Ti Duwa ka Manugpadakit

¹ Bag-u ipinakaun anghil sa kangku ti usa ka panukat pag bitlag. Sinabi niya sa kangku magkun, “Pagtindug yi kawu sukata yi nimu ti Balay Diyus hanggan ti surunugan manga pag-isagda sa Panginuun. Bilanga diman nimu ti manga magsamba ati.

² Dapat danga dap nimu pagsukata kay manga parasyaran sa luwas Balay Diyus, dahil ipinahintulut tunda sa manga tawu unman magpasakup sa Diyus. Sulud upatpulu may duwa ka bulan kanda aban tatatataan lulud ti banal pag banwa.

³ Dapat suguun niku ti duwa ka manugpadakit nakasulung rutay pustal. Bag-u itudlu nida ti Bagaw Diyus sa sulud usa ka libu may duwa ka gatus may unumpulu ka sirang kay kadugay.”

⁴ Tunda pag manga manugpadakit imaw yi ti duwa ka puun kayu ulibu, ag imaw diman hanggan ti duwa ka sulu matindugan sa atubangan Panginuun, sa may apu bilug kalibutan.

⁵ Nu may pumanghas umunu-unu sa duwa ka manugpadakit, lumuwang ginan sa kanda sulang ti apuy imaw ti umirub sa kanda manga kalaban. Nu may magkaibug mag-unuunu sa tunda pag manga manugpadakit pihu siya matyun apuy ginan sa kanda sulang.

⁶ May karampatan sida pumigil sa langit hampay udyi umuran sa kaudasan nida magpurupita. May karampatan diman sida baliwun dugu ti danum ag hampay magpadara una hintay pag kahigpitan tag sa babaw daga una lang kapira kanda gustu.

⁷ Dapat nu nakatapus sida nakapadakit yi Bagaw Diyus, lumuwang ti Hayup Malangas ginan sa kaabasad-basadan bag-u lumaban siya sa kanda kay taluhun ag matyun.

⁸ Kanda bangkay mahuprasayan sa karsada mahalaga pag banwa kay ngaran magkabaliwan-an ga Suduma hanggan Ihiptu. Ati diman pag ipinaku sa kurus kanda Panginuun.

⁹ Sa sulud tulu ka sirang may tunga kanda bangkay panuudan manga tawu ginan sa kada kalasi tawu, sa kada linahi, sa tanan histuda pamagaw, sa kada nasyun tawu. Unman sida pumasnu kuntay ilubung ti manga bangkay.

¹⁰ Nu mamatay aban tunda pag duwa ka manugpadakit bumaya ti tanan manga tawu sa kalibutan. May pistahan sida, bag-u mamarakan-an waya dahil tigbak yi tunda pag duwa ka purupita ti namakaun subra pag kakurian sa kanda.

¹¹ Pagka nakalawuy yi ti tulu ka sirang may tunga, binuhi maan sida Diyus, tinmindug. Balaw basta pag kulba ti manga nakakit.

¹² Bag-u may nadnugan ti duwa ka purupita may binmagaw ginan sa langit magkun, “Pagsitay tag duy kamu sa langit.” Hanggan pagbantayan waya sida nida manga kalaban, ati yi tag sida sa langit dinara rurum.

¹³ Ati katpung pag udas naglinug masyadu gid mabisug. Nawasak ti ikasampulu pag bahagi banwa, pitu ka libu tawu ti namatay sa linug. Ti nasawad pag manga tawu nadala yi masyadu, dinayaw nida ti Diyus sa langit.

¹⁴ Nangyari yi kay ikadwa pag kahigpitan, una kay ikatlu hanggan mangyari diman waydi udyi dumugay aban.

Ti Ikapitu pag Budyung

¹⁵ Pagka inyup ikapitu pag anghil kay budyung, may manga namaragawan daraka ginan sa langit magkun, “Kanta Panginuun hanggan ti Pinili Diyus Manugribri pag Hari nag-aku yi lubus sa paghari sa bilug kalibutan. Humari siya hanggan waya aban.”

¹⁶ Ti duwapulu may upat ka gurangun matukawan sa kanda manga turukawan sa atubangan napadapa nagsamba sa Diyus,

¹⁷ magkun, “Panginuun Diyus makamaskihan sa tanan, kawu ti Diyus kainda, una kaybi ginan. Magpasalamat kami dahil ginamit nimu kanmu kamaskihan unman may katapusan. Kawu naghari yi taynguna.

¹⁸ Magkagalit ti manga unman magsarig sa Diyus, dahil nagras-ug yi ti kaudasan nimu pangagalit. Pihuun yi nimu ti manga namatay nu daut nu mayad. Kanmu diman kaudasan pamakaun pirimyu sa manga suruguun nimu, sa manga purupita. Pakan-an diman nimu pirimyu ti manga napasakup sa kanmu hanggan ti tanan maggalang sa kanmu ngaran, una mayaman una pugri. Udas yi hampay dautun nimu ti manga nagpakaun kakurian sa kalibutan.”

¹⁹ Bag-u nabukasan yi ti Balay Diyus sa langit ag nakitan ti Kaban Hugut sa Kasunduan Panginuun. Bag-u nagbalagit ti kilat, nangurarug ti linti, nadnugan ti manga daraka pag ingay, naglinug bag-u nag-uran yilu daraka.