Ipinakakit 10 - Hanunuu

Ti Anghil may Bitbit Diit pag Ribru

¹ Bag-u nakitan maan niku ti usa ka makapangyarihan pag anghil magpakababa ginan sa langit. Magkasaputan siya rurum ag may balangaw sa kay tungud ulu. Kay uyahun ga singgit init kay kasilaw. Kay manga lulud ga labdab apuy kay karara.

² May bitbit siya ribru diit mabukladan. Itinata niya kay sikun pag lulud sa babaw danum dagat, kay wala sa daga.

³ Nanawag siya daka, kay tawag ga ungal liyun kay kadaka. Pagka siya nanawag daka nagbagaw ti pitu ka kurarug linti.

⁴ Pagka nagbagaw ti pitu ka linti sumurat yi mana aku, dapat may nasaydan aku usa ka magbagaw ginan sa langit magkun, “Danga nimu alamana ti sinabi pitu ka linti, danga nimu isurat tunda.”

⁵ Nakitan ngani niku tunda pag anghil matat-an sa babaw danum dagat, kay baliw lulud sa daga, pinaabwat niya kay sikun baliwa pag kamang,

⁶ bag-u nanumpa siya hinangbit niya ti ngaran Diyus buhi hanggan waya aban, imaw ti naglalang langit, daga, dagat hanggan tanan-tanan apinauli siyun. Magkun ti anghil, “Balaw yi dumugay aban.

⁷ Nu inyup yi ikapitu pag anghil kay budyung bag-u tunda pag udwaya ipinaburayhaw Diyus pag gayak pihu tupadun yi ga kay diman ipinakilala sa kay manga suruguun, sa manga purupita.”

⁸ Bag-u naghampang maan sa kangku ti nagbagaw kis-ab sa kangku ginan sa langit, magkun siya, “Pagpakarani kawu duy sa anghil matat-an sa babaw danum dagat, kay baliw lulud sa daga, bag-u bul-a nimu kay bitbit ribru mabukladan.”

⁹ Nakan dinulud ngani niku ti anghil bag-u hinagad niku ti ribru. Magkun siya sa kangku, “Bul-a nimu inda kan-a, mapait inda sa kanmu suruk-surukan, dapat sa sulang nimu parihu inda ga daykut kay katagsing.”

¹⁰ Ginamit niku ti diit pag ribru bag-u kang kinaun. Matagsing ngani parihu yi gid sa daykut putyukan. Dapat pagka tinlun niku mapait yi ngap sa kang suruk-surukan.

¹¹ Bag-u sinabi anghil sa kangku magkun, “Kailangan kawu magpurupita maan tungkul sa mayamu pag manga tawu, manga nasyun, manga pamagaw hanggan manga hari.”