Ipinakakit 1 - Hanunuu

¹ Inda pag kasuratan tungkul sa kay ipinakakit Diyus sa kan Hisu-Kiristu. Nakan kay ipinakakit sa kan Hisu-Kiristu hampay kay maan ipaalam sa manga suruguun Diyus ti manga bagay arani yi mangyari. Sinugu ni Hisus kay anghil hampay kay ipakakit inda pag manga bagay sa kay panawuhun sa kan Huwan.

² Bag-u isinurat ni Huwan ti tanan niya nakitan tungkul sa kay sinabi Diyus hanggan tungkul sa kay ipinaalam ni Hisu-Kiristu.

³ Papaladan Diyus ti manugbasa inda pag ribru hanggan ti manga magpatingi sa inda pag ipinurupita tungkul sa manga mangyari aban lalu nu matinupadun sa inda pag isinurat. Dahil inda tanan balaw yi dugay mangyari yi.

Surat sa Pitu ka Iglisya

⁴ Aku si Huwan ti may surat sa pitu ka iglisya sa Asya. Pagsa kanyu ti papalad hanggan ti kahusayan ginan sa Diyus. Siya ti Diyus kaybi ginan hanggan kainda hanggan waya aban. Pagsa kanyu ti papalad ginan sa pitu ka Ispiritu sa arani tukawan Diyus.

⁵ Pagsa kanyu diman ti papalad ginan sa kan Hisu-Kiristu, imaw ti tutuu masarigan pag manugpadakit, ti un-an nabuhi uman ginan sa kamatayan, ti Hari tanan manga hari sa babaw daga. Pagmahalun niya kita ag dahil sa kay dugu pag irinibri niya kita sa kanta manga kasalanan.

⁶ Binwat niya kita usa ka nasyun manga hari ag manga manughandug hampay kita magsirbi sa Diyus, sa kay Ama ni Hisus. Pagsa kan Hisu-Kiristu ti kadayawan hanggan kamaskihan hanggan waya aban. Amin.

⁷ Tandaan gid niyu, rumas-ug yi si Hisus padara sa rurum sitay tag. Makitan siya tanan tawu, hanggan ti nagharug sa kay habig kumakit diman sa kanya. Ti tanan nasyun sa babaw daga lumumi dahil sa kanya. Pihu gid katida ti mangyari. Amin.

⁸ Kay sabi Panginuun Diyus magkun, “Aku ti Alpa ag ti Umiga. Aku ti Diyus taynguna, una kaybi ag aku ti rumas-ug aban, ti Makamaskihan sa tanan.”

Nakitan ni Huwan si Kiristu sa Kadayawan

⁹ Aku si Huwan, kanyu patar-ari. Magpakiusa kita sa kan Hisus, nakan parihu kita makalakaw sa kakurian, kanta gid pag agwantahun dahil sa kanta magpasakup sa kay paghari Diyus. Tinulak aku atag sa puru Patmus sa karaw-an dagat dahil sa kang magtudlu Bagaw Diyus imaw yi ti katutuuhanan kay ipinakilala ni Hisus.

¹⁰ Ati katpung pagka sa sirang Panginuun, sinakup aku Ispiritu Banal bag-u nadnugan niku sa kang magkaday-an may matnug pag bagaw ga budyung kay kadaka.

¹¹ Kay sabi, “Suratan nimu sa ribru ti kanmu makitan bag-u ipadara nimu inda sa pitu ka iglisya, ati sa banwa Ipisu, sa banwa Ismirna, sa banwa Tiyatira, sa banwa Sardis, sa banwa Piladilpiya hanggan sa banwa Laudisiya.”

¹² Nangaliwliw aku hampay bantayan niku ti magbagaw. Nakitan ngap niku may pitu ka sulu lunsay gintu.

¹³ May matindugan sa karaw-an pitu ka sulu kay histuda ga anyu tawu nakalambung aba sadsad sa raprapa, may huragkus gintu sa kay dubdub.

¹⁴ Malagti kay buhuk, ga burak kay kalagti ngatay ga snow, bag-u magduag ga apuy kay manga mata.

¹⁵ Magsinglaw kay manga lulud ga galang udyi may lakut, ipinalakaw yi sa apuy, pinakintab. Kay magbagaw ga danum magpaywas sa sapa.

¹⁶ Sa kay sikun may bitbit siya pitu ka pamgasan. Magluwang sa kay bibig ti usa ka baladaw matarum baliw-baliw may urup. Masilaw kay uyahun ga singgit init sa karaw-an sirang kay kasilaw.

¹⁷ Pagka nakitan niku siya, naplid aku kadaka ga namatay yi sa kay atubangan. Dapat ay kay kinup-an aku niya sikun pag kamang bag-u kay sinabi magkun, “Danga duy kawu magkadala. Aku ti gimpuunan, aku diman ti masawad.

¹⁸ Buhi aku, aku sitay namatay dapat bantayi nimu, aku buhi kainda, balaw yi aku mamatay hanggan waya aban. Sa kangku yi ti manga susi kamatayan hanggan ulian manga namatay.

¹⁹ Nakan ngani isurat nimu ti kanmu makitan, ti mangyari taynguna ag ti manga pihu mangyari waya aban.

²⁰ Inda kay kahulugan ti pitu ka pamgasan sa kang sikun pag kamang ag ti pitu ka sulu. Ti pitu ka pamgasan imaw ti manga anghil pitu ka iglisya ag ti pitu ka sulu gintu imaw ti pitu ka iglisya.”