Huwil 3 - Hanunuu

Parusahan ti manga Nasyun

¹ Magkun ti Panginuun, “Sa ati katpung pag udas nu iuli yi niku ti mayad pag kahamtangan sa Huda hanggan sa Hirusalim,

² tipunun niku ti tanan nasyun bag-u darahun niku sida sa Karatagan ni Husapat. Ati sida pagpihuun niku dahil sa kanda binwat sa kang nasakupan manga Israilita. Pinanwayak nida ti manga Israilita sa tuhay-tuhay pag nasyun ag hinuray-huray kang daga.

³ Nanlunggungan sida hampay huray-hurayun kang manga nasakupan, ipinabili nida panawuhun ti manga anak lalaki hanggan babayi hampay ibili intus bag-u ibayad sa babayi baraydan.

⁴ “Kamu pag manga taga Tiru, pag manga taga Sidun, hanggan ti tanan rugar sa Pilistiya, hintay inda ti pagbuwatun niyu laban sa kangku? Pagbalusan aw niyu aku sa manga binwat niku? Nu katunda, kadaka niku kamu balusan sa pagbuwatun niyu.

⁵ Dahil bin-ul niyu kang manga gintu ag pilak hanggan ti iba waya pag mahalaga kagamitan bag-u dinara niyu ati sa kanyu manga balay diyus-diyusan.

⁶ Ipinabili niyu sa manga Giriyigu ti manga nasakupan Huda hanggan Hirusalim bilang manga panawuhun, hampay mipakarayu niyu sida sa kanda sadili daga.

⁷ Dapat awatan niku sida makakalpas ginan sa kanyu nagpabilyan pag rugar, ag buwatun niku sa kanyu ti binwat niyu sa kanda.

⁸ Ipabili niku kanyu manga anak sa manga taga Huda bag-u ipabili maan nida sa manga taga Saba, ti mag-uli sa arayu pag rugar. Pihu gid mangyari inda, dahil aku, ti Panginuun, ti magsabi inda.”

⁹ Sabihun niyu sa manga nasyun, magkun: “Pag-alistu kamu sa paggira. Sabihi niyu kanyu manga sundalu hampay man-gira.

¹⁰ Kanyu manga sudsud aradu buwata talibung ag kanyu manga panggarab buwata bangkaw. Una ti malumuy kailangan lumaban diman.

¹¹ Pag-ataytag kamu, tanan nasyun sa sangput. Bag-u pagtiripunan kamu sa Karatagan ni Husapat.” Panginuun, paatiha yi kanmu kaban sundalu.

¹² Magkun ti Panginuun, “Kailangan garyahun ti manga nasyun sa palibut kuntay pag-atag sida sa Karatagan ni Husapat, dahil ati niku sida pag pihuun.

¹³ Ga manga aranyun sida kailangan garabun yi dahil lutu yi, aw ngatay ga ubas mahimu yi pigsun dahil punu yi ubas ti pirigsan. Masyadu yi lang sida daut; kanda kasalanan bilang ga pin-ga ubas maglapwas sa sukadan.”

¹⁴ Pagkayamu tawu ti ati sa Luung Kaparusahan, dahil arani yi rumas-ug ti sirang pag parusa Panginuun.

¹⁵ Dumulum ti init hanggan ti bulan, ag udyi rumayaw ti manga pamgasan.

¹⁶ Man-ngurub ga liyun ti Panginuun ginan sa Siun; mangurarug kay busis ginan sa Hirusalim. Nakan matandug ti daga hanggan ti langit. Dapat ti Panginuun ti mapag-un pag darangpan manga Israilita, kay nasakupan.

Manga Papalad sa manga Nasakupan Diyus

¹⁷ “Maalaman niyu manga taga Huda kuntay aku, ti Panginuun niyu Diyus, mag-uli sa Siun, sa kang banal pag bantud. Bag-u bumaliw maan banal ti Hirusalim; udyi umanun girahun taga iba nasyun.

¹⁸ Sa ati katpung pag udas, papaladan niku kamu. Umabunda kanyu bag-u intus ginan sa mayamu pag ubas sa kabantudan, umabunda diman kanyu gatas ginan sa mayamu baka hanggan kambing magharab sa manga tagudtud. Udyi mak-atan kanyu manga laad hanggan sapa. Bumulus ti bulbugan ginan sa Balay Panginuun. Imaw ti maglantap sa manga nak-at pag bululusan danum sa may manga puun akasya.

¹⁹ “Ti Ihiptu bumaliw mapanglaw pag rugar ag ti Idum bumaliw pangawakawaan, dahil inunu-unu nida ti manga taga Huda; minatay nida ti manga tawu unman may kasalanan.

²⁰ Dapat ti Huda hanggan ti Hirusalim ulianan hanggan waya aban.

²¹ Ibalus niku kang manga nasakupan minatay. Parusahan niku ti manga nagbuwat daut sa kanda. Aku ti Panginuun mag-uli sa Siun.”