Huwil 2 - Hanunuu

Ti Parusa Panginuun parihu sa Pagrugpu manga Apan

¹ Uypun niyu ti budyung hampay pasandaman ti manga tawu sa Siun, ti banal pag bantud Panginuun. Tanan kamu pag mag-uli sa Huda, takigan kamu sa dala, dahil arani yi gid ti sirang parusahan kamu Panginuun.

² Marurum ag madulum sa ati aban pag sirang. Ti kagadhan ag makapangyarihan pag manga apan rumas-ug ag mamululagan sa kabantudan parihu sa singgit init nu magbutlak sa surip. Udwaya may nangyari ga kainda ginan kaybi, ag balaw yi may mangyari ga kainda tugka aban.

³ Dasun-dasun rinmugpu ti manga apan ga apuy. Bag-u sida rinmas-ug, ti daga parihu sa halamanan Idin. Pat-ay pagka rinugpuan nida nagbaliw ga pangawakawaan. Unman sida may sinawadan.

⁴ Ga kabayu kanda histuda, maliksi sida ga manga kabayu pan-gira.

⁵ Kay tunug kanda mag-utbaw sa babaw manga bantud ga manga kalisa magpalalagiwan ga tunug magkairub dayami. Parihu sida sa makapangyarihan pag sundalu alistu man-gira.

⁶ Ti manga tawu makakit sa kanda manlapsi sa dala.

^7-8 Magsalakay sida ag magdayik sa manga alad batu ga manga sundalu. Diritsu kanda lakaw ag unman magsimray sa kanda lakawan. Balaw sida magtululangan, una masulang nida ti manga armas kalaban unman sida magbululagan.

⁹ Pagsalakayun nida ti banwa, pagdaykun waya ti manga alad batu. Pagdaykun waya nida ti manga balay ag maglakaw sa manga gaha ga mananakaw.

¹⁰ Magkatandug ti daga hanggan ti langit sa kanda magras-ug. Magdulum ti init hanggan ti bulan, ag magkadura kay rayaw ti manga pamgasan.

¹¹ Pagsuguun Panginuun kay manga sundalu, ti kagadhan ag makapangyarihan pag manga apan magsunud sida sa kay sugu. Madala ti sirang pagparusa Panginuun. Unman gid may umagwanta inda!

Padnug kuntay Pagbalik sa Diyus

¹² Magkun ti Panginuun, “Pagbalik kamu sa kangku sa buu niyu tagipusuun, danga maghandum karan-unun, paglumi ag pagpanrukuan.

¹³ Pag-ampu kamu sa buu niyu tagipusuun ag balaw pabalhinguun lang pag patawad sa panab-anan paggisi kanyu manga rutay. Pagbalik kamu sa Panginuun niyu Diyus, dahil maawaun siya ag marapasunaidun. Maawaun siya balaw magalitun. Alistu siya umanun kay isip hampay balaw yi mamadara parusa.

¹⁴ Barang ngani bumag-u kay isip ag papaladan kamu abunda pag ani, hampay makahandug kamu sa Panginuun niyu Diyus manga butir hanggan intus.

¹⁵ “Uypun niyu ti budyung sa Siun hampay ipasandam sa manga tawu kuntay pagtipun sida ag danga maghandum karan-unun.

¹⁶ Tipuna niyu ti manga tawu hampay buwatun ti tun-anun sa paglumpiyu sa kanda sadili, anak man ngatay gurangun, una ti manga lapsag hanggan ti manga bag-u mag-asawa.

¹⁷ Ti manga manughandug magsirbi sa Panginuun paglumi sa karaw-an harandugan hanggan sa sarakahan Balay Diyus, ag pandarangin sida kaindaay: ‘Panginuun, pagkaawa kawu sa manga tawu kanmu nasakupan. Danga nimu pahintulutan pakay-ahun sida ag aringun iba nasyun magkumun, “Naan yi kanyu Diyus?” ’ ”

Papaladan Panginuun ti Huda

¹⁸ Mapinasunaidun gid ti Panginuun sa kay banwa, ag magkaawa siya sa kay nasakupan.

¹⁹ Bilang sagut sa kanda darangin sabihun niya sa kanda, “Pakan-an niku kamu manga ani, manga irinmun ubas, hanggan manga lana ulibu, ag mabsug yi kamu. Udyi niku pasnuan pakay-ahun kamu iba nasyun.

²⁰ Paighitun niku ti manga man-gira sa kanyu ginan sa kanaway ag itibu niku sida sa pangawakawaan. Bugawun niku ti kabag-u nida pag kaban tag sa Dagat Namatay ag ti uryan pag kaban bugawun niku tag sa Dagat Miditiranyu. Ag mabuyuk kanda manga bangkay.” Makadululaw gid ti binwat Panginuun.

²¹ Danga magkadala ti taga daga Huda, bagkus ngap ikabaya gid inda dahil makadululaw ti binwat Panginuun.

²² Danga magkadala ti manga hayup, dahil malatuy yi ti manga ilamnun sa pasturan ag magburak yi ti manga puun kayu, hanggan ti igus. Magburak yi waydi ti manga ubas.

²³ Kamu manga taga Siun, pagbaya kamu sa binwat Panginuun niyu Diyus sa kanyu. Dahil pinadarahan niya kamu un-an pag uran ag nadasnan waya tunda parihu sa kabag-u agud mipakakit kay katadlungan.

²⁴ Mapnu ani ti manga giriukan, ag lumapwas ti irinmun ubas hanggan ti lana ulibu sa manga pirigsan.

²⁵ Dahil pagsabihun Panginuun, “Iuli niku ti tanan nadura sa kanyu katpung dinaut kanyu manga pananum dasun-dasun pag kaban manga apan. Aku ti nagpadara sa kanyu inda pag kaban apan imaw ti kang sundalu.

²⁶ Abunda kamu kainda sa karan-unun ag pihu gid mabsug kamu. Nu katida, dayawun niyu aku kanyu Diyus, ti nagbuwat manga makadululaw para sa kanyu. Kamu kang nasakupan balaw yi gid mangay-a hanggan aban.

²⁷ Bag-u maalaman niyu manga taga Israil aku kanyu kaibahan, ag aku lang ti Panginuun niyu Diyus ag udyi may iba waya. Kamu kang nasakupan balaw yi gid mangay-a hanggan aban.”

Ti Awat Ispiritu

²⁸ “Bag-u ipakaun niku kang Ispiritu sa tanan tawu. Kanyu manga anak lalaki hanggan babayi manpadakit kang manga bagaw. Kanyu manga gurangun lalaki managin-up, ag kanyu manga kan-akan makakit manga pangakakitun.

²⁹ Sa ati pag manga sirang, ipakaun niku kang Ispiritu sa manga suruguun lalaki hanggan babayi.

³⁰ Mamakakit aku manga makadululaw sa langit hanggan sa daga: May makitan dugu ag apuy, hanggan talimbuuk anus.

³¹ Dumulum ti init ag rumagang ti bulan ga dugu. Matupad inda bag-u rumas-ug ti madala pag sirang pagparusa Panginuun.”

³² Dapat una si unu ti manhagad awat sa Panginuun maribri di sa sintinsiya aban. Dahil angay sa binagaw Panginuun, may masawad di manga Israilita sa Bantud Siun, imaw ti Hirusalim. Sida ti manga pinili Panginuun hampay maribri.