Huwil 1 - Hanunuu

¹ Inda ti bagaw Panginuun kay itinultul sa kan Huwil kay anak ni Pituwil.

Dinaut manga Apan ti manga Tanum

² Kamu pag manga paggurangunun sa Huda hanggan sa tanan niyu nasakupan, patingihi niyu kang sabihun sa kanyu. Unman waya may nangyari parihu sa inda katpung kaudasan niyu manga ginurang una sa kaudasan niyu taynguna.

³ Kailangan itultul inda sa kada sinulput niyu manga lahi.

⁴ Dasun-dasun rinmugpu ti kaban manga apan. Ti nasawad pag manga tanum balaw natabu nakaun un-an kaban apan kinaun maan manga dinmasun pag kaban apan tugka sa natabu ti manga tanum.

⁵ Kamu pag manga manuglangu, pagbangun kamu bag-u paglumi ka matnug! Dahil unman yi kamu may irinmun; unman yi may ubas buwatun intus.

⁶ Dahil kang daga dinaut kagadhan ag makapangyarihan manga apan. Matarum kanda manga ngipun ga manga ngipun liyun.

⁷ Dinaut nida kang manga tanum ubas hanggan ti manga puun igus. Inarit-it nida kay lukub manga tanum tugka sa linmagti kay manga sanga.

⁸ Paglumi kamu parihu sa usa ka daraga nakasulung saku dahil sa pagkamatay niya arasawan-un pag kan-akan.

⁹ Dahil unman yi may butir maani aw ngatay irinmun intus handug sa Balay Panginuun; nakan ngani maruku ti manga magsirbi sa kanya pag manga manughandug.

¹⁰ Nagkaradaut ti manga tanman ga tawu magpanrukuan. Nagkaradaut ti manga ani ag udyi may irinmun ubas hanggan lana ulibu.

¹¹ Kamu pag manga manugtanman, kailangan kamu manruku! Kamu pag manga manug-asikasu ubasan, paglumi kamu ka matnug! Dahil nadaut ti aranyun manga tirigu hanggan sibada.

¹² Nalayung ti manga tanum ubas, ti tanan puun kayu, hanggan ti manga igus, ti pumigranata, ti palma, ag ti mansanas. Ungud nadura yi gid ti kasulungan manga tawu.

Padnug sa Pag-ampu

¹³ Kamu pag manga manughandug magsirbi sa harandugan niku Diyus, pagsulung kamu saku bag-u pag-atag sa Balay Diyus ag paglumi buu yabi. Dahil unman yi may butir maani aw ngatay intus handug sa Balay niyu Diyus.

¹⁴ Sabihun niyu sa manga paggurangunun sa Huda hanggan sa tanan niya nasakupan, pag-atag sida tanan sa Balay Panginuun nida Diyus danga maghandum karan-unun. Paghagad sida awat sa Panginuun.

¹⁵ Malu, arani yi ti sirang pagparusa Panginuun Makamaskihan.

¹⁶ Nakitan yi nita nu kabitay kita naduraan karan-unun ag nu kabitay nadura ti kasulungan sa Balay Diyus.

¹⁷ Nadaut ti manga binhi sa tigangan pag daga. Dahil nalayung ti manga butir, unman may sukad ti balay haramnuan, nakan nadaut lang tanan.

¹⁸ Mag-iringaan ti manga hayup dahil sa kalun-usan. Naglinakaw ti manga baka maghanap manga hararabun, hanggan ti manga karanidu magkakuri diman.

¹⁹ Nandarangin si Huwil. Magkun siya, “Panginuun, magtawag duy aku sa kanmu, dahil nalayung yi ti manga hararabun hanggan ti tanan puun kayu sa katanmanan, ga nairub yi apuy.

²⁰ Una manga hayup sa kapuruan magdangup sa kanmu, dahil uga yi masyadu ti manga sapa hanggan ti manga laad, ag nalayung yi waydi ti manga hararabun, ga nairub apuy.”