Huwan 7 - Hanunuu

Unman Naniwala sa kan Hisus kay manga Patar-ari

¹ Bag-u namalibutan nanudlu si Hisus sa daga Galiliya. Unman siya may gustu mamalibutan sa manga banwa sa daga Hudiya, dahil ti manga pinunu Hudiyu maghanap yi paraan hampay siya kanda matyun.

² Ati katpung arani yi ti Kapistahan manga Hudiyu, ti Kapistahan sa manga Payag.

³ Nakan sinabi niya manga patar-ari sa kan Hisus magkun, “Pag-ighit yi duy atay ginan pag daga, pag-ati kawu sa Hudiya, hampay makitan nimu manga tuludluan ati kanmu manga pagbuwatun.

⁴ Unman may tawu mataguan kay buwat nu gustu dayawun siya tanan tawu. Nu kanmu yi lang waydi pagbuwatun inda pag manga bagay, pakakitan yi lang nimu sa manga tawu.”

⁵ Dahil una kay manga patar-ari unman diman nagsarig sa kanya.

⁶ Nakan sinabi ni Hisus sa kanda magkun, “Udwaya kainda kang taning pag udas, dapat nu para sa kanyu una kapira pag udas mahimu di.

⁷ Ti manga tawu taga kalibutan unman may pag-ikadaut sa kanyu. Dapat aku kanda pagkadat-an, dahil pirmi pag-ipaburayhaw niku kanda manga buwat daut.

⁸ Kamu yi ngani ti pag-ati sa Kapistahan. Balaw aku atag, dahil udwaya rinmas-ug kainda kang taning pag udas.”

⁹ Pagka sinabi niya tunda sa kay manga patar-ari napatayak waya siya sa Galiliya.

Nag-ati si Hisus sa Kapistahan sa manga Payag

¹⁰ Pagka nag-ati yi sa Kapistahan kay manga patar-ari, si Hisus nag-ati waydi, dapat balaw siya nag-ati sa hayagan. Naglihus siya hampay unman makilala manga tawu.

¹¹ Paghanapun siya manga pinunu Hudiyu ati sa Kapistahan. Magkun sida, “Naan yi nguna tunda pag tawu?”

¹² Paglibakun yi siya mayamu tawu. Magkun ti iba, “Mayad gid pag tawu siya.” Ti iba magkun, “Bukun ngap mayad tunda, pagpatalangun ngap niya ti kayamuan tawu.”

¹³ Dapat kanda pagsabihun tungkul sa kan Hisus unman pag-ipadnug nida sa manga iba dahil magkadala sida sa manga pinunu Hudiyu.

¹⁴ Pagka magpanungatunga yi ti kasirangan Kapistahan, nag-ati si Hisus sa Balay Diyus bag-u nanudlu siya sa manga tawu ati.

¹⁵ Naglingut gid ti manga pinunu magkun, “Kabitay pag nakatau inda pag tawu kadunungan, madi unman may nanudlu sa kanya?”

¹⁶ Nagsagut si Hisus magkun, “Kang pag-itudlu balaw kang sadili pag kadunungan. Kang pag-itudlu ginan ngap sa Diyus sa nagsugu sa kangku.

¹⁷ Una hintay pag tawu nu handa siya magtupad sa kagustuhan Diyus, makilala niya kang pag-itudlu nu ngatay ginan sa Diyus aw ngatay magbagaw aku ginan lang sa kang sadili.

¹⁸ Nu kay pagbagawun tawu ginan lang sa kay sadili naisipan, kay gustu siya ti dayawa manga tawu. Dapat nu kay gustu manugtudlu hampay dayawun ngap manga tawu ti nagsugu sa kanya, pihu gid pag-itudlu niya ti katutuuhanan unman may pabalhingu.”

¹⁹ Sinabi ni Hisus magkun, “Unman aw ipinakaun ni Muysis sa kanyu ti Kasuguan? Dapat sa kanyu tanan unman may magtupad sa Kasuguan una di usa. Hayga aku kanyu pagkaibgan matyun?”

²⁰ Nagsagut ti manga tawu, “Inapuan baga kawu labang. Hintay pag tawu tigkaibug magmatay sa kanmu?”

²¹ Sinabi maan ni Hisus magkun, “Pagka usa di waya ka makadululaw kang binwat, naglingut gid kamu tanan.

²² May bilin si Muysis sa kanyu kailangan turiun niyu kanyu manga anak. Nu sa ungud balaw tunda ginan sa kan Muysis. Daan di tunda pag ugali inumpisahan kaybi di waya manga ginurang. Nakan pagturiun niyu ti manga anak lalaki una sa Sirang Pamahari.

²³ Nu kanyu pagturiun ti usa ka anak una sa Sirang Pamahari hampay tupadun niyu kan Muysis Kasuguan, bati hayga magkagalit kamu sa kangku dahil lubus pinaayad niku ti usa ka tawu sa Sirang Pamahari?

²⁴ Danga yi pagpihua niyu ti daut ti mayad angay lang sa kanyu makitan sa mata. Pihua niyu ti daut ti mayad angay sa katutuuhanan.”

Magtalinduwa ti manga Tawu tungkul sa kan Hisus

²⁵ Ti iba manga taga Hirusalim magkun, “Unman aw lugud tunda yi ngani pag tawu ti kanda pagkaibgan matyun?

²⁶ Dapat malu, maghampang diman siya sa atubangan kayamuan tawu ag unman may pagsabihun ti manga pinunu sa kanya. Magkakilala yi aw nguna ungud manga pinunu kuntay siya yi ti Pinili Diyus Manugribri pag Hari?

²⁷ Dapat nu rumas-ug aban ti Pinili Diyus Manugribri pag Hari unman may tawu makaalam nu taga naan siya. Inda bay pag tawu alam nita tanan nu taga naan siya.”

²⁸ Nakan sa kay magtudlu sa manga tawu sa Balay Diyus, nagbagaw si Hisus daraka buka magkun, “Kilala aw gid niyu aku? Alam aw niyu nu taga naan aku? Unman aku nagsitay sa sadili lang niku kagustuhan. Dapat masarigan gid ti Ama ti nagsugu sa kangku. Unman lang niyu siya nakilala.

²⁹ Kilala gid niku siya, dahil aku ginan sa kanya ag siya diman ti nagsugu sa kangku.”

³⁰ May manga tawu kanda mana pagkaibgan dakpun si Hisus, dapat unman may makadakup sa kanya dahil udwaya rinmas-ug kay taning pag udas.

³¹ Dapat sa kayamuan tawu mayamu ti nagsarig sa kanya magkun, “Nu rumas-ug ti Pinili Diyus Manugribri pag Hari, buwatun aw lugud niya lalu waya mayamu pag tanda bukun lang ga tunda pag tawu kay binwat? Dayu ngap mahimu.”

Sinugu ti manga Guwardiya hampay Dakpun si Hisus

³² Naalaman manga Parisiyu ti sarabihun manga tawu tungkul sa kan Hisus, nakan sida hanggan ti manga pangulu manughandug nagpasugu sa manga guwardiya nida hampay kanda dakpun si Hisus.

³³ Nakan sinabi ni Hisus magkun, “Kaibahan waya niyu aku dapat balaw yi dugay aban bag-u umighit yi aku sitay ginan atabug sa Ama sa nagsugu sa kangku.

³⁴ Hanapun niyu aku aban, dapat unman niyu makitan, dahil unman kamu makaati sa kang ulian aban.”

³⁵ Bag-u nagharampangan ti manga pinunu Hudiyu magkun, “Naan tag nguna inda pag tawu kay gayak nakan unman makitan nita siya? Barang siya atag sa luwas daga Israil sa manga Hudiyu mag-uli sa manga banwa manga balaw Hudiyu bag-u manudlu sa manga balaw Hudiyu.

³⁶ Magkun kabay siya, kita humanap sa kanya, dapat dayu nita siya makitan. Unman diman kunu kita makaati sa kay ulian aban. Hintay nguna kay ibug sabihun?”

Ti Danum ti Makapakaun Tutuu pag Buhi

³⁷ Pagka sa katapusan yi pag sirang Kapistahan imaw yi ti pinakamahalaga pag sirang, ati katpung tinmindug si Hisus bag-u sinabi niya sa daraka buka magkun, “Una hintay pag tawu nu magkauwaw, pagsitay siya sa kangku, pag-inum.

³⁸ Parihu sa isinurat sa Banal Kasuratan, nu ti tawu magsarig sa kangku, bumulus ginan sa kay tagipusuun ti danum makapakaun tutuu pag buhi sa manga tawu.”

³⁹ Kay pagtukuyun ni Hisus ti Ispiritu ti matanggap manga tawu nu sida magsarig sa kanya. Ati katpung udwaya ipinakaun ti Ispiritu dahil udwaya nangyari una kay pagkamatay ni Hisus una kay pagkabuhi uman may kadayawan.

Magkabululag ti Naisipan manga Tawu tungkul sa kan Hisus

⁴⁰ Pagka nadnugan manga iba sa kayamuan inda pag manga bagaw ni Hisus sinabi nida magkun, “Tutuu katna inda yi ti Purupita kanta pag-alagdun.”

⁴¹ Sinabi manga iba magkun, “Siya yi ngani ti Pinili Diyus Manugribri pag Hari.” Dapat magkun maan ti manga iba, “Ti Pinili Diyus Manugribri pag Hari balaw sumitay ginan sa Galiliya.

⁴² Isinurat kabay sa Banal Kasuratan ti Pinili Diyus Manugribri pag Hari aban linahi ni Hari Dabid, ianak siya sa banwa Bitlihim, sa kay inulian kaybi ni Dabid.”

⁴³ Nakan magkabululag ti naisipan manga tawu tungkul sa kan Hisus.

⁴⁴ May manga tawu ati kanda gustu siya dakpun yi, dapat unman may tawu nakadakup sa kanya.

Ti manga Pinunu Hudiyu unman Nagsarig sa kan Hisus

⁴⁵ Nagbalik maan ti manga pulis tag sa manga pangulu manughandug hanggan sa manga Parisiyu. Pinmaingana sida sa manga pulis magkun, “Hayga duy unman dinara niyu siya?”

⁴⁶ Sinmagut ti manga pulis magkun, “Una kaybi ginan unman may tawu magbagaw katida kay kaayad.”

⁴⁷ Nagsabi maan ti manga Parisiyu magkun, “Kamu barang pinatalang yi waydi niya.

⁴⁸ Kabay una sa manga pinunu una sa manga Parisiyu unman may magsarig sa kanya una di usa.

⁴⁹ Tunda lang pag manga tawu ti unman makaalam sa Kasuguan ti magsarig sa kanya, pihu sida ipadamhak sa kaparusahan.”

⁵⁰ Ati diman sa kanda ti usa ka Parisiyu si Nikudimu, imaw ti nag-ati sa kan Hisus kaybi. Sinabi ni Nikudimu sa kanda magkun,

⁵¹ “Nu angay sa Kasuguan nita, dayu gid mahimu sintinsiyahan nita ti usa ka tawu nu udwaya nadnugan nita kay pagsabihun ag nu udwaya inusisa nita kay manga pagbuwatun.”

⁵² Magkun ti manga iba sa kan Nikudimu, “Kawu lugud taga Galiliya diman aw waydi? Suyasida gid nimu ti Banal Kasuratan, bag-u maalaman nimu unman may purupita lumuwang ginan sa Galiliya.” [

⁵³ Pagkatapus tunda, nag-inululi yi sida tanan.]