Huwan 6 - Hanunuu

Pinakan-an Karan-unun ti Lima ka Libu Tawu

¹ Bag-u nagdipay si Hisus sa danaw Galiliya, kay usa ka ngaran danaw Tibiryas.

² Kadamlan tawu ti nagkuyug sa kan Hisus, dahil nakitan nida kay makapangyarihan pag manga tanda sa kay magpaayad sa may manga sakit.

³ Nagtukad si Hisus sa usa ka bantud kaibahan niya kay manga tuludluan bag-u siya tinmukaw ati.

⁴ Ati katpung arani yi ti Kapistahan manga Hudiyu sa Pag-alaala sa Karibrihan.

⁵ Pagka nagbantay si Hisus, nakitan niya ti kadamlan tawu magpakarani sa kanya. Nakan pinmaingana siya sa kan Pilipi magkun, “Naan pag makabili kita karan-unun kang-ud hampay ipakaun sa tunda pag manga tawu tanan-tanan?”

⁶ Inda kay sinabi sa kan Pilipi bilang kay lang subuk dahil daan alam ni Hisus nu hintay kay buwatun sab.

⁷ Nagsagut si Pilipi magkun, “Sa kayamuun duy nida, una kaupahan walu ka bulan tarabahu usa ka tawu kurang di ipakaun sa kanda.”

⁸ Ti usa ka tuludluan niya, si Andiris, kan Simun Pidru patar-ari, nagsabi sa kan Hisus magkun,

⁹ “May anak lalaki atay may balun lima ka tinapay ag duwa ka isda. Dapat kabitay lang pag kumang-ud tunda sa kainda kay kayamu pag manga tawu?”

¹⁰ Sinabi ni Hisus magkun, “Sabihi niyu ti manga tawu pagtukaw sida.” Mapadang ngani ati pag rugar. Nakan tinmukaw ti manga tawu. Ti manga lalaki lang lima yi ka libu siyun.

¹¹ Bin-ul ni Hisus ti manga tinapay, nagpasalamat siya sa Diyus, bag-u kay inayaw-ayaw sa manga tawu matukawan ati. Kumun diman kay binwat sa manga isda. Pinasugtan kanda gustu sa kaun.

¹² Pagka nabsug sida tanan, sinabi ni Hisus sa kay manga tuludluan magkun, “Tipuna duy niyu ti nasawad manga pinikapika tinapay hampay balaw mauyang una lang diit.”

¹³ Nakan kanda tinipun ti manga pinikapika pag tinapay. Kanda sawad nagkan-an sampulu may duwa ka luwak punu.

¹⁴ Pagka nakitan manga tawu tunda pag tanda kay binwat ni Hisus, sinabi nida magkun, “Inda yi ngani ti Purupita ti itinaratu kaybi ti sumitay.”

¹⁵ Alam di ni Hisus kanda gayak magpakarani sa kanya bag-u siya bul-un sa pilitan buwatun hari. Nakan linmakaw siya usa-usa atag maan sa bantud.

Naglakaw si Hisus sa Babaw Danum

¹⁶ Pagka malambung yi nag-ati ti manga tuludluan ni Hisus atag sa danaw.

¹⁷ Nagsakay sida sa usa ka duunduun hampay dumipay maan atag sa Kapirnaum. Yabi yi ag udwaya rinmas-ug si Hisus sa kanda.

¹⁸ Daraka paman ti humbak sa danaw dahil mabisug ti bagyu.

¹⁹ Nakabugsay yi ti manga tuludluan manga lima aw ngatay unum ka kilumitru ginan sa saruy bag-u nakitan nida si Hisus maglakaw sa babaw danum, magpakarani sa duunduun. Nadala gid sida masyadu.

²⁰ Dapat sinabi niya sa kanda, “Aku di, danga kamu magkadala.”

²¹ Nagbaya sida nagpasakay sa kan Hisus sa duunduun. Susun rinmas-ug ngap ti duunduun sa baybay kanda pagtuyuun.

Nag-usig sa kan Hisus ti Kayamuan Tawu

²² Pagka surip siyun waya ti kadamlan tawu natayak sa baliw dipay danaw. Kaaldaw usa lang ka duunduun kanda nakitan ag alam nida si Hisus unman kinmuyug sa kay manga tuludluan sa duunduun. Sida lang ti nagsakay.

²³ Dapat may manga duunduun rinmas-ug ginan sa Tibiryas sa arani nida kinan-an tinapay pag rugar sa katpung nagpasalamat ti Panginuun.

²⁴ Pagka nakitan manga tawu udyi siyun si Hisus una hanggan kay manga tuludluan, nagsakay ti manga tawu sa manga duunduun nag-ati sida sa Kapirnaum hampay hanapun si Hisus.

Si Hisus ti ga Karan-unun Makapakaun Buhi sa Tawu

²⁵ Pagka nakadipay ti manga tawu sa danaw, nakitan ngani nida si Hisus. Bag-u pinmaingana sida sa kanya magkun, “Maisturu, kapira kawu pag rinmas-ug sitay?”

²⁶ Sinmagut si Hisus magkun, “Ungud duy kang pagsabihun sa kanyu, nakan lang kamu maghanap sa kangku dahil kamu nabsug sa kanyu nangaun tinapay, balaw dahil naintindihan niyu kang binwat manga tanda.

²⁷ Danga kamu magbudlay tungkul lang sa karan-unun magkabangsiw. Pagmasigasid kamu hampay matanggap niyu ti karan-unun unman magkabangsiw, imaw ti makapakaun tutuu pag buhi unman may katapusan. Tunda ngani pag karan-unun ti ipakaun Anak Tawu sa kanyu dahil may tinanggap siya karampatan ginan sa Diyus Ama.”

²⁸ Bag-u pinmaingana maan ti manga tawu sa kan Hisus magkun, “Hintay nguna ti dapat nimi buwatun hampay magtupad kami sa buruwatun angay sa kay kagustuhan Diyus?”

²⁹ Sinmagut si Hisus magkun, “Inda ngani kay gustu Diyus kanyu buwatun, pagsarig kamu sa kay sinugu Diyus.”

³⁰ Sinabi nida sa kan Hisus, “Hintay pag tanda kanmu buwatun hampay maghiling kami bag-u kami sumarig sa kanmu. Hintay kanmu buwatun?

³¹ Kanmi manga ginurang may kinaun mana pag karan-unun kaybi ati sa pangawakawaan, parihu sa isinurat sa Banal Kasuratan magkun, ‘Pinakan-an niya sida karan-unun ginan sa langit.’ ”

³² Bag-u sinmagut si Hisus magkun, “Ungud duy kang pagsabihun sa kanyu, balaw duy si Muysis ti nagpakaun karan-unun sa kanyu ginurang ginan sa langit. Kang Ama di ngap tigpakaun tutuu pag karan-unun ginan sa langit sa kanyu.

³³ Dahil ti karan-unun pag-ipakaun Diyus imaw ngani tigpakababa ginan sa langit magpakaun tutuu pag buhi sa manga tawu sa babaw daga.”

³⁴ Sinabi maan nida sa kan Hisus magkun, “Pirmi duy kami pagpakan-i nimu tunda pag karan-unun.”

³⁵ Bag-u sinabi ni Hisus sa kanda magkun, “Aku ti ga karan-unun makapakaun buhi sa manga tawu. Tigpasakup sa kangku balaw yi lun-usun, tigsarig sa kangku dayi uwawun una hanggan aban.

³⁶ “Dapat sinabi yi niku sa kanyu, madi nakitan yi niyu aku, unman kamu nagsarig.

³⁷ Una si unu pag tawu nu iinintirga Ama sa kangku, pumasakup ngani tunda sa kangku. Ti tawu nu pumasakup sa kangku balaw kang dayuun.

³⁸ Dahil aku nagsitay ginan sa langit balaw hampay masunud niku kang sadili kagustuhan, bagkus ngap hampay tupadun niku ti kagustuhan Diyus imaw ti nagsugu sa kangku.

³⁹ Diyus ti nagsugu sa kangku hampay tupadun niku inda pag kagustuhan niya magkun, danga pagduraa niku una lang usa sa tanan manga tawu iinintirga niya sa kangku. Bagkus ngap buhiun niku sida uman sa katapusan panahun aban.

⁴⁰ Dahil inda yi ngani ti kagustuhan niku Ama hampay una si unu pag tawu ti nakakit sa Anak bag-u nagsarig sa kanya, makatanggap tutuu pag buhi unman may katapusan. Buhiun niku siya uman sa katapusan panahun aban.”

⁴¹ Bag-u nagharampangan ti manga Hudiyu naglibak tungkul sa kan Hisus dahil sa kay sinabi magkun, “Aku ti ga karan-unun nagsitay sa babaw daga ginan sa langit.”

⁴² Sinabi nida magkun, “Unman aw lugud inda pag tawu si Hisus, kay anak ni Husi? Kilala nita kay ama hanggan kay ina. Kabitay lugud pag masabi niya kuntay siya nagsitay ginan sa langit?”

⁴³ Nagsagut si Hisus magkun, “Danga yi duy kamu magpakaharampangan sa libak.

⁴⁴ Unman may tawu makapasakup sa kangku purya lang nu siya butungun niku Ama, imaw ti nagsugu sa kangku. Bag-u buhiun niku siya uman sa katapusan panahun aban.

⁴⁵ “Isinurat sa Ribru manga Purupita magkun, ‘Sida tanan-tanan tudluan Diyus.’ Una hintay pag tawu nakadnug ag nagpatudlu sa Ama, pumasakup sa kangku.

⁴⁶ Balaw kuntay may tawu nakakit sa Diyus, purya lang ti nagsitay ginan sa Diyus. Siya lang ti nakakit sa Ama.

⁴⁷ “Ungud duy kang pagsabihun sa kanyu, una hintay pag tawu nu sumarig, may tutuu pag buhi unman may katapusan.

⁴⁸ Aku ti ga karan-unun makapakaun buhi sa manga tawu.

⁴⁹ Kanyu manga ginurang kaybi nagkaun mana pag karan-unun kanda sa pangawakawaan dapat sida nagkaramatay diman.

⁵⁰ Dapat tuhay ti karan-unun magsitay ginan sa langit. Nu kan-un tawu inda pag karan-unun, balaw yi siya mamatay.

⁵¹ Aku ti nagsitay ginan sa langit ga karan-unun makapakaun buhi. Nu kan-un tawu inda pag karan-unun, may tutuu pag buhi siya unman may katapusan. Ti karan-unun kang ipakaun imaw yi kang bilug sa ikabuhi manga tawu sa babaw daga.”

⁵² Nakan magpirirdihan ti manga Hudiyu magkun, “Kabitay lugud pag mipakaun inda pag tawu kay bilug hampay kanta kan-un?”

⁵³ Sinabi ni Hisus sa kanda magkun, “Ungud duy kang pagsabihun sa kanyu, unman kamu may tutuu pag buhi purya lang nu kan-un niyu kay bilug Anak Tawu ag nu inmun niyu kay dugu.

⁵⁴ Una si unu pag tawu nu kan-un niya kang bilug, inmun kang dugu, may tutuu pag buhi unman may katapusan. Buhiun niku siya uman sa katapusan panahun aban.

⁵⁵ Dahil kang bilug ungud gid karan-unun, kang dugu ungud gid irinmun.

⁵⁶ Nu ti tawu magkaun kang bilug, mag-inum kang dugu nipausa siya sa kangku, aku nipausa waydi sa kanya.

⁵⁷ “Ti Ama ti may gimpuunan buhi. Siya ti nagsugu sa kangku. Dahil sa Ama aku hanggan may gimpuunan buhi. Katunda diman waydi ti tawu nu magkaun siya kang bilug may tutuu siya pag buhi dahil sa kangku.

⁵⁸ Inda yi ngani ti karan-unun nagsitay ginan sa langit. Balaw parihu sa karan-unun kinaun kaybi niyu manga ginurang, bag-u pagka dugay namatay diman sida. Nu bay inda pag karan-unun ti kan-un tawu, may tutuu pag buhi siya unman may katapusan.”

⁵⁹ Inda kay sinabi ni Hisus sa kay magtudlu sa manga tawu sa simbahan manga Hudiyu sa banwa Kapirnaum.

Ti manga Bagaw Makapakaun Buhi sa manga Tawu

⁶⁰ Pagka nadnugan nida kay manga itinudlu ni Hisus, mayamu tuludluan nagsabi magkun, “Madalum maaw inda pag manga itinudlu niya. Hintay ti may mananggap tunda?”

⁶¹ Madi unman may nagtultul, alam di waydi ni Hisus magrayansan kay manga tuludluan. Nakan sinabi niya sa kanda magkun, “Mag-alinlangan aw kamu dahil sa kang manga sinabi sa kanyu?

⁶² Kabitay nguna kamu nu makitan niyu aban ti Anak Tawu muli maan tag tungud sa kay ulian kaybi?

⁶³ Ispiritu Diyus ti may gimpuunan buhi. Nu tawu lang unman makapakaun buhi. Nu tanggapun niyu kang manga bagaw, matanggap waydi niyu ti Ispiritu imaw ti makapakaun buhi sa kanyu.

⁶⁴ Dapat ti iba sa kanyu unman magsarig.” Dahil ginan waya sa umpisa niya magtudlu, alam di ni Hisus nu hintay pag manga tawu ti unman magsarig ag nu si unu ti pumakampi sa kay manga kalaban.

⁶⁵ Sinabi ni Hisus magkun, “Nakan ngani sinabi yi niku sa kanyu, unman may tawu pumasakup sa kangku purya lang nu ipahintulut niku Ama.”

⁶⁶ Siyun ginan mayamu pag tuludluan nag-urung yi, udyi nagkuyug sa kanya.

⁶⁷ Bag-u nagpaingana si Hisus sa kay sampulu may duwa ka tuludluan magkun, “Kabitay kamu, magkaibug aw diman kamu mag-urung yi?”

⁶⁸ Sinmagut si Simun Pidru, magkun, “Panginuun, hintay waya gid kanmi dangpan? Kanmu sinabi pag manga bagaw ti makapakaun tutuu pag buhi unman may katapusan sa manga tawu.

⁶⁹ Nagsarig duy kami sa kanmu, dahil nakilala nimi kawu ti Banal pag sugu ginan sa Diyus.”

⁷⁰ Sinabi ni Hisus magkun, “Kamu yi ngani ungud sampulu may duwa ka tuludluan kang pinili. Dapat ti usa sa kanyu takinan ngap manga labang.”

⁷¹ Kay pagtukuyun ni Hisus si Hudas, kay anak ni Simun Iskariyuti. Dahil madi si Hudas kabilang sa sampulu may duwa ka tuludluan, pumakampi siya sa kalaban hampay kay itudlu niya si Hisus sa kanda.