Huwan 5 - Hanunuu

Pinaayad ni Hisus ti may Sakit sa Bitisda

¹ Pagka dugay may kapistahan ti manga Hudiyu nakan nag-ati si Hisus sa Hirusalim.

² Sa usa ka puwirtahan sa may alad batu sa Hirusalim, sa may palalakawan manga karanidu, may danum pararigsan. Nu sa bagaw Hibriyu tunda pag pararigsan kay ngaran Bitisda. Sa kay palibut pararigsan may lima ka parat-ungan.

³ Ati sa may manga parat-ungan maigyaan ti kadamlan may manga dahilan — may manga buta, may manga pilay, may manga lunu. Mag-alagad sida sa tumandug ti danum.

⁴ Dahil may pangudasun lang kay magras-ug ti usa ka anghil Panginuun bag-u pagkuyikawun niya ti danum sa pararigsan. Ti un-an nagsugbu pagka natandug ti danum, magkaayadan kay dahilan.

⁵ May usa ka lalaki diman ati, tatlumpulu may walu yi ka timpu kay sakit.

⁶ Nakitan siya ni Hisus maigyaan ati. Alam ni Hisus dugay yi pag timpu kay sakit. Sinabi niya sa lalaki may sakit magkun, “Magkaibug aw kawu maayadan?”

⁷ Nagsagut ti lalaki may sakit magkun, “Pagka magkatandug ti danum, unman may tawu magdara sa kangku tag sa may pararigsan. Kang di waya mag-atag, magkaunahan yi aku manga iba.”

⁸ Sinabi ni Hisus sa kanya magkun, “Pagtindug yi duy kawu, daran-a yi kam amak, paglakaw yi.”

⁹ Kadaka nag-ayad yi siya, dinara yi niya kay amak, linmakaw yi rargu. Katpung sa Sirang Pamahari pag pinaayad ni Hisus tunda pag tawu.

¹⁰ Nakan nanamyaw ti manga pinunu Hudiyu sa kanya magkun, “Sirang Pamahari taynguna, labag sa Kasuguan nita nu kawu magdara kanmu amak.”

¹¹ Dapat sinabi niya sa kanda magkun, “Ti nagpaayad sa kangku imaw ti may sabi sa kangku daran-a kang amak, paglakaw yi.”

¹² Nagpaingana ti manga pinunu Hudiyu sa kanya magkun, “Si unu tunda pag tawu ti nagsabi sa kanmu, ‘Daran-a kam amak’?”

¹³ Dapat unman niya alam nu si unu ti nagpaayad sa kanya. Kadamlan waydi tawu siyun nakan udyi may nakitan siya sa kan Hisus.

¹⁴ Bag-u nakitan maan siya ni Hisus sa Balay Diyus. Magkun si Hisus sa kanya, “Malu duy, kawu mayad yi. Inda ginan danga yi kawu magkasala, bagay mangyari maan sa kanmu ti lalu daka pag kadautan.”

¹⁵ Bag-u nag-ati ti tawu, sinabi niya sa manga pinunu Hudiyu si Hisus ti nagpaayad sa kanya.

¹⁶ Siyun ginan pag-unuunuhun yi manga Hudiyu si Hisus dahil pinaayad niya tunda pag tawu sa Sirang Pamahari.

¹⁷ Nakan sinabi ni Hisus sa kanda magkun, “Hanggan taynguna unman may kaapasan kang Ama sa kay buwat, nakan una aku magbuwat diman gid.”

¹⁸ Pagka sinabi ni Hisus tunda lalu waya siya paggayakun matyun manga pinunu Hudiyu, dahil naglabag siya sa pagsabihun sa Kasuguan tungkul sa Sirang Pamahari, ag pagkumnun waya niya ti Diyus kay gid Ama, kay ibug sabihun pinaparihu niya kay sadili sa Diyus.

Tungkul sa Karampatan Anak Diyus

¹⁹ Bag-u sinabi ni Hisus sa manga pinunu Hudiyu magkun, “Ungud duy kang pagsabihun sa kanyu, ti Anak unman may karampatan magbuwat una hintay nu ginan lang sa kay sadili. Ti nakitan Anak sa kay Ama pag buwat imaw diman ti pagbuwatun niya.

²⁰ Dahil pagmahalun Ama ti Anak, ti tanan buruwatun Ama pag-ipakakit niya sa Anak. Ag lalu waya makamaskihan siyun pag manga buwat ti ipakakit Ama sa Anak agud kamu madulaw.

²¹ Dahil nu kabitay pagbuhiun uman Ama ti manga namatay, katunda diman waydi pagbuhiun uman Anak una hintay pag tawu kay gustu buhiun uman.

²² Unman magpihu ti Ama sa una hintay pag tawu nu daut nu mayad. Iinintirga niya sa Anak ti karampatan hampay makapihu sa manga tawu nu daut nu mayad,

²³ hampay ti tanan tawu gumalang sa Anak parihu sa kanda maggalang sa Ama. Nu ti tawu unman maggalang sa Anak, unman diman waydi paggalangun niya ti Ama ti nagsugu sa Anak.

²⁴ “Ungud duy kang pagsabihun sa kanyu, nu ti tawu magtanggap sa kang bagaw ag magsarig sa Diyus sa nagsugu sa kangku, tunda pag tawu may tutuu pag buhi unman may katapusan. Balaw yi sakup siya sa sintinsiya aban. Kay patabgan balaw yi kamatayan, bagkus ngap buhi kay patabgan.

²⁵ Ungud duy kang pagsabihun sa kanyu, arani yi ti udas, kainda yi ngapu, ti manga tawu ga tigbak makadnug sa kay magbagaw Anak Diyus bag-u makatanggap sida buhi.

²⁶ Nu kabitay ti Ama may gimpuunan buhi, katunda diman ipinakaun niya sa Anak ti karampatan hampay may gimpuunan siya buhi.

²⁷ Pinakan-an niya ti Anak karampatan makapihu sa tawu nu daut nu mayad, dahil siya ti Anak Tawu.

²⁸ Danga kamu magkadulaw, dahil udyi dugay aban makadnug ti tanan manga namatay sa kang magbagaw.

²⁹ Bag-u sida lumuwang ginan sa kalubngan. Ti manga nagbuwat mayad buhiun uman hampay may buhi unman may katapusan. Ti manga nagbuwat daut buhiun uman bag-u sintinsiyahan sida sa kaparusahan.”

Ti manga Magpakilala nu si unu si Hisus

³⁰ Sinabi ni Hisus magkun, “Unman aku may karampatan magbuwat una hintay nu ginan lang sa kang sadili. Angay lang sa kang nadnugan ginan sa Ama pag makapihu aku sa tawu nu daut nu mayad. Nakan aku balaw magsalan sa kang magpihu sa tawu, dahil aku unman magsunud sa kang sadili lang kagustuhan. Bagkus ngap kang pagsundan ti kagustuhan Ama, imaw ti nagsugu sa kangku.

³¹ “Nu aku lang tigtultul tungkul sa kang sadili, barang pahimudilun manga tawu.

³² Dapat hanggan ti Ama magpakilala diman nu si unu aku ag alam niku tutuu ti pagsabihun niya tungkul sa kangku.

³³ Nagpasugu kamu atag sa kan Huwan bag-u itinultul diman niya ti katutuuhanan.

³⁴ Balaw kuntay aku may kailangan sa manga pagsabihun tawu tungkul sa kangku. Nakan lang kang pagsabihun tungkul sa kan Huwan binagaw, hampay mana kamu may karibrihan.

³⁵ Sa kay magtudlu si Huwan parihu ga sulu nasul-an rinmayaw. Naibug diman kamu nakabaya ngalay-ngalay sa kay pag-itudlu ga sa marayaw.

³⁶ Dapat sa kang manga pagbuwatun pag makilala gid nu si unu aku, balaw lang ga sa kan Huwan itinultul tungkul sa kangku. Pagbuwatun niku ti iinintirga Ama pag buruwatun sa kangku. Nakan tunda ngani pag buruwatun tigpakilala nu si unu aku. Sa kang manga buruwatun pag makitan diman niyu aku sinugu Ama.

³⁷ Hanggan ngap ti Ama ti nagsugu sa kangku tigpakilala waydi nu si unu aku. Una kaybi ginan kamu unman nakadnug kay magbagaw, unman diman kamu nakakit sa kay pinagkabilug.

³⁸ Pag-ipalawuy lang niyu kay manga bagaw sa kanyu naisipan, dahil unman kamu magsarig sa kangku, sa kay sinugu Ama.

³⁹ Pirmi diman pag-adalun niyu ti manga Banal Kasuratan dahil kanyu pag-isipun siyun kamu pag makakit buhi unman may katapusan. Tunda pag manga Banal Kasuratan tigpakilala nu si unu aku.

⁴⁰ Dapat unman kamu magkaibug magtanggap sa kangku nakan unman diman waydi matanggap niyu ti tutuu pag buhi.

⁴¹ “Balaw kang turunu para aku dayawun manga tawu.

⁴² Dapat kilala niku kamu. Alam niku kamu unman madunung magmahal sa Diyus.

⁴³ Nagsitay aku may karampatan ginan sa kang Ama dapat unman pagtanggapun niyu aku. Nu iba bay ti sumitay magsarig sa kay lang sadili kapangyarihan, kanyu ngap tanggapun.

⁴⁴ Magbaya kamu nu kamu magdarayawan sa usa kag sa usa, dapat unman kamu magmasigasid hampay makadayaw sa kanyu ti tutuu Diyus. Nu katunda kamu, kabitay lugud kamu pag pumaniwala sa kangku?

⁴⁵ Danga niyu isipun kuntay aku ti sumumbung sa Ama laban sa kanyu. Si Muysis ti pagsarigan niyu, imaw ngap ti sumumbung laban sa kanyu.

⁴⁶ Nu ungud pagpaniwalaan niyu si Muysis, paniwalaan diman waydi mana aku dahil nagsurat siya tungkul sa kangku.

⁴⁷ Dapat nu unman pagpaniwalaan niyu ti manga isinurat ni Muysis, kabitay pag paniwalaan niyu kang manga pagsabihun?”