Huwan 3 - Hanunuu

Si Hisus ag si Nikudimu

¹ May usa ka Parisiyu, kay ngaran si Nikudimu. Paggurangunun siya manga Hudiyu.

² Nag-ati siya sa kan Hisus sa yabi. Bag-u kay sinabi sa kan Hisus magkun, “Maisturu, alam nimi duy kawu sinugu Diyus hampay manugtudlu sa manga tawu. Dahil tunda pag manga tanda kanmu pagbuwatun, mabuwat lang tawu nu sa kanya gid ti Diyus.”

³ Sinmagut si Hisus magkun, “Ungud duy kang pagsabihun sa kanmu, dayu gid makapasakup ti tawu sa kay paghari Diyus, purya lang nu siya ainanak inuman.”

⁴ Pinaingana ni Nikudimu sa kanya magkun, “Kabitay duy pag mianak uman ti tawu nu gurangun yi siya? Dayu gid siya makasulud maan sa tiyan niya ina hampay ianak uman.”

⁵ Sinmagut si Hisus magkun, “Ungud duy kang pagsabihun sa kanmu, dayu makapasakup ti tawu sa kay paghari Diyus, purya lang nu siya ainanak sa panab-anan danum hanggan Ispiritu Banal.

⁶ Pagka ti tawu ainanak niya gurang, may buhi yi kay bilug. Dapat nu ainanak siya Ispiritu Banal, mangulian sa kanya inda pag Ispiritu Banal.

⁷ Danga duy kawu maglingut sa kang sinabi sa kanmu magkun kailangan kamu ianak uman.

⁸ Maghuyup ti durus una naan ginan kay gustu. Mag-adnugan nimu kay hagunung, dapat unman nimu alam nu naan ginan kay umpisa ag nu naan tag kay turunu. Katunda diman ti kada tawu nu ainanak siya Ispiritu.”

⁹ Sinabi ni Nikudimu magkun, “Kabitay nguna pag mangyari tunda duy?”

¹⁰ Sinmagut si Hisus magkun, “Kawu duy kabay manugtudlu sa Israil? Hayga unman magkasalman nimu inda pag manga katutuuhanan?

¹¹ Ungud duy kang pagsabihun sa kanmu, ti magkaalaman nimi imaw ti kanmi pagsabihun ag ti kanmi nakitan imaw ti pag-itultul nimi. Dapat unman kamu magpaniwala sa kanmi pag-itultul.

¹² Nu kamu unman magpaniwala sa kang itinultul tungkul sa manga magpangyari sitay sa babaw daga, kabitay duy kamu pag pumaniwala nu kang itultul sa kanyu tungkul sa manga magpangyari sa langit?

¹³ Unman may tawu nakaati sa langit, purya lang ti Anak Tawu, imaw ti nagsitay ginan sa langit.

¹⁴ “Kaybi kanda sa pangawakawaan di waya, tinur-ug ni Muysis ti ulay galang tag sa tungud. Katunda diman waydi kailangan ipaabwat ti Anak Tawu,

¹⁵ hampay una si unu pag tawu nu magsarig sa Anak Tawu, may tutuu pag buhi unman may katapusan.

¹⁶ Daka gid kay pagmahal Diyus sa tanan tawu sa babaw daga, nakan ipinakaun niya kay Bugtung Anak hampay una si unu pag tawu nu magsarig sa kanya, dayu ipadamhak sa kamatayan, bagkus ngap may tutuu pag buhi siya unman may katapusan.

¹⁷ Sinugu Diyus kay Anak balaw hampay sintinsiyahan niya ti manga tawu sa kaparusahan, bagkus ngap hampay iribri niya ti manga tawu.

¹⁸ “Ti tawu nu magsarig sa Anak Diyus, balaw pagsintinsiyahan sa kaparusahan. Dapat ti unman magsarig nasintinsiyahan yi sa kaparusahan, dahil unman siya nagsarig sa kapangyarihan Bugtung Anak Diyus.

¹⁹ Parusahan sida dahil nagsitay sa kalibutan ti katutuuhanan ga karayawan ginan sa Diyus. Dapat pinalabi waya manga tawu ti kadudulman sa karayawan, dahil daut kanda manga buwat.

²⁰ Una hintay pag tawu tigbuwat daut magdayu di sa karayawan, unman gid siya magkaibug magpakarani sa marayaw, barang makilala manga iba kay buwat daut.

²¹ Dapat ti tawu nu nag-ugali siya sa katutuuhanan, pumakarani ngap sa karayawan hampay makilala kay manga buruwatun angay sa kay pakiusa sa Diyus.”

Magtultul si Huwan Manugtulbaw tungkul sa kan Hisus

²² Bag-u si Hisus hanggan kay manga tuludluan nag-ati sa daga Hudiya. Nadugay siya ati kaibahan nida, nagtulbaw siya sa manga tawu.

²³ Si Huwan nagtulbaw diman waydi sa manga tawu ati sa Inun, balaw arayu sa Salim, dahil ati daka pag danum. Nag-ati sa kanya ti manga tawu bag-u kay itinulbaw sida.

²⁴ Dahil ati katpung udwaya napirisu si Huwan.

²⁵ Kay iba manga tuludluan ni Huwan hanggan ti usa ka Hudiyu nag-aratwan tungkul sa kanda ugali maglumpiyu kanda bilug hanggan kanda manga gamit bag-u makasamba sa Diyus.

²⁶ Bag-u nagpakarani sida sa kan Huwan ag sinabi nida sa kanya magkun, “Maisturu, kaybi pagka kita baliwa sa butlakan pag pangpang sapa Hurdan, may kaibahan kabay kawu usa ka tawu, kanmu diman itinultul sa kanmi. Siya maaw magtulbaw yi waydi kainda, kadamlan ngap tawu ti atag sa kanya.”

²⁷ Sinabi ni Huwan sa kanda magkun, “Dayu mangyari ti katida sa tawu, purya lang nu Diyus ti may buwat sa kanya.

²⁸ Nakadnug diman gid kamu sa kang sinabi magkun, balaw aku ti Pinili Diyus Manugribri pag Hari. Sinugu lang aku hampay umuna sa kanya.

²⁹ Ti babayi ipasaru sa kay lalaki arasawan-un. Ti iribahun mag-alagad sa lalaki ipasaru. Nakabaya ti manug-iba nu makad-nug siya sa kay magbagaw lalaki ipasaru. Katunda diman ungud kang magbaya taynguna.

³⁰ Kailangan siya ti may kadayawan, kailangan aku ti sa sirung.”

Ti ginan sa Langit

³¹ Ti ginan sa langit imaw ti makamaskihan man sa tanan tawu. Ti ginan sa babaw daga, imaw ti taga daga yi ngani. Ti taga babaw daga kay baragawun para waydi sa babaw daga. Dapat ti taga langit imaw ti makamaskihan man sa tanan tawu.

³² Pag-itultul niya kay nakitan hanggan kay nadnugan dapat pira lang ka tawu ti magpaniwala sa kay pag-itultul.

³³ Nu ti tawu magpaniwala sa kay pag-itultul, tunda ngani pag tawu tigpuruyba sa kay katutuuhanan Diyus.

³⁴ Ti sinugu Diyus imaw tig barita manga bagaw ginan sa Diyus dahil pag-ilubus Diyus kay Ispiritu sa kanya.

³⁵ Ti Anak pagmahalun niya Ama nakan ipinasakup Ama ti tanan-tanan pag manga bagay sa kapangyarihan niya Anak.

³⁶ Nu ti tawu magsarig sa Anak, may tutuu pag buhi siya unman may katapusan. Dapat nu ti tawu unman magpaniwala sa Anak, dayu siya makatanggap buhi, bagkus ngap udyi madura sa kanya kay parusa Diyus.