Huwan 20 - Hanunuu

Udyi Lagan si Hisus sa Tinaguktukan Batu

¹ Namanlum sa sirang Duminggu nag-atag si Marya Magdalina nu naan pag-ipinauli si Hisus. Pagka ati nakitan niya ipinagulung yi ti talakup batu ginan sa sabian.

² Bag-u nalagiw siya atag sa kan Simun Pidru hanggan sa tunda pag tuludluan kay pagmahalun ni Hisus. Sinabi ni Marya sa kanda magkun, “Bin-ul duy nida ti Panginuun ginan sa tinaguktukan batu ag unman nimi alam nu naan kanda ipinauli.”

³ Nakan nag-atag ngani sa tinaguktukan batu si Pidru hanggan tunda pag usa ka tuludluan.

⁴ Nalagiw gid sida duwa dapat tunda pag usa ka tuludluan mabisug man sa kan Pidru kay magpalagiw, nakan un-an man siya nakaras-ug sa tinaguktukan batu.

⁵ Nagpasirang siya tag sa sulud, nakitan niya siyun di ti pisahan linu pag rutay. Dapat unman siya nagsulud.

⁶ Bag-u nagras-ug waydi si Pidru nagdasun sa kanya. Nagsulud si Pidru, nakitan niya ti pisahan linu pag rutay siyun di,

⁷ hanggan kay taung sa ulu, dapat balaw minsan tunda sa pisahan linu pag rutay. Nituhay ti taung natipig sa saruy.

⁸ Bag-u nagsulud diman waydi tunda pag usa ka tuludluan ti un-an rinmas-ug sa tinaguktukan batu. Pagka siya sinmulud, nakitan niya ti manga rutay bag-u naniwala ngani siya nabuhi maan si Hisus.

⁹ Dahil ati katpung udwaya nasalman nida ti Banal Kasuratan kuntay kailangan siya mabuhi maan ginan sa kamatayan.

¹⁰ Bag-u nuli maan sida tag sa kanda ulian.

Napakakit si Hisus sa kan Marya Magdalina

¹¹ Dapat siyun di waya sa luwas tinaguktukan batu si Marya Magdalina matindugan maglumi. Sa kay maglumi waya nagpasirang siya tag sa sulud.

¹² Bag-u may nakitan siya duwa ka anghil malagti kay manga rutay, matukawan kay usa sa uluhan, kay usa sa aluludan sa nagkabugtangan bangkay ni Hisus.

¹³ Pinmaingana sida sa kan Marya magkun, “Kawu duy hayga magpakalumi?” Sinmagut si Marya magkun, “Dahil bin-ul nida kang Panginuun ag unman niku alam nu naan nida pag ipinauli.”

¹⁴ Pagka nasabi niya katida, nangaliwliw siya bag-u nakitan niya si Hisus matindugan, dapat unman nakilala niya kuntay si Hisus.

¹⁵ Pinmaingana si Hisus sa kan Marya magkun, “Kawu duy hayga magpakalumi? Hintay kanmu paghanapun?” Kay hantup ni Marya siya ti manug-alaga manga tanum. Nakan sinabi niya magkun, “Nu kawu duy ti nagbuul sa kang Panginuun, sabiha nimu sa kangku nu naan kanmu pag ipinauli siya hampay kang bul-un.”

¹⁶ Bag-u sinabi ni Hisus sa kanya magkun, “Marya.” Napasrangu si Marya sa kanya bag-u kay sinabi sa bagaw Hibriyu magkun, “Rabuni!” (Kay ibug sabihun, “Maisturu.”)

¹⁷ Sinabi ni Hisus sa kanya magkun, “Danga duy paghiyapti nimu aku, dahil aku udwaya nakauli sa Ama sa langit. Dapat pag-ati kawu sa kang manga patar-ari, pagsabi sa kanda magkun, umuli yi aku sa kang Ama kanyu diman Ama, sa kang Diyus kanyu diman Diyus.”

¹⁸ Nag-ati si Marya sa kay manga tuludluan ni Hisus, sinabi niya sa kanda magkun, “Nakitan niku ti Panginuun.” Bag-u itinultul niya kay manga sinabi ni Hisus sa kanya.

Napakakit si Hisus sa Kay manga Tuludluan

¹⁹ Pagka malambung yi ati pag sirang Duminggu, nagtipun ti manga tuludluan. Tinalakpan inagad nida ti sabian dahil magkadala gid sida sa manga pinunu Hudiyu. Bag-u linmuwang si Hisus, tinmindug siya sa kanda karaw-an bag-u kay sinabi magkun, “Pagmay kahusayan duy kamu.”

²⁰ Pagka sinabi niya tunda, ipinakakit niya sa kanda kay manga kamang hanggan kay habig. Pagka nakitan manga tuludluan ti Panginuun, nagbaya gid sida.

²¹ Sinabi maan ni Hisus sa kanda magkun, “Pagmay kahusayan duy kamu. Parihu sa kay nagsugu Ama sa kangku, katunda diman waydi pagsuguun niku kamu tabug sa manga tawu taga kalibutan.”

²² Pagka sinabi niya tunda, kay inarupan niya sida bag-u magkun siya, “Tanggapa niyu ti Ispiritu Banal.

²³ Nu patawadun niyu ti manga tawu sa kanda manga kasalanan, may kapatawadan sida ginan sa Diyus. Nu unman patawadun niyu sida, unman waydi sida may kapatawadan ginan sa Diyus.”

Si Tumas Magkilala sa kan Hisus

²⁴ Dapat pagka linmuwang si Hisus sa kanda, unman siyun si Tumas, ti binansagan Siing, kabilang diman sa sampulu may duwa ka tuludluan ni Hisus.

²⁵ Nakan nagtultul sa kanya ti manga iba tuludluan magkun, “Nakitan duy nimi ti Panginuun.” Dapat sinabi ni Tumas sa kanda magkun, “Udwaya aku maniwala nu udwaya makitan niku ti manga buslut paku sa kay kamang ag nu udwaya mitulsuk kang ituturu sa manga buslut paku ag nu udwaya mikuut niku kang kamang sa kay habig.”

²⁶ Pagka sa usa maan ka sirang duminggu, ati maan ti manga tuludluan sa sulud balay, hanggan si Tumas kaibahan yi nida siyun. Nagluwang si Hisus madi inagad ti manga talakup sabian, nagtindug siya sa kanda karaw-an sinabi niya magkun, “Pagmay kahusayan sa kanyu.”

²⁷ Bag-u sinabi niya sa kan Tumas magkun, “Ipad-ut nimu kanmu ituturu atay, bantayi nimu kang manga kamang. Sitay tag kanmu kamang, ikuut nimu sa kang habig. Tubay yi duy kanmu alinlangan, pagpaniwala yi gid kawu.”

²⁸ Sinabi ni Tumas sa kan Hisus magkun, “Kawu duy kang Panginuun hanggan kang Diyus.”

²⁹ Sinabi ni Hisus sa kanya magkun, “Nakan aw kawu maniwala yi dahil nakitan nimu aku? Masulung gid ti manga magpaniwala una unman mag-akitan nida aku.”

Kay Turunu inda pag Ribru

³⁰ Mayamu waya pag manga tanda ti binwat ni Hisus sa atubangan niya manga tuludluan, unman isinurat sa inda pag ribru.

³¹ Dapat inda kang isinurat hampay kamu magpaniwala si Hisus yi ngani ti Pinili Diyus Manugribri pag Hari, ti Anak Diyus. Dahil nu katunda kanyu pagsarig, kamu may tutuu pag buhi sa kanyu magpakiusa sa kanya.