Huwan 2 - Hanunuu

Ti Pamasaruhan sa Banwa Kana

¹ Pagka sa ikatlu pag sirang, may pamasaruhan sa banwa Kana, sa daga Galiliya. Nag-ati diman kay ina ni Hisus.

² Binan-awan diman sa pamasaruhan si Hisus hanggan kay manga tuludluan.

³ Pagka kinurang yi sida intus sa karan-an, sinabi niya ina sa kan Hisus magkun, “Udyi maaw duy sida may intus.”

⁴ Sinabi ni Hisus sa kanya magkun, “Danga duy, Inang, pagpakialmi nimu kang buwat. Dahil udwaya duy magras-ug ti taning niku pag kaudasan.”

⁵ Bag-u sinabi niya ina sa manga suruguun magkun, “Sunda duy niyu una hintay kay pagsabihun sa kanyu.”

⁶ May minana ti manga Hudiyu ugali mag-ugas kamang hanggan manga nagkan-an. Nakan siyun pag balay ti may puun pamasaruhan may unum waydi ka tapayan. Kay sukad kada tapayan manga unum ka banga danum.

⁷ Sinabi ni Hisus sa manga manugtirindugun sa karan-an magkun, “Pun-a duy niyu ti manga tapayan danum.” Pagka kanda yi ngani pinunu hanggan sa bibig,

⁸ sinabi ni Hisus sa kanda, “Kadlui yi niyu danum daran-a tag sa manugkasuniru.” Kanda yi ngani dinara.

⁹ Tinigsiman manugkasuniru ti danum nagbaliw intus. Unman alam niya nu naan ginan tunda, dapat alam di manga manugsirbi nu naan ginan tunda dahil sida diman ti nagkadlu. Bag-u pinab-ul manugkasuniru ti lalaki ipasaru,

¹⁰ ag magkun siya, “Ti un-an mana ihayin kay marinu pag intus. Pagka daka yi ti ininum manga tawu bag-u kay alanganlangan yi pag intus. Bati hayga ipinauryan ngap niyu ti marinu pag kalasi intus?”

¹¹ Tunda kay binwat ni Hisus sa banwa Kana, sa daga Galiliya, imaw ti kabag-u binwat niya pag makapangyarihan pag tanda. Ati katpung pag ipinakakit niya kay kamaskihan bag-u nagsarig sa kanya kay manga tuludluan.

¹² Bag-u si Hisus, kay ina, kay manga patar-ari hanggan kay manga tuludluan nag-ati sa Kapirnaum. Nadugay sida ati pira ka sirang.

Tinulak ni Hisus ti manga Manugnigusyu sa Balay Diyus

¹³ Arani yi ti Kapistahan sa Pag-alaala sa Karibrihan. Nakan nag-ati si Hisus sa Hirusalim.

¹⁴ Pagka ati siya sa Balay Diyus, nakitan niya ti manga magpabili manga baka, manga karanidu hanggan manga kalampati. Siyun diman pag matukawan ti manga manugbalyu kuwarta.

¹⁵ May linubid si Hisus pamakul bag-u binugaw niya ginan sa Balay Diyus ti tanan hayup, una karanidu una baka. Linikwang niya ti manga burugtangan kuwarta manga manugbalyu, ipinamuhus yi lang niya kanda kuwarta.

¹⁶ Sinabihan niya ti manga magpabili kalampati magkun, “Bul-a niyu tunda atay ginan. Danga yi niyu pagbuwata palingkihan ti balay niku Ama.”

¹⁷ Bag-u naisipan niya manga tuludluan ti pagsabihun sa Banal Kasuratan magkun, “Diyus, kang magpahalaga sa kanmu balay ga apuy malabdaban sa kang tagipusuun.”

¹⁸ Pagka nakitan manga pinunu Hudiyu kay binwat ni Hisus, pinaingana nida sa kanya magkun, “Hintay pag tanda kanmu ipakakit sa kanmi hampay maalaman nimi may karampatan ngani kawu magbuwat katida?”

¹⁹ Sinagut ni Hisus magkun, “Gubaa niyu inda pag Balay Diyus bag-u ipatindug maan niku sa sulud tulu lang ka sirang.”

²⁰ Pinaingana manga Hudiyu magkun, “Ipatindug aw lugud nimu inda sa sulud tulu lang ka sirang? Upatpulu may unum ka timpu kay kadugay kay nagpatindug inda pag Balay Diyus.”

²¹ Dapat ti pagkumnun ni Hisus Balay Diyus kay yi bilug.

²² Pagka nabuhi uman si Hisus ginan sa kamatayan naala-ala niya manga tuludluan inda kay sinabi nakan nagpatutuu ngani sida sa Kasuratan hanggan sa kay manga sinabi ni Hisus.

Alam di ni Hisus nu hintay ti sa Tagipusuun tanan Tawu

²³ Kay di waya sa Hirusalim si Hisus, katpung sa Kapistahan sa Pag-alaala sa Karibrihan, nakitan manga tawu kay binwat manga makapangyarihan pag tanda, nakan mayamu ti nagsarig sa kanya.

²⁴ Dapat unman isinarig niya kay sadili sa kanda dahil kilala di niya ti tanan tawu.

²⁵ Unman kailangan may tumultul sa kanya tungkul sa manga tawu dahil daan alam yi waydi niya nu hintay ti sa tagipusuun tawu.