Huwan 16 - Hanunuu

¹ “Inda pag manga bagay kang itinultul sa kanyu hampay kamu dayu umalinlangan sa kanyu pagsarig.

² Ipalwas kamu aban manga Hudiyu ginan sa kanda manga simbahan. Aban humantup ti manga tawu tinupad nida ti buruwatun Diyus nu kamu kanda minatay.

³ Nakan katida kanda buwatun sa kanyu dahil unman nakilala nida una ti Ama una aku.

⁴ Nakan kang yi itinultul hampay nu udas yi mangyari yi tunda aban, alalahanun di niyu inda yi ngani kang itinultul.” Magkun si Hisus, “Inda pag manga bagay unman itinultul niku sa kanyu ginan sa kabag-u, dahil aku atay waya waydi sa kanyu.

Ti Buruwatun Ispiritu Banal

⁵ Dapat taynguna aku mighit yi atabug sa nagsugu sa kangku. Una di usa sa kanyu unman may magpaingana sa kangku nu naan tabug aku.

⁶ Taynguna, dahil sa kang sinabi sa kanyu, lubus gid kamu maruku.

⁷ Dapat tutuu gid inda kang pagsabihun sa kanyu, kanyu ikamayad nu aku mighit yi. Dahil nu unman aku mighit, dayu mahimu sumitay sa kanyu ti Manug-awat. Dapat nu mighit aku suguun niku siya sitay tabug sa kanyu.

⁸ Nu sumitay ti Manug-awat, ipakakit niya sa manga taga kalibutan balaw tama kanda pag-intindi tungkul sa kasalanan, una sa katadlungan, una hanggan sa sintinsiya.

⁹ Ipakakit niya sa manga tawu kuntay sida makasalanan, dahil unman sida magsarig sa kangku.

¹⁰ Ipakakit niya aku matadlung, dahil aku atabug sa Ama, ag unman yi niyu aku makitan.

¹¹ Ipakakit diman niya sa kanda ti Diyus sumintinsiya sa kanda, dahil nasintinsiyahan yi si Satanas imaw ti maghari sa kalibutan.

¹² “Mayamu waya mana kang sarabihun sa kanyu, dapat makuri intindihun niyu kainda.

¹³ Nu rumas-ug ti Ispiritu, siya ti tumudlu katutuuhanan tungkul sa Diyus, tudluan diman niya kamu sa tanan katutuuhanan ginan sa Diyus. Unman siya bumagaw nu ginan lang sa kay sadili. Ipadakit niya kay manga nadnugan ag ipaalam niya sa kanyu ti manga mangyari aban.

¹⁴ Ipakilala niya sa kanyu kang kadayawan, dahil ginan diman sa kangku pag kaayadan ti ipadakit niya tag sa kanyu.

¹⁵ Una hintay pag kaayadan sa kang Ama kangku diman. Nakan sinabi niku sa kanyu magkun, tanggapun Ispiritu kang kaayadan bag-u kay ipadakit maan niya sa kanyu.”

Tungkul sa Karukuan hanggan Kabayaan

¹⁶ Magkun waya si Hisus, “Udyi dumugay duy bag-u udyi makitan niyu aku. Bag-u unman maan dumugay makitan di maan niyu aku.”

¹⁷ Kay iba tuludluan namaraingan-an sa usa kag sa usa magkun, “Hintay nguna tunda kay sinabi niya sa kanta magkun, ‘Udyi dumugay balaw yi niyu aku makitan, bag-u balaw dugay makitan di maan niyu aku?’ Sinabi waya niya magkun, ‘Nakan katida dahil aku atabug yi sa Ama.’ ”

¹⁸ Sinabi nida, “Hintay nguna kay pagkumnun ‘Udyi dumugay’? Unman magkasalman nita kay pagsabihun.”

¹⁹ Alam di ni Hisus magkaibug sida pumaingana sa kanya. Nakan sinabi niya sa kanda magkun, “Magparaingan-an aw kamu sa usa kag sa usa dahil sa kang sinabi magkun, Udyi dumugay bag-u udyi makitan niyu aku. Bag-u unman maan dumugay makitan di maan niyu aku?

²⁰ Ungud duy kang pagsabihun sa kanyu, kamu manlumi aban ag man-nguruynguyan, dapat ti manga taga kalibutan makabaya ngap. Kamu aban may karukuan, dapat kanyu karukuan matulsan di kabayaan.

²¹ Parihu sa babayi magpanamdam, magkakurian siya dahil rinmas-ug yi kay kaudasan. Nu bay nakalawuy yi ti anak udyi magkadumduman babayi kay nalakawan pag kakurian. Magbaya ngap siya dahil nilusad yi ti usa ka lapsag.

²² Katunda diman kamu. Taynguna kamu maruku, dapat pumakakit di maan aku aban sa kanyu bag-u makabaya gid kanyu tagipusuun ag udyi may tawu bum-ul kanyu kabayaan sa tagipusuun.

²³ Sa ati katpung pag udas aban, udyi kamu mamaingana sa kangku. Ungud duy kang pagsabihun sa kanyu, una hintay kanyu hagadun sa Ama, dahil kamu napasakup sa kangku, pihu gid kay ipakaun niya sa kanyu.

²⁴ Hanggan taynguna tugka udwaya kamu may hinagad sa kanya madi kamu napasakup sa kangku. Paghagad kamu bag-u kamu may matanggap hampay lubus udyi may kurang kanyu kabayaan.”

Tinalu yi ti Kapangyarihan Kalibutan

²⁵ Magkun si Hisus, “Sa kang magtudlu sa kanyu inda tanan, ginamit niku ti manga pahalimbawa. Dapat aban udyi aku humampang sa kanyu sa manga pahalimbawa. Ati katpung itultul niku sa kanyu sa malinaw pag bagaw tungkul sa Ama.

²⁶ Ati katpung makahagad kamu sa kanya dahil kamu napasakup sa kangku. Balaw aku ti humagad sa kanya para sa kanyu.

²⁷ Dahil pagmahalun yi gid kamu Ama. Nakan kamu kay pagmahalun dahil sa kanyu pagmahal sa kangku ag dahil kamu magsarig kuntay aku nagsitay ginan sa Diyus.

²⁸ Ginan aku sa Ama nagsitay sa kalibutan. Bag-u tayakan maan niku ti kalibutan, atabug maan sa Ama.”

²⁹ Bag-u sinabi niya manga tuludluan magkun, “Taynguna duy malinaw ngani kanmu pagsabihun, udyi sa manga pahalimbawa pag bagaw.

³⁰ Taynguna alam nimi kuntay magkaalaman nimu ti tanan-tanan ag unman yi kailangan may pumaingana waya sa kanmu. Nakan ngani kami maniwala kuntay kawu ginan sa Diyus.”

³¹ Sinabi ni Hisus magkun, “Ungud gid aw kamu maniwala taynguna?

³² Dapat malu, udyi gid dumugay, kainda yi ngap sab, kamu mamululagan yi, ti kada tawu tabug sa kay sadili balay bag-u tayakan niyu aku usa-usa wadi. Dapat balaw waydi aku usa-usa, dahil ti Ama sa kangku di.

³³ Itinultul niku inda tanan-tanan sa kanyu, hampay may kahusayan kanyu naisipan dahil sa kanyu magpakiusa sa kangku. Sitay sa babaw daga may malakawan kamu kakurian. Dapat pagmatutum duy kanyu naisipan. Tinalu yi niku ti kapangyarihan kalibutan.”