Huwan 12 - Hanunuu

Binuhusan Pamanglu si Hisus

¹ Unum wadi ka sirang bag-u Kapistahan yi sa Pag-alaala sa Karibrihan, nag-ati si Hisus sa Bitanya, sa kay ulian ni Lasaru, imaw yi ngani pag Lasaru kay binuhi uman ginan sa kamatayan.

² Pinayapunan nida si Hisus ati, si Marta ti nag-asikasu sa hayin. Si Lasaru matukawan minsan sa manga magkaun sa kay kasaru ni Hisus.

³ Bag-u binulwat ni Marya ti tunga litru pag pamanglu. Tunda pag pamanglu bin-ul ginan sa usa ka halaman kay ngaran nardu. Tutuu daka kay halaga tunda pag pamanglu. Kan Marya ibinuhus tunda sa kay lulud ni Hisus bag-u pinayid niya buhuk. Napnu gid ti usa ka balay sa hungaw pamanglu.

⁴ Siyun diman si Hudas Iskariyuti, usa diman ka tuludluan, imaw ti pumakampi sa kalaban ni Hisus.

⁵ Sinabi ni Hudas, “Mayad waya nu ipinabili yi lang tunda pag pamanglu sa halaga tawu tinarabahuan sa sulud usa ka timpu, bag-u abi ipakaun kay kabilyanan sa manga pugri.”

⁶ Katida kay binagaw ni Hudas balaw kuntay sa magpasunaid siya sa manga pugri. Nakan sinabi niya katunda dahil siya mananakaw. Siya ti manughiyaput kanda kuwarta, bag-u paggawhinun niya kay iba.

⁷ Sinmagut si Hisus magkun, “Pabay-ani niyu ti babayi. Inda kay yi itinigana daan tungkul sa udas aban kanda maglubung sa kangku.

⁸ Dahil pirmi di sa kanyu ti manga pugri, dapat aku aban udyi dugay kaibahan niyu.”

Namululungan Sida hampay Ipamatay si Lasaru

⁹ Mayamu pag manga Hudiyu nakaalam yi kuntay si Hisus ati sa Bitanya. Nakan nag-ati sida dahil asan si Hisus ag lalu kanda gustu makitan si Lasaru, ti binuhi maan ni Hisus ginan sa kamatayan.

¹⁰ Nakan namululungan ti manga pangulu manughandug hampay kanda ipamatay diman si Lasaru.

¹¹ Dahil ginan sa nangyari sa kan Lasaru, mayamu pag manga Hudiyu balaw yi napasakup sa kanda manga pinunu, sinmarig yi sida sa kan Hisus.

Nagras-ug si Hisus sa Hirusalim

¹² Kinaaldawan kayamuan gid tawu nag-ati sa Kapistahan sa Pag-alaala sa Karibrihan. Pagka naalaman nida si Hisus arani yi magkaras-ug yi sa Hirusalim,

¹³ nam-ul sida manga paklang palma bag-u linmakaw sida nagsulang sa kan Hisus sa dalan. Nanarawagan ti manga tawu magkun, “Dayawun nita ti Diyus. Papaladan Diyus ti sumitay sa ngaran Panginuun. Papaladan Diyus ti Hari Israil.”

¹⁴ Pagka nakitan ni Hisus ti usa ka anak asnu, sinmakay siya, angay sa isinurat sa Banal Kasuratan magkun,

¹⁵ “Danga kawu magkadala, Banwa Siun. Malu atay tag yi kanmu Hari nakasakay sa anak asnu.”

¹⁶ Ati katpung unman naintindihan manga tuludluan ni Hisus kay kahulugan tunda pag manga nangyari. Dapat pagka si Hisus binmalik sa langit bag-u di naala-ala nida inda ti isinurat sa Banal Kasuratan tungkul sa kanya ag katunda diman ti binwat manga tawu sa kan Hisus.

¹⁷ Pagka si Lasaru tinawagan ni Hisus ginan sa basad lukib ag siya binuhi maan, mayamu pag manga tawu siyun diman sa kan Hisus arani ti nakakit sa kay binwat. Bag-u itinultul nida sa manga iba nu hintay ti nangyari.

¹⁸ Nakan mayamu pag tawu ti nagsulang sa kan Hisus sa dalan, dahil naalaman nida kan Hisus binwat tunda pag makadululaw pag tanda.

¹⁹ Nakan nagharampangan ti manga Parisiyu magkun, “Bantayi duy niyu, udyi gid may mabuwat kita. Malu, ti tanan tawu napaminsan ngap sa kanya.”

May manga Giriyigu Maghanap sa kan Hisus

²⁰ May manga Giriyigu pag tawu nag-ati diman sa Hirusalim hampay magsamba sa Diyus katpung sa Kapistahan sa Pag-alaala sa Karibrihan.

²¹ Nagpakarani sida sa kan Pilipi taga Bitsayda sakup sa daga Galiliya. Sinabi nida sa kan Pilipi, “Duy gustu mana nimi maghampang sa kan Hisus.”

²² Nag-ati si Pilipi nagsabi sa kan Andiris. Bag-u sida maan ni Andiris ni Pilipi nag-ati sa kan Hisus kanda itinultul sa kanya ti sinabi manga Giriyigu.

²³ Sinabi ni Hisus sa kanda magkun, “Rinmas-ug yi ti taning pag kaudasan hampay ipaburayhaw ti kadayawan Anak Tawu.

²⁴ Ungud duy kang pagsabihun sa kanyu, ti pasi tirigu nu unman malagpak sa daga ag mamatay, balaw yi may samilya. Dapat ay nu mamatay ngani tunda pag pasi tirigu, lalu ngap mamurak siya mayamu.

²⁵ Nu pagpahalgaan tawu kay sadili buhi, maduraan ngap siya buhi. Dapat nu unman pagpahalgaan tawu kay buhi sitay sa babaw daga, dayu ngap siya maduraan buhi hanggan aban.

²⁶ Nu ti tawu magkaibug magbuwat kang buruwatun, kailangan siya pagkuyug sa kangku hampay una naan aku, ati diman siya sa kangku. Una hintay pag tawu nu tumupad siya sa kang buruwatun, dayawun siya niku Ama.”

Itinultul ni Hisus ti tungkul sa Kay Kamatayan Aban

²⁷ Sinabi ni Hisus magkun, “Taynguna magkaaburidu kang tagipusuun. Hintay nguna kang sabihun? Ngatay kang sabihun, Amang, paiwasan nimu aku sa inda aban pag kakurian? Dapat ay nakan aku nagsitay sa kalibutan hampay malakawan ngapu niku inda pag kakurian aban.

²⁸ Amang, ipaburayhaw duy nimu ti kadayawan nimu ngaran.” Bag-u may nagbagaw ginan sa langit magkun, “Ipinaburayhaw yi duy niku ti kadayawan niku ngaran, dapat una aban ipaburayhaw waya gid maan niku.”

²⁹ Nadnugan kayamuan tawu may nagbagaw. Sinabi manga iba magkun, “Maglinti maaw.” Magkun ti manga iba, “Anghil ti naghampang sa kanya.”

³⁰ Dapat sinabi ni Hisus magkun, “Tunda ngani pag busis kanyu nadnugan balaw nagbagaw para sa kangku nu ud para ngap sa kanyu.

³¹ Taynguna yi ti kaudasan hampay pihuun Diyus ti manga tawu sa babaw daga nu daut nu mayad. Taynguna tulakun yi tag sa luwas ti pangulu inda pag kalibutan.

³² Nu ipaabwat yi aku ginan sa daga, butungun niku ti tanan tawu hampay sida pumakarani sa kangku.”

³³ Inda kay sinabi ni Hisus hampay ipaalam nu kabitay pag kamatayan kay malakawan aban.

³⁴ Nagsabi ti manga tawu sa kanya magkun, “Naalaman nimi sa kanmi Kasuguan magkun, ti Pinili Diyus Manugribri pag Hari unman gid mamatay hanggan aban. Kabitay duy kanmu pagsabihun kuntay kailangan mamatay ti Anak Tawu? Si unu nguna tunda pag Anak Tawu?”

³⁵ Sinmagut si Hisus magkun, “Udyi madugay aban sa kanyu ti sulu. Paglakaw yi kamu hanggan sa kanyu waya ti sulu hampay balaw kamu matakdan dulum. Dahil nu ti tawu maglakaw sa madlum, unman niya alam kay patabgan.

³⁶ Pagsarig yi kamu sa sulu hanggan sa udwaya mab-ul ginan sa kanyu hampay kamu manga sakup yi sa karayawan.” Pagka sinabi ni Hisus tunda, nighit siya ati ginan, napaiwas-iwas siya sa manga tawu.

Kay Kayamuan manga Hudiyu unman Nagsarig sa kan Hisus

³⁷ Unman sida nagsarig sa kanya, madi katunda kay kayamu pag manga tanda kay binwat niya sa kanda atubangan.

³⁸ Inda tanan-tanan nangyari hampay matupad kay sinabi kaybi ni Purupita Isayas magkun, “Panginuun, si unu ti naniwala sa kanmi sinabi? Sa kantapu pag ipinakilala Panginuun kay kapangyarihan?”

³⁹ Nakan unman sida nakahimu magsarig ga kay sinabi ni Isayas magkun,

⁴⁰ “Binuta Diyus kanda manga mata agud unman sida makakit. Pinaganit Diyus kanda tagipusuun agud unman sida makaintindi. Sinabi Diyus magkun, nakan katida kang binwat sa kanda hampay sida unman bumalik tag sa kangku. Dayu waydi paayadun niku sida.”

⁴¹ Inda kay sinabi ni Isayas dahil ipinakakit Diyus sa kanya kay kadayawan aban ni Hisus ag kay binagaw ni Isayas tungkul ngani sa kan Hisus.

⁴² Lang madi katida, mayamu manga pinunu Hudiyu ti nagsarig sa kan Hisus. Dapat sida magkadala sa manga Parisiyu nakan unman kanda ipinamalay sa manga tawu barang ipalwas sida ginan sa simbahan manga Hudiyu.

⁴³ Unman mahalaga sa kanda nu sida pagbayaun Diyus. Ti mahalaga lang sa kanda basta sida pagbayaun manga tawu.

Ti Bagaw ni Hisus Tigpihu sa Tawu nu Daut nu Mayad

⁴⁴ Ainalsa ni Hisus kay busis magkun, “Ti tawu nu magsarig sa kangku balaw lang sa kangku pag magsarig, nu unman hanggan sa nagsugu sa kangku.

⁴⁵ Ti tawu nu nakakit sa kangku, nakakit diman waydi siya sa nagsugu sa kangku.

⁴⁶ Nagsitay aku ga sulu sa kalibutan hampay una hintay pag tawu nu sumarig sa kangku, balaw yi siya sa kadudulman.

⁴⁷ Una hintay pag tawu nu magpatingi sa kang pagbagawun bag-u unman niya pagpaniwalaan, balaw aku ti pumihu sa kanya nu daut nu mayad. Dahil aku unman nagsitay hampay kang pihuun ti taga kalibutan nu daut nu mayad. Nakan aku nagsitay hampay ngap iribri ti taga kalibutan.

⁴⁸ Dapat may sumintinsiya sa tawu nu siya magdayu sa kangku ag nu unman siya magpaniwala sa kang pagbagawun. Kang ngap manga binagaw imaw ti sumintinsiya sa kanya sa katapusan panahun aban.

⁴⁹ Dahil kang manga pag-itultul balaw ginan lang sa kang sadili. Ti Ama ti nagsugu sa kangku imaw ti may bilin sa kangku nu hintay ti kailangan niku sabihun ag nu hintay ti dapat niku itultul.

⁵⁰ Alam niku kay ibinilin niya imaw ti pumakaun tutuu pag buhi unman may katapusan sa tawu. Nakan ngani ti ibinilin niku Ama sa kangku imaw kang pagbagawun.”