Huwan 11 - Hanunuu

Namatay si Lasaru

¹ Ati sa baryu Bitanya may mag-uli usa ka tawu kay ngaran si Lasaru. Pagka dugay nasakit si Lasaru. Siyun diman sa Bitanya pag mag-uli kay manga patar-ari sida ni Marya ni Marta.

² Imaw yi ngani pag Marya ti nagbuhus pamanglu sa kay manga lulud Panginuun bag-u kay pinayid niya buhuk. Kan Marya patar-ari pag Lasaru ti may sakit.

³ Nakan nagpasugu kay manga patar-ari babayi atag sa kan Hisus magkun, “Panginuun, kanmu pagbayaun pag tawu may sakit.”

⁴ Pagka naalaman ni Hisus ti barita, sinabi niya magkun, “Tunda pag sakit balaw sa ikamatay. Nakan nangyari tunda hampay lalu makitan ti kadayawan Diyus. Ginan sa tunda pag sakit ni Lasaru madayaw aban ti Anak Diyus.”

⁵ Pagmahalun ngani ni Hisus si Marta hanggan kay patar-ari babayi hanggan si Lasaru.

⁶ Madi alam ni Hisus magkasakit si Lasaru, nagpadugay waya siya duwa waya ka yabi ati sa dipay Hurdan.

⁷ Bag-u sinabi niya sa kay manga tuludluan magkun, “Pagbalik yi maan kita sa Hudiya.”

⁸ Sinabi niya manga tuludluan magkun, “Udwaya dugay pagkaibgan yi manga Hudiyu kawu bintukun. Hayga duy kawu bumalik maan atag?”

⁹ Sinmagut si Hisus magkun, “Unman aw ti sirang dugay waydi kay rayaw? Nu ti tawu maglakaw sa marayaw dayu siya madayaan, dahil mag-akitan niya tigpakaun rayaw sitay sa babaw daga.

¹⁰ Dapat ti tawu nu maglakaw sa madlum madayaan gid, dahil unman may marayaw sa kanya.”

¹¹ Pagka sinabi ni Hisus tunda bag-u magkun waya siya, “Kanta pagmahalun pag tawu si Lasaru turug yi. Dapat aku umatag hampay siya kang pulawun.”

¹² Nakan sinabi niya manga tuludluan sa kan Hisus magkun, “Panginuun, nu turug si Lasaru, maayadan di siya.”

¹³ Kay gustu sabihun ni Hisus namatay yi si Lasaru, dapat kanda isip kan Hisus pagtukuyun ungud yi lang turug.

¹⁴ Nakan sinabi ni Hisus sa malinaw magkun, “Namatay yi duy si Lasaru.

¹⁵ Dapat alang alang sa kanyu, nakabaya aku unman aku ati sa kay magkamatay ni Lasaru hampay kamu sumarig sa kangku. Atag yi kita sa kanya.”

¹⁶ Si Tumas, imaw ti binansagan Siing, nagsabi sa kay kaparihu tuludluan magkun, “Pagkuyug waydi kita sa kanta Maisturu hampay minsan diman sa kanya kita pag mamatay.”

Si Hisus ti Gimpuunan Buhi

¹⁷ Pagka rinmas-ug si Hisus sa Bitanya naalaman niya upat yi ka sirang kay nilubung si Lasaru.

¹⁸ Ti baryu Bitanya arani lang sa Hirusalim, manga usa ka tamaan ginatung kay karayu.

¹⁹ Mayamu pag manga Hudiyu nagsabang sa kanda ni Marta ni Marya hampay magpasaya sa kanda karukuan tungkul sa kanda patar-ari.

²⁰ Pagka naalaman ni Marta si Hisus magkaras-ug yi, linmakaw siya hampay magsulang sa kan Hisus sa dalan. Dapat si Marya natayak matukawan sa balay.

²¹ Sinabi ni Marta sa kan Hisus magkun, “Nu sitay lang kawu duy, Panginuun, unman mana namatay kang patar-ari.

²² Dapat una kainda, alam diman niku una hintay kanmu hagadun sa Diyus ipakaun diman niya sa kanmu.”

²³ Sinabi ni Hisus sa kan Marta magkun, “Mabuhi di maan kanmu patar-ari.”

²⁴ Sinabi ni Marta magkun, “Alam duy niku siya mabuhi maan aban nu ti manga namatay buhiun maan sa katpung katapusan pag panahun.”

²⁵ Bag-u sinabi ni Hisus sa kanya magkun, “Sa kangku gid ginan duy pag mabuhi uman ti tawu. Aku diman ti gimpuunan buhi. Una abi mamatay ti tawu, nu siya magsarig sa kangku, balaw maduraan siya buhi.

²⁶ Ti tawu nu may tutuu pag buhi siya ag nu siya magsarig sa kangku, dayu gid siya ipadamhak sa kamatayan. Pagpaniwalaan aw nimu inda?”

²⁷ Sinmagut si Marta magkun, “Hu ngani Panginuun, naniwala yi aku kawu ti Pinili Diyus Manugribri pag Hari, ti Anak Diyus, ti itinaratu Diyus kuntay sumitay sa kalibutan.”

Maglumi si Hisus

²⁸ Pagka sinabi ni Marta tunda, nuli dapu siya hampay kay bul-un si Marya. Yinansan niya kay patar-ari magkun, “Rinmas-ug yi duy kanta Maisturu, ipinab-ul niya kawu.”

²⁹ Pagka nadnugan ni Marya tunda, tinmindug siya madali atag sa kan Hisus.

³⁰ Udwaya rinmas-ug si Hisus sa baryu, ati di waya siya sa dalan sa kay nagsulangan ni Marta.

³¹ May manga tawu waya sa balay magsabang sa kan Marya magpasaya sa kay karukuan. Dapat pagka nakitan nida si Marya tinmindug bag-u nagluwas madali, kinmuyug waydi sida sa kanya dahil kanda hantup atag siya sa lubung hampay manlumi ati.

³² Dapat nag-ati ngani si Marya sa kay mapat-ungan ni Hisus. Pagka nakitan niya si Hisus, napayuk-ub siya sa kay atubangan magkun, “Nu sitay lang kawu duy, Panginuun, unman mana namatay kang patar-ari.”

³³ Nakitan ni Hisus si Marya magnguynguy hanggan kan Marya kaibahan pag manga tawu lunsay magnguruynguyan diman. Nakan magkabuyat yi kay naisipan maglumi kay tagipusuun.

³⁴ Bag-u pinmaingana siya magkun, “Naan niyu pag ipinauli siya?” Sinmagut sida magkun, “Atag yi kita Panginuun, bantayi nimu.”

³⁵ Naglumi si Hisus.

³⁶ Sinabi manga tawu magkun, “Bantayi niyu nu kabitay kay pagmahal niya sa kan Lasaru.”

³⁷ Dapat sinabi manga iba magkun, “Nagpaayad siya sa tawu buta. Hayga unman inampara niya kan Lasaru kamatayan?”

Binuhi maan si Lasaru

³⁸ Nagmaruku maan masyadu si Hisus sa kay nag-atag sa kanda pinaulian bangkay pag lukib. Tunda pag lukib tinalakpan batu.

³⁹ Bag-u sinabi ni Hisus magkun, “Bul-a duy niyu tunda pag itinalakup pag batu.” Kan Marta ngani patar-ari ti namatay. Nakan magkun si Marta sa kan Hisus, “Panginuun, mabawu yi ay buyuk kay bangkay. Upat yi ka yabi kay namatay.”

⁴⁰ Sinabi ni Hisus sa kan Marta magkun, “Unman aw sinabi niku sa kanmu nu kawu sumarig, mag-akitan nimu ti kadayawan Diyus?”

⁴¹ Bin-ul ngani nida ti batu. Nagtangda si Hisus magkun, “Magpasalamat aku, Amang, sa kanmu dahil nadnugan nimu aku.

⁴² Alam niku pirmi gid mag-adnugan nimu aku. Dapat nakan kang sinabi inda sa kanmu dahil sa kayamuan tawu sa kang palibut hampay sida maniwala kuntay kawu yi ngani ti nagsugu sa kangku.”

⁴³ Pagka sinabi ni Hisus katida, ainalsa niya kay busis magkun, “Lasaru, pagluwas yi kawu.”

⁴⁴ Madi siya sitay namatay, nagluwas siya nabuhi maan. Mabudbudan di waya ti rutay panlubung sa kay manga kamang hanggan sa kay manga lulud. Hanggan kay uyahun may budbud di waya panyu. Bag-u sinabi ni Hisus sa kanda magkun, “Bul-a yi niyu kay manga rutay mabudbudan hampay siya makalakaw.”

Paggayakun manga Pinunu Ipamatay si Hisus

⁴⁵ Kayamuan manga Hudiyu nansabang sa kan Marya sinmarig sa kan Hisus pagka nakitan nida kay manga binwat.

⁴⁶ Dapat ti iba sa kanda nag-ati sa manga Parisiyu bag-u kanda itinultul kan Hisus binwat.

⁴⁷ Nakan nagtiripun ti manga Parisiyu, ti manga pangulu manughandug hanggan ti manga Katipunan manga Pinunu bag-u sida nagpululungan magkun, “Hintay kanta buwatun? Dahil mayamu pag manga makapangyarihan pag tanda kay pagbuwatun tunda pag tawu.

⁴⁸ Nu kanta lang pabay-anan kay manga buwat katida, ti tanan tawu sumarig sa kanya. Bag-u sumitay ti manga taga Ruma bag-u dautun nida ti Balay Diyus ag daugun nida ti nasyun manga Hudiyu.”

⁴⁹ Ati katpung pag timpu si Kaipas ti Pangulu Manug-asiwa Balay Diyus. Magkun si Kaipas, “Ud may intindi maaw kamu.

⁵⁰ Unman maaw kamu madunung magkilala kuntay nu para sa kanyu mayad waya nu mamatay ti usa ka tawu hampay dayu mapapas ti buu nasyun manga Hudiyu.”

⁵¹ Inda kan Kaipas sinabi bukun ginan sa kay lang sadili naisipan. Ati katpung pag timpu siya ti Pangulu Manug-asiwa Balay Diyus, nakan ipinurupita niya mamatay si Hisus hampay iribri ti nasyun Hudiyu.

⁵² Ag balaw lang para sa nasyun Hudiyu. Mamatay diman si Hisus hampay tipunun niya ipaminsan ti manga anak Diyus nangalat-kalat sa buu kalibutan.

⁵³ Nakan ngani tunda ginan pag sirang paggayakun yi manga pinunu Hudiyu ipamatay si Hisus.

⁵⁴ Nakan si Hisus udyi pirmi naglakaw sa Hudiya, udyi nagpasampak siya sa manga Hudiyu. Nighit siya siti ginan, nag-ati siya sa usa ka rugar arani sa pangawakawaan, sa usa ka banwa kay ngaran Ipraim. Ati siya pag napadugay kaibahan niya kay manga tuludluan.

⁵⁵ Ati katpung arani yi ti Kapistahan sa Pag-alaala sa Karibrihan. Una naan ginan pag manga rugar mayamu tawu nag-ati sa Hirusalim hampay tupadun nida ti manga ibinilin sa Kasuguan agud malumpiyu sida sa kay magbantay Diyus bag-u magpista.

⁵⁶ Pagka ati sa Hirusalim, paghanapun nida si Hisus. Pagka nagtipun ti manga tawu sa Balay Diyus, magharampangan magparaingan-an sida magkun, “Kabitay kanyu pag-iisip? Sumitay aw nguna siya sa Kapistahan, aw ngatay dayu?”

⁵⁷ Ti manga pangulu manughandug hanggan ti manga Parisiyu nagbilin sa manga tawu magkun, “Nu may tawu nakaalam nu naan si Hisus, kailangan itudlu niya sa kanmi hampay kanmi dakpun siya.”