Huwan 10 - Hanunuu

Ti Pahalimbawa sa Tudir manga Karanidu

¹ Sinabi ni Hisus magkun, “Ungud duy kang pagsabihun sa kanyu, nu may tawu sumulud sa tudir manga karanidu balaw lakaw sa kay puwirtahan, nu abi dumayik sa kay alad, tunda pag tawu mananakaw ag tulisan.

² Ti tawu nu sumulud sa tudir lakaw sa kay puwirtahan, tunda pag tawu imaw ti manug-alaga sa karanidu.

³ Pagbukasan siya manugbantay sa tudir. Ti manga karanidu magdungug sa kay magbagaw manug-alaga. Pagtawagun pag-ingarnan gid niya kay sadili manga karanidu bag-u kay pagtabanun niya sida tag sa luwas tudir.

⁴ Pagka nipalwas yi niya sida tanan, umuna siya bag-u kay manga karanidu kumuyug sa kay uryan, dahil kilala nida kay busis.

⁵ Dayu gid kumuyug ti manga karanidu sa iba, bagkus ngap pumalagiw ginan sa kanya, dahil unman kilala nida nu manga iba tigbagaw, bukun kanda manug-alaga.”

⁶ Inda pag pahalimbawa kay itinultul ni Hisus sa manga tawu, dapat unman nasalman nida kay gustu niya sabihun.

Si Hisus ti Mayad pag Manug-alaga sa Karanidu

⁷ Sinabi maan ni Hisus sa kanda magkun, “Ungud duy kang pagsabihun sa kanyu, aku ti puwirtahan manga karanidu.

⁸ Ti un-an nakasitay nakauna sa kangku imaw yi ti manga mananakaw ag tulisan tunda. Dapat unman sida binati manga karanidu.

⁹ Aku ti puwirtahan. Una hintay pag tawu nu sumulud lakaw sa kangku, siya maribri. Sumulud siya lumuwas ag makakit siya karan-unun.

¹⁰ Unman sumitay tag ti mananakaw purya lang hampay manakaw, manmatay hanggan mamapas. Aku nagsitay hampay kang manga karanidu kumakit tutuu pag buhi udyi may kakurangan.

¹¹ “Aku ti mayad pag manug-alaga sa karanidu. Ti mayad pag manug-alaga handa diman mamatay para sa kay manga karanidu.

¹² Tuhay ti inupahan lang, unman siya ti tutuu pag manug-alaga sa karanidu ag bukun waydi siya kay apu. Nakan nu makitan niya may simarun idu magpakarani sa manga karanidu, pabay-anan lang niya ti manga karanidu, pumalagiw yi lang siya. Pagka tinkub simarun idu ti karanidu, namululagan yi lang kay iba.

¹³ Ti inupahan magpalagiw dahil magpakiupa lang waydi siya, unman pagpahalgaan niya ti manga karanidu.

¹⁴ Aku ngani ti mayad pag manug-alaga sa karanidu. Kilala di gid niku kang sadili manga karanidu, sida magkilala di gid waydi sa kangku,

¹⁵ parihu diman sa kay magkilala niku Ama sa kangku ag kang diman magkilala sa kang Ama. Handa diman aku mamatay tungkul sa kang manga karanidu.

¹⁶ May imaw waya gid aku tuhay pag manga karanidu, unman minsan sa inda pag tudir. Kailangan tabanun diman niku tunda pag manga karanidu, dumungug sida sa kang magbagaw usahun gid sida ka manada, usa lang ka manug-alaga.

¹⁷ “Pagmahalun aku niku Ama dahil handa aku mamatay hampay tanggapun di maan niku kang buhi.

¹⁸ Unman may tawu bum-ul kang buhi, buluntadan ngap kang ipakaun. May kapangyarihan aku mamatay, may kapangyarihan diman aku hampay mabuhi uman. Inda yi ngani ti ibinilin niku Ama sa kangku hampay kang tupadun.”

¹⁹ Kas-a yi maan namululagan ti manga pinunu Hudiyu kay naisipan dahil sa kay binagaw ni Hisus.

²⁰ Mayamu sa kanda ti nagsabi magkun, “Inapuan siya labang, paung gid siya. Hayga pagpatingihan waya niyu siya?”

²¹ Dapat sinabi manga iba magkun, “Nu ti tawu inapuan labang balaw katida duy kay pagbagawun. Mahimu aw lugud makapaayad sa buta ti labang?”

Dinayu yi manga Tawu si Hisus

²² Pagka dugay may Kapistahan sa Hirusalim tungkul sa Pag-alaala sa kanda nagtalaga Balay Diyus. Ati katpung sa udas amihanun.

²³ Namasyar si Hisus sa pagkumnun manga tawu Parat-ungan ni Sulumun ati sa Balay Diyus.

²⁴ Pagka dugay nagtipun sa kay palibut ti manga Hudiyu. Sinabi nida sa kan Hisus magkun, “Kabitay waya kadugay duy pagpatalinduwahun nimu kami? Pagtapata yi nimu nu kawu ti Pinili Diyus Manugribri pag Hari.”

²⁵ Sinmagut si Hisus sa kanda magkun, “Sinabi yi niku sa kanyu dapat unman maniwala kamu. Pagtupadun niku kang buruwatun sa kapangyarihan niku Ama. Tunda ngani pag buruwatun niku ti puruyba tungkul sa kangku.

²⁶ Dapat kamu unman magpaniwala dahil balaw kamu minsan sa kang manga karanidu.

²⁷ Kang manga karanidu magdungug sa kang magbagaw. Kilala niku sida ag sida magkuyug sa kangku.

²⁸ Ti manga magpaminsan sa kangku pagpakan-an niku tutuu pag buhi unman may katapusan. Hanggan waya aban dayu gid sida ipadamhak sa kamatayan. Unman may umagaw sa kanda ginan sa kang kamang.

²⁹ Sida ipinakaun niku Ama sa kangku. Kang Ama makapangyarihan sa tanan, unman may umagaw ginan sa kamang niku Ama.

³⁰ Aku hanggan ti Ama urusa kami.”

³¹ Nagpunpun yi gid maan manga batu ti manga Hudiyu hampay ibintuk sa kan Hisus.

³² Sinabi ni Hisus sa kanda magkun, “Mayamu pag manga mayad buwat kang ipinakakit sa kanyu angay sa kay ibinilin Ama sa kangku. Naan sa kang manga buwat ti pag-ikabatu niyu sa kangku?”

³³ Sinmagut sida magkun, “Balaw sa kanmu manga mayad buwat ti pag-ikabatu nimi sa kanmu dapat dahil sa kanmu magbagaw kalukuhan laban sa Diyus. Magpadiyus-diyusan kawu, madi tawu lang waydi.”

³⁴ Sinabi ni Hisus magkun, “Nisurat kabay sa kanyu Kasuguan magkun ti Diyus, ‘Kamu manga diyus.’

³⁵ Alam nita ti pagsabihun Banal Kasuratan unman may pudil hanggan aban. Diyus ngap ti nag-ingaran sa tunda pag manga tawu kuntay sida manga diyus, imaw yi ngani pag manga tawu ti nakatanggap sa kay bagaw Diyus.

³⁶ Ti Ama ti nagpili nagsugu sa kangku sitay tag sa kalibutan. Kabitay lugud masabi niyu aku lapastangan laban sa Diyus nu pagsabihun niku aku ti Anak Diyus?

³⁷ Nu unman pagtupadun niku ti buruwatun niku Ama, danga kamu magpaniwala sa kangku.

³⁸ Dapat ay nu pagtupadun niku ti buruwatun niku Ama, kailangan pagpaniwala kamu sa kang buwat, una abi kamu unman magpaniwala sa kangku. Nu kamu magpaniwala sa kang pagbuwatun, maintindihan niyu kuntay ti Ama minsan sa kangku, aku minsan sa Ama.”

³⁹ Pagkaibgan maan nida dakpun si Hisus dapat siya nalagiw ginan sa kanda atubangan.

⁴⁰ Nag-atag maan si Hisus sa dipay sapa Hurdan, sa kay nagtulbawan kaybi ni Huwan. Pagka si Hisus nadugay ati,

⁴¹ mayamu tawu nagpakarani sa kanya. Magharampangan ti manga tawu magkun, “Unman may nabuwat si Huwan manga makadululaw, dapat ti tanan manga sinabi niya tungkul sa inda pag tawu tutuu gid unman may pudil.”

⁴² Ati sa dipay sapa Hurdan mayamu pag tawu sinmarig sa kan Hisus.