Husyas 9 - Hanunuu

Ti Parusa para sa Israil

¹ Magkun si Husyas, “Kamu pag manga taga Israil, apasi yi niyu kanyu kasayahan parihu sa pagbuwatun iba manga nasyun. Dahil magsamba kamu sa manga diyus-diyusan ag magpakarayu sa kanyu Diyus. Una naan pag giriukan maghandaan kamu kanyu manga ani pag-isipun niyu bayad manga diyus-diyusan dahil sa kanyu pagsamba sa kanda.

² Dapat sa uryan maduraan kamu manga ani, hanggan irinmun ubas.

³ Umighit kamu ginan sa Israil, sa daga Panginuun, ag bumalik kamu sa Ihiptu. Ti iba sa kanyu atabug sa Asirya, mangaun kamu ati manga karan-unun pagbaliwun niyu mag-uring.

⁴ Balaw yi kamu pasnuan maghandug intus sa Panginuun. Kanyu manga handug unman makapasulung sa kanya. Una si unu ti kumaun inda pag manga handug ipaparihu sa mauring, dahil tunda parihu lang sa karan-unun sa balay namatyan. Kanyu manga karan-unun para lang sa kanyu sadili; balaw inda mahimu maisagda sa Balay Panginuun.

⁵ Dahil kanyu manga handug balaw diman tanggapun Panginuun, malu hintay kanyu buwatun sa pagras-ug mahalaga pag sirang pagsamba ngatay sa manga pista bilang pag-alaala sa Panginuun?

⁶ Una waya makapalagiw kamu sa kadamhakan, tipunun di maan niku kamu sa Ihiptu ag ilbung sa Mimpis. Matabunan lang ilamnun ag dugihan pag manga kayu kanyu mahalaga pag manga kagamitan pilak hanggan kanyu manga balay.

⁷ “Manga taga Israil, rinmas-ug yi ti sirang parusahan kamu, sirang pagbalus sa kanyu manga binwat. Ag maalaman gid niyu rinmas-ug yi ngani inda. Sumabi kamu tungkul sa kangku, ‘Tunda pag purupita buang-buang! Paggiyahan siya ispiritu daut!’ Imaw inda kanyu pagsabihun sa kangku dahil mayamu yi kanyu kasalanan ag magkagalit gid kamu sa kangku.

⁸ Bilang purupita, pag-ibahan aku niku Diyus sa paggiya sa kanyu manga taga Israil. Dapat una naan tag aku gustu niyu aku ipadamhak; parihu aku sa manuk kanyu pagkaibgan sudkun. Magkagalit sa kangku ti manga tawu sa Israil, ti pagkilalan-un Diyus kay ulian.

⁹ Masyadu yi gid kamu daut, parihu sa kaybi pag manga lalaki sa Gibiya. Alalahanun Diyus kanyu kadautan; parusahan niya kamu dahil sa kanyu manga kasalanan.”

¹⁰ Magkun ti Panginuun, “Manga taga Israil, katpung pinili niku kanyu manga ginurang bilang kang nasakupan, nagbaya gid aku. Parihu sa tawu nagbaya pagka nakakit siya ubas magtubu sa tigangan ngatay pagka nakakit siya un-an pag burak igus. Dapat pagka nag-atag sida sa Baal Piyur, inintirga nida kanda sadili sa makakaray-a pag diyus-diyusan ag niparihu sida sa manga mayagting pag diyus-diyusan kanda pagmahalun.

¹¹ Manga taga Israil, kanyu kadayawan madura ga manuk lumayang. Unman yi mamuduy ag magkaanak kanyu manga kababayihan.

¹² Una waya magkaanak sida, bul-un di niku sida tanan ag manrukuan kamu. Kaawaawa gid kamu nu pabay-anan yi niku.

¹³ “Kang pamantay kaybi sa kanyu parihu sa manga kayu palma matanuman sa mayad pag daga. Dapat taynguna kailangan tabanun niyu kanyu manga anak sa labanan hampay magkaramatay.”

¹⁴ Magkun si Husyas, “Panginuun, katida ngani duy ti buwata sa kanmu nasakupan: Danga pagpasnui magkaanak ngatay makapasusu lapsag kanda manga kababayihan.”

¹⁵ Magkun ti Panginuun, “Ti tanan kadautan niku nasakupan nag-umpisa sa Gilgal. Ati di waya kinagalitan yi niku sida. Ag dahil sa kanda kadautan, palayasun niku sida sa Israil kang pagbaliwun ulian. Balaw yi niku sida mahalun; ti tanan nida manga takinan naglaban sa kangku.

¹⁶ Parihu sida sa tanum magkalayung kay gamut nakan unman magburak. Una waya sida magkaanak, matyun diman niku kanda manga pagmahalun pag anak.”

¹⁷ Magkun si Husyas, “Bugyahan niku Diyus ti manga taga Israil dahil unman sida magsunud sa kanya. Nakan mawatak sida sa tuhay-tuhay pag nasyun.”