Husyas 8 - Hanunuu

Pinarusahan Panginuun ti Israil dahil sa Kanda Pagsamba sa manga Diyus-diyusan

¹ “Uypi kanyu budyung paandam sa kang nasakupan Israil kang ulian, girahun sida kalaban ga agila kay kaliksi. Dahil balaw pinahalgaan nida kang kasunduan sa kanda ag linabag nida kang Kasuguan.

² Magtawag sida sa kangku magkun, ‘Diyus Israil, pagkilalan-un kawu nimi.’

³ Dapat binugyahan nida ti mayad, nakan lagsun sida nida kalaban.

⁴ Nagpili sida manga hari hanggan manga manugpamahala balaw niku pinili. Nagbuwat sida manga diyus-diyusan ginan sa kanda manga pilak ag gintu. Ag inda pag manga diyus-diyusan imaw ti nagdara kadamhakan sa kanda.

⁵ Pagdayuun niku ti diyus-diyusan baka manga taga Samarya. Magsiklab kang galit sa kanda. Kapira waya nguna sida pag mangabuhi malumpiyu?

⁶ Ti diyus-diyusan baka manga taga Samarya buwat lang waydi manga taga Israil. Balaw tida Diyus! Pihu gid inda runutun.

⁷ “Parihu lang sida ga magpamgas durus ag mag-ani buhawi. Parihu diman sa tirigu unman may uhay, unman inda makapakaun karan-unun. Una waydi mamurak, iba nasyun di waydi ti kumaun.

⁸ Ti Israil ga kinaun iba nasyun. Taynguna magpaamut yi siya sa kanda, parihu siya sa gamit unman may pakinabang.

⁹ Parihu siya sa talun asnu usa-usa, magtalang. Nanhagad awat siya sa Asirya; binayadan niya ti iba ka manga nasyun hampay awatan siya.

¹⁰ Dapat una napasakup siya sa tunda pag manga nasyun, tipunun niku taynguna kay manga nasakupan ag parusahan. Ag umumpisa kanda mag-agwanta sa panab-anan pag-api hari sa kanda hanggan niya manga manugpamahala.

¹¹ Tutuu nagbuwat sida mayamu pag manga harandugan para sa manga handug panlumpiyu, dapat siyun diman sida pag rugar pag nagbuwat kadautan.

¹² Ipinasurat niku ti mayamu pag manga kasuguan para sa kanda, dapat binaliw nida tunda para sa iba balaw para sa kanda.

¹³ Magsagda sida sa kangku bag-u kanda diman pagkan-un kanda handug manga taguban, dapat unman aku magbaya sa kanda. Taynguna, alalahanun niku kanda manga kadautan; parusahan niku sida dahil sa kanda manga kasalanan. Bumalik sida sa Ihiptu.

¹⁴ Kinalimtan manga taga Israil ti naglalang sa kanda. Sida ag ti manga taga Huda nagpatindug manga balay hari hanggan mayamu banwa sangput alad batu. Dapat sunugun niku kanda manga banwa hanggan ti mapag-un pag manga rugar.”