Husyas 7 - Hanunuu

¹ Gustu mana niku paayadun ti manga taga Israil. Dapat kadautan ti mag-akitan niku sa kanda. Magdaya sida, magsaka sa manga balay ag magtakaw, hanggan magtulis sa manga dalan.

² Unman nida pag-isipun magkaala-ala niku kanda tanan kadautan. Taynguna tugka masaudan di sida sa kanda manga kasalanan ag mag-akitan niku inda tanan.

³ Napasulung nida kanda hari hanggan manga takinan sa panab-anan nida kadautan ag kapudilan.

⁴ Tanan sida marapudil; parihu sa mainit pag hurnu balaw yi kailangan paigangun manugbuwat tinapay ginan sa udas maghaug tugka sa humabuk.

⁵ Pagka sa kaarawan nida hari, linangu nida kay manga manugpamahala. Hanggan ti hari nakiinum diman waydi sa manga marapuya niya pag manga manugpamahala.

⁶ Habang magpakarani sida hampay manmatay sa hari hanggan sa kay manga manugpamahala, kanda galit parihu sa hurnu maglabdab. Dahil sa kanda di waya mag-alagad, buu yabi sida magpigil kanda galit, igu surip ga maglabdab apuy.

⁷ Sida tanan maglabdab gid sa pangagalit parihu sa mainit pag hurnu, nakan minatay nida kanda manga takinan. Nidamhak ti tanan nida manga hari, dapat unman gid una di usa sa kanda ti nanhagad awat sa kangku.

⁸ “Magpaamut ti nasakupan Israil sa iba manga nasyun. Balaw sida mapakinabangan parihu sa manipis pag tinama tinapay ud nabaliktad.

⁹ Pagbul-un taga iba nasyun kanda kabisugan, dapat unman nida magkapansin. Parihu sida sa gurangun ubanin yi kay buhuk dapat unman niya magkapansin.

¹⁰ Kanda magpadayaw-dayaw ti magpatutuu dapat sida parusahan. Lang madi nangyari inda tanan sa kanda, unman gid sida nagbalik ag nagdangup sa kangku, ti Panginuun kanda Diyus.

¹¹ Parihu sida sa kalampati; madali lang lukuhun ag unman may pan-intindi. Maghagad sida awat sa Ihiptu, nu kas-a sa Asirya.

¹² Sa kanda mag-atag sa tunda pag manga rugar, amparahun niku sida parihu sa manuk lambatun ag butungun tag sirung. Parusahan niku sida angay sa kang sinabi sa kanda magtiripun.

¹³ Kaawaawa sida dahil napakarayu sida sa kangku. Rurisun niku sida dahil naglaban sida sa kangku. Gustu mana niku iribri sida, dapat magbagaw sida kapudilan tungkul sa kangku.

¹⁴ Balaw tutuu kanda magtawag sa kangku. Maglumi sida sa kanda manga igyaan, pagbiyagan nida kanda bilug mintaras maghagad manga ani hanggan irinmun ubas sa kanda manga diyus-diyusan. Magpakarayu sida sa kangku.

¹⁵ Pagtamyawun niku sida hampay rumig-un, dapat naggayak di ngap sida daut laban sa kangku.

¹⁶ Magdangup sida kan Baal unman may pulus. Parihu sida sa pamana maliku unman mapakinabangan. Mamatay sa girahan kanda manga takinan dahil unman sida magdahan nu magbagaw. Dahil siyun puyaan sida manga taga Ihiptu.