Husyas 6 - Hanunuu

Balaw Matinupadun ti Pagsisi manga Israilita

¹ Nagharampangan ti manga Israilita. Magkun sida, “Abala, bumalik yi kita sa Panginuun. Siya ti nagpadamhak sa kanta ag siya diman ti mangawat sa kanta.

² Parihu kita sa namatay kay buhiun uman. Balaw dumugay bangunun niya kita, ag mangabuhi kita sa kay atubangan.

³ Hingabtun nita makilala ti Panginuun. Pihu gid rumas-ug siya, parihu sa pagbutlak init. Rumas-ug siya parihu sa uran maghurum sa daga.”

⁴ Dapat magkun ti Panginuun, “Israil hanggan Huda, hintay kang buwatun sa kanyu? Kanyu pagmahal sa kangku madali lang magkadura parihu sa anitay ngatay tun-ug sa surip.

⁵ Nakan ngani pinasandaman niku kamu sa panab-anan niku manga purupita kuntay midamhak kamu ag magkaramatay. Ipaburayhaw niku kang pagsintinsiya sa kanyu parihu sa rayaw kilat.

⁶ Dahil balaw kanyu manga handug kang pagkaibgan nu unman kanyu pagmahal. Mas gustu waya niku kilalan-un niyu aku kaysa manhandug kamu manga handug pagsunugun.

⁷ Parihu sa kan Adam, dinaut niyu ti kasunduan niku sa kanyu. Nagpudil kamu sa kangku asan sa kanyu rugar.

⁸ Ti banwa Gilyad ulian daut pag manga tawu hanggan manga manmamatay.

⁹ Kanyu manga manughandug ga gurupu manga tulisan magtanud kanda unu-unuhun. Magmatay sida sa dalan atabug sa Sikim, ag una wadi hintay pag makakaray-a buwat kanda pagbuwatun.

¹⁰ Manga taga Israil, makahirikrab kang nakitan sa kanyu; magsamba kamu sa manga diyus-diyusan, nakan nagbaliw mauring kamu.

¹¹ Ag kamu pag manga taga Huda, nakatagka yi parusahan niku. “Gustu mana niku ibalik ti mayad pag kahamtangan niku nasakupan.”