Husyas 5 - Hanunuu

¹ Magkun waya ti Panginuun, “Pagpatingi kamu, nasakupan Israil, hanggan kamu pag manga manughandug ag manga mimru magtal-anakan hari, dahil inda pag sintinsiya laban sa kanyu: Ga suduk kamu, dahil pinatalang niyu ti manga nasakupan Mispa hanggan Tabur.

² Maglaban kamu sa kangku ag maggayak gid manmatay, nakan parig-anan niku kamu tanan.

³ Alam niku ti tanan tungkul sa kanyu manga taga Israil; unman kamu may milihim sa kangku. Magsamba kamu sa manga diyus-diyusan, nakan mauring kamu.

⁴ “Kanyu daut manga buruwatun imaw ti mag-ampara sa kanyu sa pagbalik sa kangku sa kanyu Diyus. Dahil asan sa kanyu tagipusuun ti ispiritu mag-udyuk sa kanyu sa pagsamba sa manga diyus-diyusan, ag balaw niyu aku pagkilalan-un Panginuun.

⁵ Kanyu marapadayaw-dayaw magpatutuu kuntay dapat kamu parusahan. Ag dahil sa kanyu manga kasalanan midamhak kamu pag manga taga Israil kaibahan ti manga taga Huda.

⁶ Mansagda kamu manga karanidu, manga kambing hanggan manga baka sa pagdangup sa kangku, dapat unman niyu malakawan kang kadayawan dahil binugyahan yi niku kamu.

⁷ Pinudilan niyu aku dahil kanyu manga anak, anak niyu sa luwas. Nakan taynguna, rurisun niku kamu hanggan kanyu manga daga sa sulud usa lang ka bulan.

Ti Labanan Huda ag Israil

⁸ “Patunuga ti manga budyung hanggan manga turumpita sa pagpasandam sa manga tawu sa Gibiya hanggan sa Rama! Padnugan ti ringgit kaguluhan sa Bit Abin! Nasakupan Binhamin, pagbantay kamu!

⁹ Midamhak ti Israil sa sirang pagparusa. Mangyari gid kang pagsabihun laban sa manga linahi Israil!

¹⁰ Ti manga takinan Huda parihu sa manga tawu maghalin manga muhun dahil inagaw nida ti daga Israil. Nakan ibuhus niku sa kanda kang pangagalit parihu sa baha.

¹¹ Pag-apihun ag pag-ipadamhak ti Israil dahil pagparusahan niku siya. Dahil parargu di gid siya magsunud sa manga diyus-diyusan.

¹² Parihu aku sa iyay mag-arit-it sa Israil hanggan sa Huda.

¹³ “Pagka nakitan Israil hanggan Huda kanda kahamtangan balaw mayad, nanhagad awat ti Israil sa makapangyarihan pag hari Asirya. Dapat unman siya makaawat sa kanda.

¹⁴ Dahil girahun niku ti Israil hanggan ti Huda ga liyun maggus-ab sa kay bulay. Aku gid ngap ti rumuris sa kanda. Darahun niku sida sa iba nasyun, ag unman may manribri sa kanda.

¹⁵ Pagkatapus, bumalik aku sa kang rugar tugka sa akuun nida kanda manga kasalanan. Ag mandangup gid sida sa kangku sa kanda kakurian.”