Husyas 4 - Hanunuu

Ti Bangdan Panginuun Laban sa Israil hanggan sa Kay manga Manug-asiwa

¹ Kamu pag manga Israilita mag-uli sa daga Israil, patingihi niyu inda pag bangdan Panginuun laban sa kanyu, “Unman yi may matinupadun pag tawu sa kanyu daga, hanggan magmahal ag magkilala sa kangku, kanyu Diyus.

² Bagkus ngap, daut kanyu pagbuwatun tabug sa iba, magpamudil, magpanmatay, magpanakaw ag magpanguragin. Nibarita yi inda una naan, ag dasun-dasun ti magmaratyan.

³ Dahil siyun, magkaramara kanyu daga hanggan ti tanan mag-uli siyun magkaramatay, hanggan ti tanan hayup — ti maglakaw, ti maglayang, ag ti maglanguy.

⁴ “Dapat unman may sisihun ngatay bangdanan nu unman ti manga manughandug lang.

⁵ Kamu ag ti manga purupita midamhak, sirang man ngatay sa yabi. Ag ipadamhak diman niku kanyu ina, imaw ti nasyun Israil.

⁶ “Nag-iridamhak kang manga nasakupan dahil kurang sida sa kaalaman. Dahil kamu gid ngap dinayu niyu ti kaalaman tungkul sa kangku, nakan dayuun diman niku kamu bilang manga manughandug niku. Kinalimtan niyu kang Kasuguan, nakan kalimtan diman niku kanyu manga anak.

⁷ Mintaras magyamu kamu pag manga manughandug, magyamu diman waydi kanyu kasalanan sa kangku. Nakan buwatun niku makakaray-a kanyu pag-ipadayaw.

⁸ Gustu niyu magkasala kang manga nasakupan hampay makakaun kamu kanda manga handug panlumpiyu.

⁹ Nakan nu kabitay niku parusahan ti nasakupan, parusahan diman niku kamu pag manga manughandug. Parusahan niku kamu dahil sa kanyu manga ugali; balusan niku kamu sa kanyu manga pagbuwatun.

¹⁰ Tutuu ngani magkaun kamu, dapat unman kamu magkabsug. Magsamba kamu sa manga diyus-diyusan imaw kanyu pagpaniwalaan makapakaun anak, dapat unman kamu magkaanak dahil binugyahan niyu aku, ti Panginuun,

¹¹ agud sambahun ti manga diyus-diyusan. “Manga nasakupan niku, ti bag-u ag ti daan pag intus magdaut kanyu mayad pag pan-unawa.

Pag-isumpa Diyus ti Pagsamba sa manga Diyus-diyusan

¹² Maghagad kamu paanyu sa kanyu diyus-diyusan kayu. Ag angay sa kanyu, magsagut inda. Pag-ipatalang kamu ispiritu magganyat sa kanyu hampay sumamba sa manga diyus-diyusan, nakan pinatlikudan niyu aku ga babayi nanguragin.

¹³ Magsagda kamu ag magtuub manga kamangyan sa katayungtungan manga bantud hanggan tagudtud, ag sa manga sirung arabwat, sa maraybung pag manga kayu dahil mayad parasirngan. Nakan kanyu manga anak daraga mag-ulid sa manga lalaki ag kanyu manga umagad babayi magpanguragin.

¹⁴ Dapat balaw niku sida parusahan sa kanda pagbuwatun daut dahil kamu hanggan pag manga lalaki mag-ulid diman sa manga babayi baraydan ati sa Balay Diyus, ag maghandug waya kamu kaibahan nida para sa manga diyus-diyusan. Nakan dahil kamu pag nasakupan unman may intindi tungkul sa katutuuhanan, midamhak kamu.

¹⁵ “Manga taga Israil, una binugyahan niyu aku ga babayi magpanguragin, danga niyu pagdalahiga ti manga taga Huda. “Ag kamu pag manga taga Huda, danga kamu mag-atag sa Gilgal hanggan sa Bit Abin hampay mansamba sa kangku ngatay mamuwat taratu sa ngaran niku.

¹⁶ Maganit kay ulu ti manga taga Israil, parihu sa dumaraga baka. Nakan kabitay niku sida maalagaan parihu sa manga karanidu sa karatagan?

¹⁷ Nalagum yi sida sa manga diyus-diyusan. Pabay-ani yi lang sida!

¹⁸ Pagkatapus nida inum irinmun makalangu, sigi lang sida sa ulid sa manga babayi baraydan. Kanda manga takinan gustu gid bumuwat kakay-ahan kaysa kadayawan.

¹⁹ Rurisun gid sida ga pag-ipayag mabisug pag durus, ag mangay-a sida sa kanda maghandug sa manga diyus-diyusan.”